૧. સુવીરસુત્તં

૨૪૭. એવં મે સુતં – એકં સમયં ભગવા સાવત્થિયં વિહરતિ જેતવને અનાથપિણ્ડિકસ્સ આરામે. તત્ર ખો ભગવા ભિક્ખૂ આમન્તેસિ – ‘‘ભિક્ખવો’’તિ. ‘‘ભદન્તે’’તિ તે ભિક્ખૂ ભગવતો પચ્ચસ્સોસું. ભગવા એતદવોચ –

‘‘ભૂતપુબ્બં, ભિક્ખવે, અસુરા દેવે અભિયંસુ. અથ ખો, ભિક્ખવે, સક્કો દેવાનમિન્દો સુવીરં દેવપુત્તં આમન્તેસિ – ‘એતે, તાત સુવીર, અસુરા દેવે અભિયન્તિ. ગચ્છ, તાત સુવીર, અસુરે પચ્ચુય્યાહી’તિ. ‘એવં ભદ્દન્તવા’તિ ખો, ભિક્ખવે, સુવીરો દેવપુત્તો સક્કસ્સ દેવાનમિન્દસ્સ પટિસ્સુત્વા પમાદં આપાદેસિ [આહરેસિ (કત્થચિ) નવઙ્ગુત્તરે સીહનાદસુત્તેપિ]. દુતિયમ્પિ ખો, ભિક્ખવે, સક્કો દેવાનમિન્દો સુવીરં દેવપુત્તં આમન્તેસિ – ‘એતે, તાત સુવીર, અસુરા દેવે અભિયન્તિ. ગચ્છ, તાત સુવીર, અસુરે પચ્ચુય્યાહી’તિ. ‘એવં ભદ્દન્તવા’તિ ખો, ભિક્ખવે, સુવીરો દેવપુત્તો સક્કસ્સ દેવાનમિન્દસ્સ પટિસ્સુત્વા દુતિયમ્પિ પમાદં આપાદેસિ. તતિયમ્પિ ખો, ભિક્ખવે, સક્કો દેવાનમિન્દો સુવીરં દેવપુત્તં આમન્તેસિ – ‘એતે, તાત સુવીર, અસુરા દેવે અભિયન્તિ. ગચ્છ, તાત સુવીર, અસુરે પચ્ચુય્યાહી’તિ. ‘એવં ભદ્દન્તવા’તિ ખો, ભિક્ખવે, સુવીરો દેવપુત્તો સક્કસ્સ દેવાનમિન્દસ્સ પટિસ્સુત્વા તતિયમ્પિ પમાદં આપાદેસિ. અથ ખો, ભિક્ખવે, સક્કો દેવાનમિન્દો સુવીરં દેવપુત્તં ગાથાય અજ્ઝભાસિ –

‘‘અનુટ્ઠહં અવાયામં, સુખં યત્રાધિગચ્છતિ;

સુવીર તત્થ ગચ્છાહિ, મઞ્ચ તત્થેવ પાપયા’’તિ.

‘‘અલસ્વસ્સ [અલસ’સ્સ (સી. પી.), અલસ્વાયં (સ્યા. કં.)] અનુટ્ઠાતા, ન ચ કિચ્ચાનિ કારયે;

સબ્બકામસમિદ્ધસ્સ, તં મે સક્ક વરં દિસા’’તિ.

‘‘યત્થાલસો અનુટ્ઠાતા, અચ્ચન્તં સુખમેધતિ;

સુવીર તત્થ ગચ્છાહિ, મઞ્ચ તત્થેવ પાપયા’’તિ.

‘‘અકમ્મુના [અકમ્મના (સી. પી.)] દેવસેટ્ઠ, સક્ક વિન્દેમુ યં સુખં;

અસોકં અનુપાયાસં, તં મે સક્ક વરં દિસા’’તિ.

‘‘સચે અત્થિ અકમ્મેન, કોચિ ક્વચિ ન જીવતિ;

નિબ્બાનસ્સ હિ સો મગ્ગો, સુવીર તત્થ ગચ્છાહિ;

મઞ્ચ તત્થેવ પાપયા’’તિ.

‘‘સો હિ નામ, ભિક્ખવે, સક્કો દેવાનમિન્દો સકં પુઞ્ઞફલં ઉપજીવમાનો દેવાનં તાવતિંસાનં ઇસ્સરિયાધિપચ્ચં રજ્જં કારેન્તો ઉટ્ઠાનવીરિયસ્સ વણ્ણવાદી ભવિસ્સતિ. ઇધ ખો તં, ભિક્ખવે, સોભેથ, યં તુમ્હે એવં સ્વાક્ખાતે ધમ્મવિનયે પબ્બજિતા સમાના ઉટ્ઠહેય્યાથ ઘટેય્યાથ વાયમેય્યાથ અપ્પત્તસ્સ પત્તિયા અનધિગતસ્સ અધિગમાય, અસચ્છિકતસ્સ સચ્છિકિરિયાયા’’તિ.