૯. મટ્ઠકુણ્ડલીવિમાનવત્થુ

૧૨૦૭. [પે. વ. ૧૮૬] ‘‘અલઙ્કતો મટ્ઠકુણ્ડલી [મટ્ટકુણ્ડલી (સી.)], માલધારી હરિચન્દનુસ્સદો;

બાહા પગ્ગય્હ કન્દસિ, વનમજ્ઝે કિં દુક્ખિતો તુવ’’ન્તિ.

૧૨૦૮. ‘‘સોવણ્ણમયો પભસ્સરો, ઉપ્પન્નો રથપઞ્જરો મમ;

તસ્સ ચક્કયુગં ન વિન્દામિ, તેન દુક્ખેન જહામિ [જહિસ્સં (સી.), જહિસ્સામિ (સ્યા. પી.)] જીવિત’’ન્તિ.

૧૨૦૯. ‘‘સોવણ્ણમયં મણિમયં, લોહિતકમયં [લોહિતઙ્ગમયં (સ્યા.), લોહિતઙ્કમયં (સી.), લોહમયં (કત્થચિ)] અથ રૂપિયમયં;

આચિક્ખ [આચિક્ખથ (ક.)] મે ભદ્દમાણવ, ચક્કયુગં પટિપાદયામિ તે’’તિ.

૧૨૧૦. સો માણવો તસ્સ પાવદિ, ‘‘ચન્દિમસૂરિયા ઉભયેત્થ દિસ્સરે;

સોવણ્ણમયો રથો મમ, તેન ચક્કયુગેન સોભતી’’તિ.

૧૨૧૧. ‘‘બાલો ખો ત્વં અસિ માણવ, યો ત્વં પત્થયસે અપત્થિયં;

મઞ્ઞામિ તુવં મરિસ્સસિ, ન હિ ત્વં લચ્છસિ ચન્દિમસૂરિયે’’તિ.

૧૨૧૨. ‘‘ગમનાગમનમ્પિ દિસ્સતિ, વણ્ણધાતુ ઉભયત્થ વીથિયા;

પેતો [પેતો પન (સી. સ્યા.)] કાલકતો ન દિસ્સતિ, કો નિધ કન્દતં બાલ્યતરો’’તિ.

૧૨૧૩. ‘‘સચ્ચં ખો વદેસિ માણવ, અહમેવ કન્દતં બાલ્યતરો;

ચન્દં વિય દારકો રુદં, પેતં કાલકતાભિપત્થયિ’’ન્તિ.

૧૨૧૪. ‘‘આદિત્તં વત મં સન્તં, ઘતસિત્તંવ પાવકં;

વારિના વિય ઓસિઞ્ચં, સબ્બં નિબ્બાપયે દરં.

૧૨૧૫. ‘‘અબ્બહી [અબ્બૂળ્હ (પી.), અબ્બૂળ્હં (સ્યા. ક.)] વત મે સલ્લં, સોકં હદયનિસ્સિતં;

યો મે સોકપરેતસ્સ, પુત્તસોકં અપાનુદિ.

૧૨૧૬. ‘‘સ્વાહં અબ્બૂળ્હસલ્લોસ્મિ, સીતિભૂતોસ્મિ નિબ્બુતો;

ન સોચામિ ન રોદામિ, વત સુત્વાન માણવાતિ.

૧૨૧૭. ‘‘દેવતા નુસિ ગન્ધબ્બો, અદુ [આદુ (સી. સ્યા.)] સક્કો પુરિન્દદો;

કો વા ત્વં કસ્સ વા પુત્તો, કથં જાનેમુ તં મય’’ન્તિ.

૧૨૧૮. ‘‘યઞ્ચ [યં (ક.)] કન્દસિ યઞ્ચ રોદસિ, પુત્તં આળાહને સયં દહિત્વા;

સ્વાહં કુસલં કરિત્વા કમ્મં, તિદસાનં સહબ્યતં ગતો’’તિ [પત્તોતિ (સી. સ્યા. પી.)].

૧૨૧૯. ‘‘અપ્પં વા બહું વા નાદ્દસામ, દાનં દદન્તસ્સ સકે અગારે;

ઉપોસથકમ્મં વા [ઉપોસથકમ્મઞ્ચ (ક.)] તાદિસં, કેન કમ્મેન ગતોસિ દેવલોક’’ન્તિ.

૧૨૨૦. ‘‘આબાધિકોહં દુક્ખિતો ગિલાનો, આતુરરૂપોમ્હિ સકે નિવેસને;

બુદ્ધં વિગતરજં વિતિણ્ણકઙ્ખં, અદ્દક્ખિં સુગતં અનોમપઞ્ઞં.

૧૨૨૧. ‘‘સ્વાહં મુદિતમનો પસન્નચિત્તો, અઞ્જલિં અકરિં તથાગતસ્સ;

તાહં કુસલં કરિત્વાન કમ્મં, તિદસાનં સહબ્યતં ગતો’’તિ.

૧૨૨૨. ‘‘અચ્છરિયં વત અબ્ભુતં વત, અઞ્જલિકમ્મસ્સ અયમીદિસો વિપાકો;

અહમ્પિ મુદિતમનો પસન્નચિત્તો, અજ્જેવ બુદ્ધં સરણં વજામી’’તિ.

૧૨૨૩. ‘‘અજ્જેવ બુદ્ધં સરણં વજાહિ, ધમ્મઞ્ચ સઙ્ઘઞ્ચ પસન્નચિત્તો;

તથેવ સિક્ખાય પદાનિ પઞ્ચ, અખણ્ડફુલ્લાનિ સમાદિયસ્સુ.

૧૨૨૪. ‘‘પાણાતિપાતા વિરમસ્સુ ખિપ્પં, લોકે અદિન્નં પરિવજ્જયસ્સુ;

અમજ્જપો મા ચ મુસા ભણાહિ, સકેન દારેન ચ હોહિ તુટ્ઠો’’તિ.

૧૨૨૫. ‘‘અત્થકામોસિ મે યક્ખ, હિતકામોસિ દેવતે;

કરોમિ તુય્હં વચનં, ત્વંસિ આચરિયો મમાતિ.

૧૨૨૬. ‘‘ઉપેમિ સરણં બુદ્ધં, ધમ્મઞ્ચાપિ અનુત્તરં;

સઙ્ઘઞ્ચ નરદેવસ્સ, ગચ્છામિ સરણં અહં.

૧૨૨૭. ‘‘પાણાતિપાતા વિરમામિ ખિપ્પં, લોકે અદિન્નં પરિવજ્જયામિ;

અમજ્જપો નો ચ મુસા ભણામિ, સકેન દારેન ચ હોમિ તુટ્ઠો’’તિ.

મટ્ઠકુણ્ડલીવિમાનં નવમં.