૧૦. સેરીસકવિમાનવત્થુ

૧૨૨૮. [પે. વ. ૬૦૪] સુણોથ યક્ખસ્સ ચ વાણિજાન ચ, સમાગમો યત્થ તદા અહોસિ;

યથા કથં ઇતરિતરેન ચાપિ, સુભાસિતં તઞ્ચ સુણાથ સબ્બે.

૧૨૨૯. ‘‘યો સો અહુ રાજા પાયાસિ નામ [નામો (સી.)], ભુમ્માનં સહબ્યગતો યસસ્સી;

સો મોદમાનોવ સકે વિમાને, અમાનુસો માનુસે અજ્ઝભાસીતિ.

૧૨૩૦. ‘‘વઙ્કે અરઞ્ઞે અમનુસ્સટ્ઠાને, કન્તારે અપ્પોદકે અપ્પભક્ખે;

સુદુગ્ગમે વણ્ણુપથસ્સ મજ્ઝે, વઙ્કં ભયા [ધઙ્કંભયા (ક.)] નટ્ઠમના મનુસ્સા.

૧૨૩૧. ‘‘નયિધ ફલા મૂલમયા ચ સન્તિ, ઉપાદાનં નત્થિ કુતોધ ભક્ખો;

અઞ્ઞત્ર પંસૂહિ ચ વાલુકાહિ ચ, તતાહિ ઉણ્હાહિ ચ દારુણાહિ ચ.

૧૨૩૨. ‘‘ઉજ્જઙ્ગલં તત્તમિવં કપાલં, અનાયસં પરલોકેન તુલ્યં;

લુદ્દાનમાવાસમિદં પુરાણં, ભૂમિપ્પદેસો અભિસત્તરૂપો.

૧૨૩૩. ‘‘અથ તુમ્હે કેન [કેન નુ (સ્યા. ક.)] વણ્ણેન, કિમાસમાના ઇમં પદેસં હિ;

અનુપવિટ્ઠા સહસા સમેચ્ચ, લોભા ભયા અથ વા સમ્પમૂળ્હા’’તિ.

૧૨૩૪. ‘‘મગધેસુ અઙ્ગેસુ ચ સત્થવાહા, આરોપયિત્વા પણિયં પુથુત્તં;

તે યામસે સિન્ધુસોવીરભૂમિં, ધનત્થિકા ઉદ્દયં પત્થયાના.

૧૨૩૫. ‘‘દિવા પિપાસં નધિવાસયન્તા, યોગ્ગાનુકમ્પઞ્ચ સમેક્ખમાના,

એતેન વેગેન આયામ સબ્બે [સબ્બે તે (ક.)], રત્તિં મગ્ગં પટિપન્ના વિકાલે.

૧૨૩૬. ‘‘તે દુપ્પયાતા અપરદ્ધમગ્ગા, અન્ધાકુલા વિપ્પનટ્ઠા અરઞ્ઞે;

સુદુગ્ગમે વણ્ણુપથસ્સ મજ્ઝે, દિસં ન જાનામ પમૂળ્હચિત્તા.

૧૨૩૭. ‘‘ઇદઞ્ચ દિસ્વાન અદિટ્ઠપુબ્બં, વિમાનસેટ્ઠઞ્ચ તવઞ્ચ યક્ખ;

તતુત્તરિં જીવિતમાસમાના, દિસ્વા પતીતા સુમના ઉદગ્ગા’’તિ.

૧૨૩૮. ‘‘પારં સમુદ્દસ્સ ઇમઞ્ચ વણ્ણું [વનં (સ્યા.), વણ્ણં (ક.)], વેત્તાચરં [વેત્તં પરં (સ્યા.), વેત્તાચારં (ક.)] સઙ્કુપથઞ્ચ મગ્ગં;

નદિયો પન પબ્બતાનઞ્ચ દુગ્ગા, પુથુદ્દિસા ગચ્છથ ભોગહેતુ.

૧૨૩૯. ‘‘પક્ખન્દિયાન વિજિતં પરેસં, વેરજ્જકે માનુસે પેક્ખમાના;

યં વો સુતં વા અથ વાપિ દિટ્ઠં, અચ્છેરકં તં વો સુણોમ તાતા’’તિ.

૧૨૪૦. ‘‘ઇતોપિ અચ્છેરતરં કુમાર, ન તો સુતં વા અથ વાપિ દિટ્ઠં;

અતીતમાનુસ્સકમેવ સબ્બં, દિસ્વાન તપ્પામ અનોમવણ્ણં.

૧૨૪૧. ‘‘વેહાયસં પોક્ખરઞ્ઞો સવન્તિ, પહૂતમલ્યા [પહૂતમાલ્યા (સ્યા.)] બહુપુણ્ડરીકા;

દુમા ચિમે [દુમા ચ તે (સ્યા. ક.)] નિચ્ચફલૂપપન્ના, અતીવ ગન્ધા સુરભિં પવાયન્તિ.

૧૨૪૨. ‘‘વેળૂરિયથમ્ભા સતમુસ્સિતાસે, સિલાપવાળસ્સ ચ આયતંસા;

મસારગલ્લા સહલોહિતઙ્ગા, થમ્ભા ઇમે જોતિરસામયાસે.

૧૨૪૩. ‘‘સહસ્સથમ્ભં અતુલાનુભાવં, તેસૂપરિ સાધુમિદં વિમાનં;

રતનન્તરં કઞ્ચનવેદિમિસ્સં, તપનીયપટ્ટેહિ ચ સાધુછન્નં.

૧૨૪૪. ‘‘જમ્બોનદુત્તત્તમિદં સુમટ્ઠો, પાસાદસોપાણફલૂપપન્નો;

દળ્હો ચ વગ્ગુ ચ સુસઙ્ગતો ચ [વગ્ગુ સુમુખો સુસઙ્ગતો (સી.)], અતીવ નિજ્ઝાનખમો મનુઞ્ઞો.

૧૨૪૫. ‘‘રતનન્તરસ્મિં બહુઅન્નપાનં, પરિવારિતો અચ્છરાસઙ્ગણેન;

મુરજઆલમ્બરતૂરિયઘુટ્ઠો, અભિવન્દિતોસિ થુતિવન્દનાય.

૧૨૪૬. ‘‘સો મોદસિ નારિગણપ્પબોધનો, વિમાનપાસાદવરે મનોરમે;

અચિન્તિયો સબ્બગુણૂપપન્નો, રાજા યથા વેસ્સવણો નળિન્યા [નળિઞ્ઞં (ક.)].

૧૨૪૭. ‘‘દેવો નુ આસિ ઉદવાસિ યક્ખો, ઉદાહુ દેવિન્દો મનુસ્સભૂતો;

પુચ્છન્તિ તં વાણિજા સત્થવાહા, આચિક્ખ કો નામ તુવંસિ યક્ખો’’તિ.

૧૨૪૮. ‘‘સેરીસકો [સેરિસ્સકો (સી. સ્યા.)] નામ અહમ્હિ યક્ખો, કન્તારિયો વણ્ણુપથમ્હિ ગુત્તો;

ઇમં પદેસં અભિપાલયામિ, વચનકરો વેસ્સવણસ્સ રઞ્ઞો’’તિ.

૧૨૪૯. ‘‘અધિચ્ચલદ્ધં પરિણામજં તે, સયં કતં ઉદાહુ દેવેહિ દિન્નં;

પુચ્છન્તિ તં વાણિજા સત્થવાહા, કથં તયા લદ્ધમિદં મનુઞ્ઞ’’ન્તિ.

૧૨૫૦. ‘‘નાધિચ્ચલદ્ધં ન પરિણામજં મે, ન સયં કતં ન હિ દેવેહિ દિન્નં;

સકેહિ કમ્મેહિ અપાપકેહિ, પુઞ્ઞેહિ મે લદ્ધમિદં મનુઞ્ઞ’’ન્તિ.

૧૨૫૧. ‘‘કિં તે વતં કિં પન બ્રહ્મચરિયં, કિસ્સ સુચિણ્ણસ્સ અયં વિપાકો;

પુચ્છન્તિ તં વાણિજા સત્થવાહા, કથં તયા લદ્ધમિદં વિમાન’’ન્તિ.

૧૨૫૨. ‘‘મમં પાયાસીતિ અહુ સમઞ્ઞા, રજ્જં યદા કારયિં કોસલાનં;

નત્થિકદિટ્ઠિ કદરિયો પાપધમ્મો, ઉચ્છેદવાદી ચ તદા અહોસિં.

૧૨૫૩. ‘‘સમણો ચ ખો આસિ કુમારકસ્સપો, બહુસ્સુતો ચિત્તકથી ઉળારો;

સો મે તદા ધમ્મકથં અભાસિ [અકાસિ (સી.)], દિટ્ઠિવિસૂકાનિ વિનોદયી મે.

૧૨૫૪. ‘‘તાહં તસ્સ [તાહં (ક.)] ધમ્મકથં સુણિત્વા, ઉપાસકત્તં પટિવેદયિસ્સં;

પાણાતિપાતા વિરતો અહોસિં, લોકે અદિન્નં પરિવજ્જયિસ્સં;

અમજ્જપો નો ચ મુસા અભાણિં, સકેન દારેન ચ અહોસિ તુટ્ઠો.

૧૨૫૫. ‘‘તં મે વતં તં પન બ્રહ્મચરિયં, તસ્સ સુચિણ્ણસ્સ અયં વિપાકો;

તેહેવ કમ્મેહિ અપાપકેહિ, પુઞ્ઞેહિ મે લદ્ધમિદં વિમાન’’ન્તિ.

૧૨૫૬. ‘‘સચ્ચં કિરાહંસુ નરા સપઞ્ઞા, અનઞ્ઞથા વચનં પણ્ડિતાનં;

યહિં યહિં ગચ્છતિ પુઞ્ઞકમ્મો, તહિં તહિં મોદતિ કામકામી.

૧૨૫૭. ‘‘યહિં યહિં સોકપરિદ્દવો ચ, વધો ચ બન્ધો ચ પરિક્કિલેસો;

તહિં તહિં ગચ્છતિ પાપકમ્મો, ન મુચ્ચતિ દુગ્ગતિયા કદાચી’’તિ.

૧૨૫૮. ‘‘સમ્મૂળ્હરૂપોવ જનો અહોસિ, અસ્મિં મુહુત્તે કલલીકતોવ;

જનસ્સિમસ્સ તુય્હઞ્ચ કુમાર, અપ્પચ્ચયો કેન નુ ખો અહોસી’’તિ.

૧૨૫૯. ‘‘ઇમે ચ સિરીસવના [ઇમે સિરીસૂપવના ચ (સી.), ઇમેપિ સિરીસવના ચ (પી. ક.)] તાતા, દિબ્બા [દિબ્બા ચ (પી. ક.)] ગન્ધા સુરભી [સુરભિં (સી. ક.)] સમ્પવન્તિ [સમ્પવાયન્તિ (ક.)];

તે સમ્પવાયન્તિ ઇમં વિમાનં, દિવા ચ રત્તો ચ તમં નિહન્ત્વા.

૧૨૬૦. ‘‘ઇમેસઞ્ચ ખો વસ્સસતચ્ચયેન, સિપાટિકા ફલતિ એકમેકા;

માનુસ્સકં વસ્સસતં અતીતં, યદગ્ગે કાયમ્હિ ઇધૂપપન્નો.

૧૨૬૧. ‘‘દિસ્વાનહં વસ્સસતાનિ પઞ્ચ, અસ્મિં વિમાને ઠત્વાન તાતા;

આયુક્ખયા પુઞ્ઞક્ખયા ચવિસ્સં, તેનેવ સોકેન પમુચ્છિતોસ્મી’’તિ [સમુચ્છિતોસ્મીતિ (પી. ક.)].

૧૨૬૨. ‘‘કથં નુ સોચેય્ય તથાવિધો સો, લદ્ધા વિમાનં અતુલં ચિરાય;

યે ચાપિ ખો ઇત્તરમુપપન્ના, તે નૂન સોચેય્યું પરિત્તપુઞ્ઞા’’તિ.

૧૨૬૩. ‘‘અનુચ્છવિં ઓવદિયઞ્ચ મે તં, યં મં તુમ્હે પેય્યવાચં વદેથ;

તુમ્હે ચ ખો તાતા મયાનુગુત્તા, યેનિચ્છકં તેન પલેથ સોત્થિ’’ન્તિ.

૧૨૬૪. ‘‘ગન્ત્વા મયં સિન્ધુસોવીરભૂમિં, ધનત્થિકા ઉદ્દયં પત્થયાના;

યથાપયોગા પરિપુણ્ણચાગા, કાહામ સેરીસમહં ઉળાર’’ન્તિ.

૧૨૬૫. ‘‘મા ચેવ સેરીસમહં અકત્થ, સબ્બઞ્ચ વો ભવિસ્સતિ યં વદેથ;

પાપાનિ કમ્માનિ વિવજ્જયાથ, ધમ્માનુયોગઞ્ચ અધિટ્ઠહાથ.

૧૨૬૬. ‘‘ઉપાસકો અત્થિ ઇમમ્હિ સઙ્ઘે, બહુસ્સુતો સીલવતૂપપન્નો;

સદ્ધો ચ ચાગી ચ સુપેસલો ચ, વિચક્ખણો સન્તુસિતો મુતીમા.

૧૨૬૭. ‘‘સઞ્જાનમાનો ન મુસા ભણેય્ય, પરૂપઘાતાય ન ચેતયેય્ય;

વેભૂતિકં પેસુણં નો કરેય્ય, સણ્હઞ્ચ વાચં સખિલં ભણેય્ય.

૧૨૬૮. ‘‘સગારવો સપ્પટિસ્સો વિનીતો, અપાપકો અધિસીલે વિસુદ્ધો;

સો માતરં પિતરઞ્ચાપિ જન્તુ, ધમ્મેન પોસેતિ અરિયવુત્તિ.

૧૨૬૯. ‘‘મઞ્ઞે સો માતાપિતૂનં કારણા, ભોગાનિ પરિયેસતિ ન અત્તહેતુ;

માતાપિતૂનઞ્ચ યો [સો (?)] અચ્ચયેન, નેક્ખમ્મપોણો ચરિસ્સતિ બ્રહ્મચરિયં.

૧૨૭૦. ‘‘ઉજૂ અવઙ્કો અસઠો અમાયો, ન લેસકપ્પેન ચ વોહરેય્ય;

સો તાદિસો સુકતકમ્મકારી, ધમ્મે ઠિતો કિન્તિ લભેથ દુક્ખં.

૧૨૭૧. ‘‘તં કારણા પાતુકતોમ્હિ અત્તના, તસ્મા ધમ્મં પસ્સથ વાણિજાસે;

અઞ્ઞત્ર તેનિહ ભસ્મી [ભસ્મિ (સ્યા.), ભસ્મ (ક.)] ભવેથ, અન્ધાકુલા વિપ્પનટ્ઠા અરઞ્ઞે;

તં ખિપ્પમાનેન લહું પરેન, સુખો હવે સપ્પુરિસેન સઙ્ગમો’’તિ.

૧૨૭૨. ‘‘કિં નામ સો કિઞ્ચ કરોતિ કમ્મં,

કિં નામધેય્યં કિં પન તસ્સ ગોત્તં;

મયમ્પિ નં દટ્ઠુકામમ્હ યક્ખ, યસ્સાનુકમ્પાય ઇધાગતોસિ;

લાભા હિ તસ્સ, યસ્સ તુવં પિહેસી’’તિ.

૧૨૭૩. ‘‘યો કપ્પકો સમ્ભવનામધેય્યો,

ઉપાસકો કોચ્છફલૂપજીવી;

જાનાથ નં તુમ્હાકં પેસિયો સો,

મા ખો નં હીળિત્થ સુપેસલો સો’’તિ.

૧૨૭૪. ‘‘જાનામસે યં ત્વં પવદેસિ [વદેસિ (સી.)] યક્ખ,

ન ખો નં જાનામ સ એદિસોતિ;

મયમ્પિ નં પૂજયિસ્સામ યક્ખ,

સુત્વાન તુય્હં વચનં ઉળાર’’ન્તિ.

૧૨૭૫. ‘‘યે કેચિ ઇમસ્મિં સત્થે મનુસ્સા,

દહરા મહન્તા અથવાપિ મજ્ઝિમા;

સબ્બેવ તે આલમ્બન્તુ વિમાનં,

પસ્સન્તુ પુઞ્ઞાનં ફલં કદરિયા’’તિ.

૧૨૭૬. તે તત્થ સબ્બેવ ‘અહં પુરે’તિ,

તં કપ્પકં તત્થ પુરક્ખત્વા [પુરક્ખિપિત્વા (સી.)];

સબ્બેવ તે આલમ્બિંસુ વિમાનં,

મસક્કસારં વિય વાસવસ્સ.

૧૨૭૭. તે તત્થ સબ્બેવ ‘અહં પુરે’તિ, ઉપાસકત્તં પટિવેદયિંસુ;

પાણાતિપાતા વિરતા અહેસું, લોકે અદિન્નં પરિવજ્જયિંસુ;

અમજ્જપા નો ચ મુસા ભણિંસુ, સકેન દારેન ચ અહેસું તુટ્ઠા.

૧૨૭૮. તે તત્થ સબ્બેવ ‘અહં પુરે’તિ, ઉપાસકત્તં પટિવેદયિત્વા;

પક્કામિ સત્થો અનુમોદમાનો, યક્ખિદ્ધિયા અનુમતો પુનપ્પુનં.

૧૨૭૯. ‘‘ગન્ત્વાન તે સિન્ધુસોવીરભૂમિં, ધનત્થિકા ઉદ્દયં [ઉદય (પી. ક.)] પત્થયાના;

યથાપયોગા પરિપુણ્ણલાભા, પચ્ચાગમું પાટલિપુત્તમક્ખતં.

૧૨૮૦. ‘‘ગન્ત્વાન તે સઙ્ઘરં સોત્થિવન્તો,

પુત્તેહિ દારેહિ સમઙ્ગિભૂતા;

આનન્દી વિત્તા [આનન્દચિત્તા (સ્યા.), આનન્દીચિત્તા (ક.)] સુમના પતીતા,

અકંસુ સેરીસમહં ઉળારં;

સેરીસકં તે પરિવેણં માપયિંસુ.

૧૨૮૧. એતાદિસા સપ્પુરિસાન સેવના,

મહત્થિકા ધમ્મગુણાન સેવના;

એકસ્સ અત્થાય ઉપાસકસ્સ,

સબ્બેવ સત્તા સુખિતા [સુખિનો (પી. ક.)] અહેસુન્તિ.

સેરીસકવિમાનં દસમં.