૧૩. ચૂળરથવિમાનવત્થુ

૯૮૧. ‘‘દળ્હધમ્મા નિસારસ્સ, ધનું ઓલુબ્ભ તિટ્ઠસિ;

ખત્તિયો નુસિ રાજઞ્ઞો, અદુ લુદ્દો વનેચરો’’તિ [વનાચરોતિ (સ્યા. ક.)].

૯૮૨. ‘‘અસ્સકાધિપતિસ્સાહં, ભન્તે પુત્તો વનેચરો;

નામં મે ભિક્ખુ તે બ્રૂમિ, સુજાતો ઇતિ મં વિદૂ [વિદું (સી.)].

૯૮૩. ‘‘મિગે ગવેસમાનોહં, ઓગાહન્તો બ્રહાવનં;

મિગં તઞ્ચેવ [મિગં ગન્ત્વેવ (સ્યા.), મિગવધઞ્ચ (ક.)] નાદ્દક્ખિં, તઞ્ચ દિસ્વા ઠિતો અહ’’ન્તિ.

૯૮૪. ‘‘સ્વાગતં તે મહાપુઞ્ઞ, અથો તે અદુરાગતં;

એત્તો ઉદકમાદાય, પાદે પક્ખાલયસ્સુ તે.

૯૮૫. ‘‘ઇદમ્પિ પાનીયં સીતં, આભતં ગિરિગબ્ભરા;

રાજપુત્ત તતો પિત્વા [પીત્વા (સી. સ્યા.)], સન્થતસ્મિં ઉપાવિસા’’તિ.

૯૮૬. ‘‘કલ્યાણી વત તે વાચા, સવનીયા મહામુનિ;

નેલા અત્થવતી [ચત્થવતી (સી.)] વગ્ગુ, મન્ત્વા [મન્તા (સ્યા. પી. ક.)] અત્થઞ્ચ ભાસસિ [ભાસસે (સી.)].

૯૮૭. ‘‘કા તે રતિ વને વિહરતો, ઇસિનિસભ વદેહિ પુટ્ઠો;

તવ વચનપથં નિસામયિત્વા, અત્થધમ્મપદં સમાચરેમસે’’તિ.

૯૮૮. ‘‘અહિંસા સબ્બપાણીનં, કુમારમ્હાક રુચ્ચતિ;

થેય્યા ચ અતિચારા ચ, મજ્જપાના ચ આરતિ.

૯૮૯. ‘‘આરતિ સમચરિયા ચ, બાહુસચ્ચં કતઞ્ઞુતા;

દિટ્ઠેવ ધમ્મે પાસંસા, ધમ્મા એતે પસંસિયાતિ.

૯૯૦. ‘‘સન્તિકે મરણં તુય્હં, ઓરં માસેહિ પઞ્ચહિ;

રાજપુત્ત વિજાનાહિ, અત્તાનં પરિમોચયા’’તિ.

૯૯૧. ‘‘કતમં સ્વાહં જનપદં ગન્ત્વા, કિં કમ્મં કિઞ્ચ પોરિસં;

કાય વા પન વિજ્જાય, ભવેય્યં અજરામરો’’તિ.

૯૯૨. ‘‘ન વિજ્જતે સો પદેસો, કમ્મં વિજ્જા ચ પોરિસં;

યત્થ ગન્ત્વા ભવે મચ્ચો, રાજપુત્તાજરામરો.

૯૯૩. ‘‘મહદ્ધના મહાભોગા, રટ્ઠવન્તોપિ ખત્તિયા;

પહૂતધનધઞ્ઞાસે, તેપિ નો [તેપિ ન (બહૂસુ)] અજરામરા.

૯૯૪. ‘‘યદિ તે સુતા અન્ધકવેણ્ડુપુત્તા [અન્ધકવેણ્હુપુત્તા (સી.), અણ્ડકવેણ્ડપુત્તા (સ્યા. ક.)], સૂરા વીરા વિક્કન્તપ્પહારિનો;

તેપિ આયુક્ખયં પત્તા, વિદ્ધસ્તા સસ્સતીસમા.

૯૯૫. ‘‘ખત્તિયા બ્રાહ્મણા વેસ્સા, સુદ્દા ચણ્ડાલપુક્કુસા;

એતે ચઞ્ઞે ચ જાતિયા, તેપિ નો અજરામરા.

૯૯૬. ‘‘યે મન્તં પરિવત્તેન્તિ, છળઙ્ગં બ્રહ્મચિન્તિતં;

એતે ચઞ્ઞે ચ વિજ્જાય, તેપિ નો અજરામરા.

૯૯૭. ‘‘ઇસયો ચાપિ યે સન્તા, સઞ્ઞતત્તા તપસ્સિનો;

સરીરં તેપિ કાલેન, વિજહન્તિ તપસ્સિનો.

૯૯૮. ‘‘ભાવિતત્તાપિ અરહન્તો, કતકિચ્ચા અનાસવા;

નિક્ખિપન્તિ ઇમં દેહં, પુઞ્ઞપાપપરિક્ખયા’’તિ.

૯૯૯. ‘‘સુભાસિતા અત્થવતી, ગાથાયો તે મહામુનિ;

નિજ્ઝત્તોમ્હિ સુભટ્ઠેન, ત્વઞ્ચ મે સરણં ભવા’’તિ.

૧૦૦૦. ‘‘મા મં ત્વં સરણં ગચ્છ, તમેવ સરણં વજ [ભજ (ક.)];

સક્યપુત્તં મહાવીરં, યમહં સરણં ગતો’’તિ.

૧૦૦૧. ‘‘કતરસ્મિં સો જનપદે, સત્થા તુમ્હાક મારિસ;

અહમ્પિ દટ્ઠું ગચ્છિસ્સં, જિનં અપ્પટિપુગ્ગલ’’ન્તિ.

૧૦૦૨. ‘‘પુરત્થિમસ્મિં જનપદે, ઓક્કાકકુલસમ્ભવો;

તત્થાસિ પુરિસાજઞ્ઞો, સો ચ ખો પરિનિબ્બુતો’’તિ.

૧૦૦૩. ‘‘સચે હિ બુદ્ધો તિટ્ઠેય્ય, સત્થા તુમ્હાક મારિસ;

યોજનાનિ સહસ્સાનિ, ગચ્છેય્યં [ગચ્છે (સ્યા. પી. ક.)] પયિરુપાસિતું.

૧૦૦૪. ‘‘યતો ચ ખો [યતા ખો (પી. ક.)] પરિનિબ્બુતો, સત્થા તુમ્હાક મારિસ;

નિબ્બુતમ્પિ [પરિનિબ્બુતં (સ્યા. ક.)] મહાવીરં, ગચ્છામિ સરણં અહં.

૧૦૦૫. ‘‘ઉપેમિ સરણં બુદ્ધં, ધમ્મઞ્ચાપિ અનુત્તરં;

સઙ્ઘઞ્ચ નરદેવસ્સ, ગચ્છામિ સરણં અહં.

૧૦૦૬. ‘‘પાણાતિપાતા વિરમામિ ખિપ્પં, લોકે અદિન્નં પરિવજ્જયામિ;

અમજ્જપો નો ચ મુસા ભણામિ, સકેન દારેન ચ હોમિ તુટ્ઠો’’તિ.

૧૦૦૭. ‘‘સહસ્સરંસીવ યથા મહપ્પભો, દિસં યથા ભાતિ નભે અનુક્કમં;

તથાપકારો [તથપ્પકારો (સી. સ્યા.)] તવાયં [તવયં (સી. પી.)] મહારથો, સમન્તતો યોજનસત્તમાયતો.

૧૦૦૮. ‘‘સુવણ્ણપટ્ટેહિ સમન્તમોત્થટો, ઉરસ્સ મુત્તાહિ મણીહિ ચિત્તિતો;

લેખા સુવણ્ણસ્સ ચ રૂપિયસ્સ ચ, સોભેન્તિ વેળુરિયમયા સુનિમ્મિતા.

૧૦૦૯. ‘‘સીસઞ્ચિદં વેળુરિયસ્સ નિમ્મિતં, યુગઞ્ચિદં લોહિતકાય ચિત્તિતં;

યુત્તા સુવણ્ણસ્સ ચ રૂપિયસ્સ ચ, સોભન્તિ અસ્સા ચ ઇમે મનોજવા.

૧૦૧૦. ‘‘સો તિટ્ઠસિ હેમરથે અધિટ્ઠિતો, દેવાનમિન્દોવ સહસ્સવાહનો;

પુચ્છામિ તાહં યસવન્ત કોવિદં [કોવિદ (ક.)], કથં તયા લદ્ધો અયં ઉળારો’’તિ.

૧૦૧૧. ‘‘સુજાતો નામહં ભન્તે, રાજપુત્તો પુરે અહું;

ત્વઞ્ચ મં અનુકમ્પાય, સઞ્ઞમસ્મિં નિવેસયિ.

૧૦૧૨. ‘‘ખીણાયુકઞ્ચ મં ઞત્વા, સરીરં પાદાસિ સત્થુનો;

ઇમં સુજાત પૂજેહિ, તં તે અત્થાય હેહિતિ.

૧૦૧૩. ‘‘તાહં ગન્ધેહિ માલેહિ, પૂજયિત્વા સમુય્યુતો;

પહાય માનુસં દેહં, ઉપપન્નોમ્હિ નન્દનં.

૧૦૧૪. ‘‘નન્દને ચ વને [નન્દનોપવને (સી.), નન્દને પવને (સ્યા. ક.)] રમ્મે, નાનાદિજગણાયુતે;

રમામિ નચ્ચગીતેહિ, અચ્છરાહિ પુરક્ખતો’’તિ.

ચૂળરથવિમાનં તેરસમં.