૩. આચામદાયિકાવિમાનવત્થુ

૧૮૫. ‘‘પિણ્ડાય તે ચરન્તસ્સ, તુણ્હીભૂતસ્સ તિટ્ઠતો;

દલિદ્દા કપણા નારી, પરાગારં અપસ્સિતા [અવસ્સિતા (સી.)].

૧૮૬. ‘‘યા તે અદાસિ આચામં, પસન્ના સેહિ પાણિભિ;

સા હિત્વા માનુસં દેહં, કં નુ સા દિસતં ગતા’’તિ.

૧૮૭. ‘‘પિણ્ડાય મે ચરન્તસ્સ, તુણ્હીભૂતસ્સ તિટ્ઠતો;

દલિદ્દા કપણા નારી, પરાગારં અપસ્સિતા.

૧૮૮. ‘‘યા મે અદાસિ આચામં, પસન્ના સેહિ પાણિભિ;

સા હિત્વા માનુસં દેહં, વિપ્પમુત્તા ઇતો ચુતા.

૧૮૯. ‘‘નિમ્માનરતિનો નામ, સન્તિ દેવા મહિદ્ધિકા;

તત્થ સા સુખિતા નારી, મોદતાચામદાયિકા’’તિ.

૧૯૦. ‘‘અહો દાનં વરાકિયા, કસ્સપે સુપ્પતિટ્ઠિતં;

પરાભતેન દાનેન, ઇજ્ઝિત્થ વત દક્ખિણા.

૧૯૧. ‘‘યા મહેસિત્તં કારેય્ય, ચક્કવત્તિસ્સ રાજિનો;

નારી સબ્બઙ્ગકલ્યાણી, ભત્તુ ચાનોમદસ્સિકા;

એતસ્સાચામદાનસ્સ, કલં નાગ્ઘતિ સોળસિં.

૧૯૨. ‘‘સતં નિક્ખા સતં અસ્સા, સતં અસ્સતરીરથા;

સતં કઞ્ઞાસહસ્સાનિ, આમુત્તમણિકુણ્ડલા;

એતસ્સાચામદાનસ્સ, કલં નાગ્ઘન્તિ સોળસિં.

૧૯૩. ‘‘સતં હેમવતા નાગા, ઈસાદન્તા ઉરૂળ્હવા;

સુવણ્ણકચ્છા માતઙ્ગા, હેમકપ્પનવાસસા [હેમકપ્પનિવાસસા (સ્યા. ક.)];

એતસ્સાચામદાનસ્સ, કલં નાગ્ઘતિ સોળસિં.

૧૯૪. ‘‘ચતુન્નમપિ દીપાનં, ઇસ્સરં યોધ કારયે;

એતસ્સાચામદાનસ્સ, કલં નાગ્ઘતિ સોળસિ’’ન્તિ.

આચામદાયિકાવિમાનં તતિયં.