૪. ચણ્ડાલિવિમાનવત્થુ

૧૯૫. ‘‘ચણ્ડાલિ વન્દ પાદાનિ, ગોતમસ્સ યસસ્સિનો;

તમેવ [તવેવ (સી.)] અનુકમ્પાય, અટ્ઠાસિ ઇસિસત્તમો [ઇસિસુત્તમો (સી.)].

૧૯૬. ‘‘અભિપ્પસાદેહિ મનં, અરહન્તમ્હિ તાદિનિ [તાદિને (સ્યા. ક.)];

ખિપ્પં પઞ્જલિકા વન્દ, પરિત્તં તવ જીવિત’’ન્તિ.

૧૯૭. ચોદિતા ભાવિતત્તેન, સરીરન્તિમધારિના;

ચણ્ડાલી વન્દિ પાદાનિ, ગોતમસ્સ યસસ્સિનો.

૧૯૮. તમેનં અવધી ગાવી, ચણ્ડાલિં પઞ્જલિં ઠિતં;

નમસ્સમાનં સમ્બુદ્ધં, અન્ધકારે પભઙ્કરન્તિ.

૧૯૯. ‘‘ખીણાસવં વિગતરજં અનેજં, એકં અરઞ્ઞમ્હિ રહો નિસિન્નં;

દેવિદ્ધિપત્તા ઉપસઙ્કમિત્વા, વન્દામિ તં વીર મહાનુભાવ’’ન્તિ.

૨૦૦. ‘‘સુવણ્ણવણ્ણા જલિતા મહાયસા, વિમાનમોરુય્હ અનેકચિત્તા;

પરિવારિતા અચ્છરાસઙ્ગણેન [અચ્છરાનં ગણેન (સી.)], કા ત્વં સુભે દેવતે વન્દસે મમ’’ન્તિ.

૨૦૧. ‘‘અહં ભદ્દન્તે ચણ્ડાલી, તયા વીરેન [થેરેન (ક.)] પેસિતા;

વન્દિં અરહતો પાદે, ગોતમસ્સ યસસ્સિનો.

૨૦૨. ‘‘સાહં વન્દિત્વા [વન્દિત્વ (સી.)] પાદાનિ, ચુતા ચણ્ડાલયોનિયા;

વિમાનં સબ્બતો ભદ્દં, ઉપપન્નમ્હિ નન્દને.

૨૦૩. ‘‘અચ્છરાનં સતસહસ્સં, પુરક્ખત્વાન [પુરક્ખિત્વા મં (સ્યા. ક.)] તિટ્ઠતિ;

તાસાહં પવરા સેટ્ઠા, વણ્ણેન યસસાયુના.

૨૦૪. ‘‘પહૂતકતકલ્યાણા, સમ્પજાના પટિસ્સતા [પતિસ્સતા (સી. સ્યા.)];

મુનિં કારુણિકં લોકે, તં ભન્તે વન્દિતુમાગતા’’તિ.

૨૦૫. ઇદં વત્વાન ચણ્ડાલી, કતઞ્ઞૂ કતવેદિની;

વન્દિત્વા અરહતો પાદે, તત્થેવન્તરધાયથાતિ [તત્થેવન્તરધાયતીતિ (સ્યા. ક.)].

ચણ્ડાલિવિમાનં ચતુત્થં.