૨. વિમલાથેરીગાથા

૭૨. ‘‘મત્તા વણ્ણેન રૂપેન, સોભગ્ગેન યસેન ચ;

યોબ્બનેન ચુપત્થદ્ધા, અઞ્ઞાસમતિમઞ્ઞિહં.

૭૩. ‘‘વિભૂસેત્વા ઇમં કાયં, સુચિત્તં બાલલાપનં;

અટ્ઠાસિં વેસિદ્વારમ્હિ, લુદ્દો પાસમિવોડ્ડિય.

૭૪. ‘‘પિલન્ધનં વિદંસેન્તી, ગુય્હં પકાસિકં બહું;

અકાસિં વિવિધં માયં, ઉજ્જગ્ઘન્તી બહું જનં.

૭૫. ‘‘સાજ્જ પિણ્ડં ચરિત્વાન, મુણ્ડા સઙ્ઘાટિપારુતા;

નિસિન્ના રુક્ખમૂલમ્હિ, અવિતક્કસ્સ લાભિની.

૭૬. ‘‘સબ્બે યોગા સમુચ્છિન્ના, યે દિબ્બા યે ચ માનુસા;

ખેપેત્વા આસવે સબ્બે, સીતિભૂતામ્હિ નિબ્બુતા’’તિ.

… વિમલા પુરાણગણિકા થેરી….