૧. સુભાજીવકમ્બવનિકાથેરીગાથા

૩૬૮. જીવકમ્બવનં રમ્મં, ગચ્છન્તિં ભિક્ખુનિં સુભં;

ધુત્તકો સન્નિવારેસિ [તં નિવારેસિ (ક.)], તમેનં અબ્રવી સુભા.

૩૬૯. ‘‘કિં તે અપરાધિતં મયા, યં મં ઓવરિયાન તિટ્ઠસિ;

ન હિ પબ્બજિતાય આવુસો, પુરિસો સમ્ફુસનાય કપ્પતિ.

૩૭૦. ‘‘ગરુકે મમ સત્થુસાસને, યા સિક્ખા સુગતેન દેસિતા;

પરિસુદ્ધપદં અનઙ્ગણં, કિં મં ઓવરિયાન તિટ્ઠસિ.

૩૭૧. ‘‘આવિલચિત્તો અનાવિલં, સરજો વીતરજં અનઙ્ગણં;

સબ્બત્થ વિમુત્તમાનસં, કિં મં ઓવરિયાન તિટ્ઠસિ’’.

૩૭૨. ‘‘દહરા ચ અપાપિકા ચસિ, કિં તે પબ્બજ્જા કરિસ્સતિ;

નિક્ખિપ કાસાયચીવરં, એહિ રમામ સુપુપ્ફિતે [રમામસે પુપ્ફિતે (સી. સ્યા.)] વને.

૩૭૩. ‘‘મધુરઞ્ચ પવન્તિ સબ્બસો, કુસુમરજેન સમુટ્ઠિતા દુમા;

પઠમવસન્તો સુખો ઉતુ, એહિ રમામ સુપુપ્ફિતે વને.

૩૭૪. ‘‘કુસુમિતસિખરા ચ પાદપા, અભિગજ્જન્તિવ માલુતેરિતા;

કા તુય્હં રતિ ભવિસ્સતિ, યદિ એકા વનમોગહિસ્સસિ [વનમોતરિસ્સસિ (સી.), વનમોગાહિસ્સસિ (સ્યા. ક.)].

૩૭૫. ‘‘વાળમિગસઙ્ઘસેવિતં, કુઞ્જરમત્તકરેણુલોળિતં;

અસહાયિકા ગન્તુમિચ્છસિ, રહિતં ભિંસનકં મહાવનં.

૩૭૬. ‘‘તપનીયકતાવ ધીતિકા, વિચરસિ ચિત્તલતેવ અચ્છરા;

કાસિકસુખુમેહિ વગ્ગુભિ, સોભસી સુવસનેહિ નૂપમે.

૩૭૭. ‘‘અહં તવ વસાનુગો સિયં, યદિ વિહરેમસે [યદિપિ વિહરેસિ (ક.)] કાનનન્તરે;

ન હિ મત્થિ તયા પિયત્તરો, પાણો કિન્નરિમન્દલોચને.

૩૭૮. ‘‘યદિ મે વચનં કરિસ્સસિ, સુખિતા એહિ અગારમાવસ;

પાસાદનિવાતવાસિની, પરિકમ્મં તે કરોન્તુ નારિયો.

૩૭૯. ‘‘કાસિકસુખુમાનિ ધારય, અભિરોપેહિ [અભિરોહેહિ (સી.)] ચ માલવણ્ણકં;

કઞ્ચનમણિમુત્તકં બહું, વિવિધં આભરણં કરોમિ તે.

૩૮૦. ‘‘સુધોતરજપચ્છદં સુભં, ગોણકતૂલિકસન્થતં નવં;

અભિરુહ સયનં મહારહં, ચન્દનમણ્ડિતસારગન્ધિકં;

૩૮૧. ‘‘ઉપ્પલં ચુદકા સમુગ્ગતં, યથા તં અમનુસ્સસેવિતં;

એવં ત્વં બ્રહ્મચારિની, સકેસઙ્ગેસુ જરં ગમિસ્સસિ’’.

૩૮૨. ‘‘કિં તે ઇધ સારસમ્મતં, કુણપપૂરમ્હિ સુસાનવડ્ઢને;

ભેદનધમ્મે કળેવરે [કલેવરે (સી. ક.)], યં દિસ્વા વિમનો ઉદિક્ખસિ’’.

૩૮૩. ‘‘અક્ખીનિ ચ તુરિયારિવ, કિન્નરિયારિવ પબ્બતન્તરે;

તવ મે નયનાનિ દક્ખિય, ભિય્યો કામરતી પવડ્ઢતિ.

૩૮૪. ‘‘ઉપ્પલસિખરોપમાનિ તે, વિમલે હાટકસન્નિભે મુખે;

તવ મે નયનાનિ દક્ખિય [નયનાનુદિક્ખિય (સી.)], ભિય્યો કામગુણો પવડ્ઢતિ.

૩૮૫. ‘‘અપિ દૂરગતા સરમ્હસે, આયતપમ્હે વિસુદ્ધદસ્સને;

ન હિ મત્થિ તયા પિયત્તરા, નયના કિન્નરિમન્દલોચને’’.

૩૮૬. ‘‘અપથેન પયાતુમિચ્છસિ, ચન્દં કીળનકં ગવેસસિ;

મેરું લઙ્ઘેતુમિચ્છસિ, યો ત્વં બુદ્ધસુતં મગ્ગયસિ.

૩૮૭. ‘‘નત્થિ હિ લોકે સદેવકે, રાગો યત્થપિ દાનિ મે સિયા;

નપિ નં જાનામિ કીરિસો, અથ મગ્ગેન હતો સમૂલકો.

૩૮૮. ‘‘ઇઙ્ગાલકુયાવ [ઇઙ્ઘાળખુયાવ (સ્યા.)] ઉજ્ઝિતો, વિસપત્તોરિવ અગ્ગિતો કતો [અગ્ઘતો હતો (સી.)];

નપિ નં પસ્સામિ કીરિસો, અથ મગ્ગેન હતો સમૂલકો.

૩૮૯. ‘‘યસ્સા સિયા અપચ્ચવેક્ખિતં, સત્થા વા અનુપાસિતો સિયા;

ત્વં તાદિસિકં પલોભય, જાનન્તિં સો ઇમં વિહઞ્ઞસિ.

૩૯૦. ‘‘મય્હઞ્હિ અક્કુટ્ઠવન્દિતે, સુખદુક્ખે ચ સતી ઉપટ્ઠિતા;

સઙ્ખતમસુભન્તિ જાનિય, સબ્બત્થેવ મનો ન લિમ્પતિ.

૩૯૧. ‘‘સાહં સુગતસ્સ સાવિકા, મગ્ગટ્ઠઙ્ગિકયાનયાયિની;

ઉદ્ધટસલ્લા અનાસવા, સુઞ્ઞાગારગતા રમામહં.

૩૯૨. ‘‘દિટ્ઠા હિ મયા સુચિત્તિતા, સોમ્ભા દારુકપિલ્લકાનિ વા;

તન્તીહિ ચ ખીલકેહિ ચ, વિનિબદ્ધા વિવિધં પનચ્ચકા.

૩૯૩. ‘‘તમ્હુદ્ધટે તન્તિખીલકે, વિસ્સટ્ઠે વિકલે પરિક્રિતે [પરિપક્ખીતે (સી.), પરિપક્કતે (સ્યા.)];

ન વિન્દેય્ય ખણ્ડસો કતે, કિમ્હિ તત્થ મનં નિવેસયે.

૩૯૪. ‘‘તથૂપમા દેહકાનિ મં, તેહિ ધમ્મેહિ વિના ન વત્તન્તિ;

ધમ્મેહિ વિના ન વત્તતિ, કિમ્હિ તત્થ મનં નિવેસયે.

૩૯૫. ‘‘યથા હરિતાલેન મક્ખિતં, અદ્દસ ચિત્તિકં ભિત્તિયા કતં;

તમ્હિ તે વિપરીતદસ્સનં, સઞ્ઞા માનુસિકા નિરત્થિકા.

૩૯૬. ‘‘માયં વિય અગ્ગતો કતં, સુપિનન્તેવ સુવણ્ણપાદપં;

ઉપગચ્છસિ અન્ધ રિત્તકં, જનમજ્ઝેરિવ રુપ્પરૂપકં [રૂપરૂપકં (ક.)].

૩૯૭. ‘‘વટ્ટનિરિવ કોટરોહિતા, મજ્ઝે પુબ્બુળકા સઅસ્સુકા;

પીળકોળિકા ચેત્થ જાયતિ, વિવિધા ચક્ખુવિધા ચ પિણ્ડિતા’’.

૩૯૮. ઉપ્પાટિય ચારુદસ્સના, ન ચ પજ્જિત્થ અસઙ્ગમાનસા;

‘‘હન્દ તે ચક્ખું હરસ્સુ તં’’, તસ્સ નરસ્સ અદાસિ તાવદે.

૩૯૯. તસ્સ ચ વિરમાસિ તાવદે, રાગો તત્થ ખમાપયી ચ નં;

‘‘સોત્થિ સિયા બ્રહ્મચારિની, ન પુનો એદિસકં ભવિસ્સતિ’’.

૪૦૦. ‘‘આસાદિય [આહનિય (સ્યા. ક.)] એદિસં જનં, અગ્ગિં પજ્જલિતં વ લિઙ્ગિય;

ગણ્હિય આસીવિસં વિય, અપિ નુ સોત્થિ સિયા ખમેહિ નો’’.

૪૦૧. મુત્તા ચ તતો સા ભિક્ખુની, અગમી બુદ્ધવરસ્સ સન્તિકં;

પસ્સિય વરપુઞ્ઞલક્ખણં, ચક્ખુ આસિ યથા પુરાણકન્તિ.

… સુભા જીવકમ્બવનિકા થેરી….

તિંસનિપાતો નિટ્ઠિતો.