૫. સુભાકમ્મારધીતુથેરીગાથા

૩૩૯. ‘‘દહરાહં સુદ્ધવસના, યં પુરે ધમ્મમસ્સુણિં;

તસ્સા મે અપ્પમત્તાય, સચ્ચાભિસમયો અહુ.

૩૪૦. ‘‘તતોહં સબ્બકામેસુ, ભુસં અરતિમજ્ઝગં;

સક્કાયસ્મિં ભયં દિસ્વા, નેક્ખમ્મમેવ [નેક્ખમ્મઞ્ઞેવ (સી.), નેક્ખમ્મસ્સેવ (સ્યા.)] પીહયે.

૩૪૧. ‘‘હિત્વાનહં ઞાતિગણં, દાસકમ્મકરાનિ ચ;

ગામખેત્તાનિ ફીતાનિ, રમણીયે પમોદિતે.

૩૪૨. ‘‘પહાયહં પબ્બજિતા, સાપતેય્યમનપ્પકં;

એવં સદ્ધાય નિક્ખમ્મ, સદ્ધમ્મે સુપ્પવેદિતે.

૩૪૩. ‘‘નેતં [ન મેતં (સી. સ્યા.)] અસ્સ પતિરૂપં, આકિઞ્ચઞ્ઞઞ્હિ પત્થયે;

યો [યા (સ્યા.)] જાતરૂપં રજતં, છડ્ડેત્વા [થપેત્વા (ક.)] પુનરાગમે [પુનરાગહે (ક.)].

૩૪૪. ‘‘રજતં જાતરૂપં વા, ન બોધાય ન સન્તિયા;

નેતં સમણસારુપ્પં, ન એતં અરિયદ્ધનં.

૩૪૫. ‘‘લોભનં મદનઞ્ચેતં, મોહનં રજવડ્ઢનં;

સાસઙ્કં બહુઆયાસં, નત્થિ ચેત્થ ધુવં ઠિતિ.

૩૪૬. ‘‘એત્થ રત્તા પમત્તા ચ, સઙ્કિલિટ્ઠમના નરા;

અઞ્ઞમઞ્ઞેન બ્યારુદ્ધા, પુથુ કુબ્બન્તિ મેધગં.

૩૪૭. ‘‘વધો બન્ધો પરિક્લેસો, જાનિ સોકપરિદ્દવો;

કામેસુ અધિપન્નાનં, દિસ્સતે બ્યસનં બહું.

૩૪૮. ‘‘તં મં ઞાતી અમિત્તાવ, કિં વો કામેસુ યુઞ્જથ;

જાનાથ મં પબ્બજિતં, કામેસુ ભયદસ્સિનિં.

૩૪૯. ‘‘ન હિરઞ્ઞસુવણ્ણેન, પરિક્ખીયન્તિ આસવા;

અમિત્તા વધકા કામા, સપત્તા સલ્લબન્ધના.

૩૫૦. ‘‘તં મં ઞાતી અમિત્તાવ, કિં વો કામેસુ યુઞ્જથ;

જાનાથ મં પબ્બજિતં, મુણ્ડં સઙ્ઘાટિપારુતં.

૩૫૧. ‘‘ઉત્તિટ્ઠપિણ્ડો ઉઞ્છો ચ, પંસુકૂલઞ્ચ ચીવરં;

એતં ખો મમ સારુપ્પં, અનગારૂપનિસ્સયો.

૩૫૨. ‘‘વન્તા મહેસીહિ કામા, યે દિબ્બા યે ચ માનુસા;

ખેમટ્ઠાને વિમુત્તા તે, પત્તા તે અચલં સુખં.

૩૫૩. ‘‘માહં કામેહિ સઙ્ગચ્છિં, યેસુ તાણં ન વિજ્જતિ;

અમિત્તા વધકા કામા, અગ્ગિક્ખન્ધૂપમા દુખા.

૩૫૪. ‘‘પરિપન્થો એસ ભયો, સવિઘાતો સકણ્ટકો;

ગેધો સુવિસમો ચેસો [લેપો (સી.)], મહન્તો મોહનામુખો.

૩૫૫. ‘‘ઉપસગ્ગો ભીમરૂપો, કામા સપ્પસિરૂપમા;

યે બાલા અભિનન્દન્તિ, અન્ધભૂતા પુથુજ્જના.

૩૫૬. ‘‘કામપઙ્કેન સત્તા હિ, બહૂ લોકે અવિદ્દસૂ;

પરિયન્તં ન જાનન્તિ, જાતિયા મરણસ્સ ચ.

૩૫૭. ‘‘દુગ્ગતિગમનં મગ્ગં, મનુસ્સા કામહેતુકં;

બહું વે પટિપજ્જન્તિ, અત્તનો રોગમાવહં.

૩૫૮. ‘‘એવં અમિત્તજનના, તાપના સંકિલેસિકા;

લોકામિસા બન્ધનીયા, કામા મરણબન્ધના [ચરણબન્ધના (સી.)].

૩૫૯. ‘‘ઉમ્માદના ઉલ્લપના, કામા ચિત્તપ્પમદ્દિનો;

સત્તાનં સઙ્કિલેસાય, ખિપ્પં [ખિપં (સી.)] મારેન ઓડ્ડિતં.

૩૬૦. ‘‘અનન્તાદીનવા કામા, બહુદુક્ખા મહાવિસા;

અપ્પસ્સાદા રણકરા, સુક્કપક્ખવિસોસના [વિસોસકા (સી.)].

૩૬૧. ‘‘સાહં એતાદિસં કત્વા, બ્યસનં કામહેતુકં;

ન તં પચ્ચાગમિસ્સામિ, નિબ્બાનાભિરતા સદા.

૩૬૨. ‘‘રણં કરિત્વા [તરિત્વા (સી.)] કામાનં, સીતિભાવાભિકઙ્ખિની;

અપ્પમત્તા વિહસ્સામિ, સબ્બસંયોજનક્ખયે.

૩૬૩. ‘‘અસોકં વિરજં ખેમં, અરિયટ્ઠઙ્ગિકં ઉજું;

તં મગ્ગં અનુગચ્છામિ, યેન તિણ્ણા મહેસિનો’’.

૩૬૪. ઇમં પસ્સથ ધમ્મટ્ઠં, સુભં કમ્મારધીતરં;

અનેજં ઉપસમ્પજ્જ, રુક્ખમૂલમ્હિ ઝાયતિ.

૩૬૫. અજ્જટ્ઠમી પબ્બજિતા, સદ્ધા સદ્ધમ્મસોભના;

વિનીતુપ્પલવણ્ણાય, તેવિજ્જા મચ્ચુહાયિની.

૩૬૬. સાયં ભુજિસ્સા અનણા, ભિક્ખુની ભાવિતિન્દ્રિયા;

સબ્બયોગવિસંયુત્તા, કતકિચ્ચા અનાસવા.

૩૬૭. તં સક્કો દેવસઙ્ઘેન, ઉપસઙ્કમ્મ ઇદ્ધિયા;

નમસ્સતિ ભૂતપતિ, સુભં કમ્મારધીતરન્તિ.

… સુભા કમ્મારધીતા થેરી….

વીસતિનિપાતો નિટ્ઠિતો.