૯. અમ્બપાલિથેરીઅપદાનં

૨૦૪. ‘‘યો રંસિફુસિતાવેળો, ફુસ્સો નામ મહામુનિ;

તસ્સાહં ભગિની આસિં, અજાયિં ખત્તિયે કુલે.

૨૦૫. ‘‘તસ્સ ધમ્મં સુણિત્વાહં, વિપ્પસન્નેન ચેતસા;

મહાદાનં દદિત્વાન, પત્થયિં રૂપસમ્પદં.

૨૦૬. ‘‘એકતિંસે ઇતો કપ્પે, સિખી લોકગ્ગનાયકો;

ઉપ્પન્નો લોકપજ્જોતો, તિલોકસરણો જિનો.

૨૦૭. ‘‘તદારુણપુરે રમ્મે, બ્રાહ્મઞ્ઞકુલસમ્ભવા;

વિમુત્તચિત્તં કુપિતા, ભિક્ખુનિં અભિસાપયિં.

૨૦૮. ‘‘વેસિકાવ અનાચારા, જિનસાસનદૂસિકા;

એવં અક્કોસયિત્વાન, તેન પાપેન કમ્મુના.

૨૦૯. ‘‘દારુણં નિરયં ગન્ત્વા, મહાદુક્ખસમપ્પિતા;

તતો ચુતા મનુસ્સેસુ, ઉપપન્ના તપસ્સિની.

૨૧૦. ‘‘દસજાતિસહસ્સાનિ, ગણિકત્તમકારયિં;

તમ્હા પાપા ન મુચ્ચિસ્સં, ભુત્વા દુટ્ઠવિસં યથા.

૨૧૧. ‘‘બ્રહ્મચરિયમસેવિસ્સં [બ્રહ્મવેસમસેવિસ્સં (સ્યા.), બ્રહ્મચેરમસેવિસ્સં (પી.)], કસ્સપે જિનસાસને;

તેન કમ્મવિપાકેન, અજાયિં તિદસે પુરે.

૨૧૨. ‘‘પચ્છિમે ભવે સમ્પત્તે, અહોસિં ઓપપાતિકા;

અમ્બસાખન્તરે જાતા, અમ્બપાલીતિ તેનહં.

૨૧૩. ‘‘પરિવુતા પાણકોટીહિ, પબ્બજિં જિનસાસને;

પત્તાહં અચલં ઠાનં, ધીતા બુદ્ધસ્સ ઓરસા.

૨૧૪. ‘‘ઇદ્ધીસુ ચ વસી હોમિ, સોતધાતુવિસુદ્ધિયા;

ચેતોપરિયઞાણસ્સ, વસી હોમિ મહામુને.

૨૧૫. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૨૧૬. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મે વિમલં સુદ્ધં, બુદ્ધસેટ્ઠસ્સ વાહસા.

૨૧૭. ‘‘કિલેસા ઝાપિતા મય્હં…પે… વિહરામિ અનાસવા.

૨૧૮. ‘‘સ્વાગતં વત મે આસિ…પે… કતં બુદ્ધસ્સ સાસનં.

૨૧૯. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં અમ્બપાલિ ભિક્ખુની ઇમા ગાથાયો

અભાસિત્થાતિ.

અમ્બપાલિથેરિયાપદાનં નવમં.