૧૦. પેસલાથેરીઅપદાનં

૨૨૦. ‘‘ઇમમ્હિ ભદ્દકે કપ્પે, બ્રહ્મબન્ધુ મહાયસો;

કસ્સપો નામ ગોત્તેન, ઉપ્પજ્જિ વદતં વરો.

૨૨૧. ‘‘સાવત્થિયં પુરે વરે, ઉપાસકકુલે અહં;

પસૂતા તં [નં (સ્યા.)] જિનવરં, દિસ્વા સુત્વા ચ દેસનં.

૨૨૨. ‘‘તં વીરં સરણં ગન્ત્વા, સીલાનિ ચ સમાદિયિં;

કદાચિ સો મહાવીરો, મહાજનસમાગમે.

૨૨૩. ‘‘અત્તનો અભિસમ્બોધિં, પકાસેસિ નરાસભો;

અનનુસ્સુતધમ્મેસુ, પુબ્બે દુક્ખાદિકેસુ ચ.

૨૨૪. ‘‘ચક્ખુ ઞાણઞ્ચ પઞ્ઞા ચ, વિજ્જાલોકો ચ આસિ મે;

તં સુત્વા ઉગ્ગહેત્વાન, પરિપુચ્છિઞ્ચ ભિક્ખવો.

૨૨૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૨૨૬. ‘‘પચ્છિમે ચ ભવે દાનિ, જાતા સેટ્ઠિમહાકુલે;

ઉપેચ્ચ બુદ્ધં સદ્ધમ્મં, સુત્વા સચ્ચૂપસંહિતં.

૨૨૭. ‘‘પબ્બજિત્વાચિરેનેવ, સચ્ચત્થાનિ [સબ્બત્થાનિ (સ્યા. ક.)] વિચિન્તયં;

ખેપેત્વા આસવે સબ્બે, અરહત્તમપાપુણિં.

૨૨૮. ‘‘ઇદ્ધીસુ ચ વસી હોમિ, દિબ્બાય સોતધાતુયા;

ચેતોપરિયઞાણસ્સ, વસી હોમિ મહામુને.

૨૨૯. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૨૩૦. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મે વિમલં સુદ્ધં, બુદ્ધસેટ્ઠસ્સ વાહસા.

૨૩૧. ‘‘કિલેસા ઝાપિતા મય્હં, ભવા સબ્બે સમૂહતા;

નાગીવ બન્ધનં છેત્વા, વિહરામિ અનાસવા.

૨૩૨. ‘‘સ્વાગતં વત મે આસિ, મમ બુદ્ધસ્સ સન્તિકે;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૨૩૩. ‘‘પટિસમ્ભિદા ચતસ્સો, વિમોક્ખાપિ ચ અટ્ઠિમે;

છળભિઞ્ઞા સચ્છિકતા, કતં બુદ્ધસ્સ સાસનં’’.

ઇત્થં સુદં પેસલા [સેલા (સ્યા. પી.)] ભિક્ખુની ઇમા ગાથાયો અભાસિત્થાતિ.

પેસલાથેરિયાપદાનં દસમં.

ખત્તિયાવગ્ગો ચતુત્થો.