૫. સુક્કાથેરીઅપદાનં

૧૧૧. ‘‘એકનવુતિતો કપ્પે, વિપસ્સી નામ નાયકો;

ઉપ્પજ્જિ ચારુદસ્સનો, સબ્બધમ્મવિપસ્સકો.

૧૧૨. ‘‘તદાહં બન્ધુમતિયં, જાતા અઞ્ઞતરે કુલે;

ધમ્મં સુત્વાન મુનિનો, પબ્બજિં અનગારિયં.

૧૧૩. ‘‘બહુસ્સુતા ધમ્મધરા, પટિભાનવતી તથા;

વિચિત્તકથિકા ચાપિ, જિનસાસનકારિકા.

૧૧૪. ‘‘તદા ધમ્મકથં કત્વા, હિતાય જનતં બહું [જનતાય હિતં બહું (સી.) … સદા (સ્યા.), હિતાય જનસંસરિં (પી.)];

તતો ચુતાહં તુસિતં, ઉપપન્ના યસસ્સિની.

૧૧૫. ‘‘એકતિંસે ઇતો કપ્પે, સિખી વિય સિખી જિનો;

તપન્તો યસસા લોકે [લોકં (સ્યા. પી.)], ઉપ્પજ્જિ વદતં વરો.

૧૧૬. ‘‘તદાપિ પબ્બજિત્વાન, બુદ્ધસાસનકોવિદા;

જોતેત્વા જિનવાક્યાનિ, તતોપિ તિદિવં ગતા.

૧૧૭. ‘‘એકતિંસેવ કપ્પમ્હિ, વેસ્સભૂ નામ નાયકો;

ઉપ્પજ્જિત્થ મહાઞાણી, તદાપિ ચ તથેવહં.

૧૧૮. ‘‘પબ્બજિત્વા ધમ્મધરા, જોતયિં જિનસાસનં;

ગન્ત્વા મરુપુરં રમ્મં, અનુભોસિં મહાસુખં.

૧૧૯. ‘‘ઇમમ્હિ ભદ્દકે કપ્પે, કકુસન્ધો જિનુત્તમો;

ઉપ્પજ્જિ નરસરણો [નરસદ્દૂલો (સી. સ્યા. પી.)], તદાપિ ચ તથેવહં.

૧૨૦. ‘‘પબ્બજિત્વા મુનિમતં, જોતયિત્વા યથાયુકં;

તતો ચુતાહં તિદિવં, અગં સભવનં યથા.

૧૨૧. ‘‘ઇમસ્મિંયેવ કપ્પમ્હિ, કોણાગમનનાયકો;

ઉપ્પજ્જિ લોકસરણો, અરણો અમતઙ્ગતો [વદતં વરો, સબ્બસત્તાનમુત્તમો (સ્યા.)].

૧૨૨. ‘‘તદાપિ પબ્બજિત્વાન, સાસને તસ્સ તાદિનો;

બહુસ્સુતા ધમ્મધરા, જોતયિં જિનસાસનં.

૧૨૩. ‘‘ઇમસ્મિંયેવ કપ્પમ્હિ, કસ્સપો મુનિમુત્તમો;

ઉપ્પજ્જિ લોકસરણો, અરણો મરણન્તગૂ.

૧૨૪. ‘‘તસ્સાપિ નરવીરસ્સ, પબ્બજિત્વાન સાસને;

પરિયાપુટસદ્ધમ્મા, પરિપુચ્છાવિસારદા.

૧૨૫. ‘‘સુસીલા લજ્જિની ચેવ, તીસુ સિક્ખાસુ કોવિદા;

બહું ધમ્મકથં કત્વા, યાવજીવં મહામુને.

૧૨૬. ‘‘તેન કમ્મવિપાકેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૧૨૭. ‘‘પચ્છિમે ચ ભવે દાનિ, ગિરિબ્બજપુરુત્તમે;

જાતા સેટ્ઠિકુલે ફીતે, મહારતનસઞ્ચયે.

૧૨૮. ‘‘યદા ભિક્ખુસહસ્સેન, પરિવુતો લોકનાયકો;

ઉપાગમિ રાજગહં, સહસ્સક્ખેન વણ્ણિતો.

૧૨૯. ‘‘‘દન્તો દન્તેહિ સહ પુરાણજટિલેહિ, વિપ્પમુત્તો વિપ્પમુત્તેહિ;

સિઙ્ગીનિક્ખસવણ્ણો, રાજગહં પાવિસિ ભગવા’.

૧૩૦. ‘‘દિસ્વા બુદ્ધાનુભાવં તં, સુત્વાવ ગુણસઞ્ચયં;

બુદ્ધે ચિત્તં પસાદેત્વા, પૂજયિં તં યથાબલં.

૧૩૧. ‘‘અપરેન ચ કાલેન, ધમ્મદિન્નાય સન્તિકે;

અગારા નિક્ખમિત્વાન, પબ્બજિં અનગારિયં.

૧૩૨. ‘‘કેસેસુ છિજ્જમાનેસુ, કિલેસે ઝાપયિં અહં;

ઉગ્ગહિં સાસનં સબ્બં, પબ્બજિત્વાચિરેનહં.

૧૩૩. ‘‘તતો ધમ્મમદેસેસિં, મહાજનસમાગમે;

ધમ્મે દેસિયમાનમ્હિ, ધમ્માભિસમયો અહુ.

૧૩૪. ‘‘નેકપાણસહસ્સાનં, તં વિદિત્વાતિવિમ્હિતો;

અભિપ્પસન્નો મે યક્ખો, ભમિત્વાન ગિરિબ્બજં.

૧૩૫. ‘‘કિં મે કતા રાજગહે મનુસ્સા, મધું પીતાવ અચ્છરે;

યે સુક્કં ન ઉપાસન્તિ, દેસેન્તિં અમતં પદં.

૧૩૬. ‘‘તઞ્ચ અપ્પટિવાનીયં, અસેચનકમોજવં;

પિવન્તિ મઞ્ઞે સપ્પઞ્ઞા, વલાહકમિવદ્ધગૂ.

૧૩૭. ‘‘ઇદ્ધીસુ ચ વસી હોમિ, દિબ્બાય સોતધાતુયા;

ચેતોપરિયઞાણસ્સ, વસી હોમિ મહામુને.

૧૩૮. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૧૩૯. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મમ મહાવીર, ઉપ્પન્નં તવ સન્તિકે.

૧૪૦. ‘‘કિલેસા ઝાપિતા મય્હં…પે… વિહરામિ અનાસવા.

૧૪૧. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૪૨. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં સુક્કા ભિક્ખુની ઇમા ગાથાયો અભાસિત્થાતિ.

સુક્કાથેરિયાપદાનં પઞ્ચમં.

પઞ્ચમં ભાણવારં.