૬. અભિરૂપનન્દાથેરીઅપદાનં

૧૪૩. ‘‘એકનવુતિતો કપ્પે, વિપસ્સી નામ નાયકો;

ઉપ્પજ્જિ ચારુદસ્સનો, સબ્બધમ્મેસુ ચક્ખુમા.

૧૪૪. ‘‘તદાહં બન્ધુમતિયં, ઇદ્ધે ફીતે મહાકુલે;

જાતા સુરૂપા દયિતા, પૂજનીયા જનસ્સ ચ.

૧૪૫. ‘‘ઉપગન્ત્વા મહાવીરં, વિપસ્સિં લોકનાયકં;

ધમ્મં સુણિત્વા સરણં, ઉપેસિં નરનાયકં.

૧૪૬. ‘‘સીલેસુ સંવુતા હુત્વા, નિબ્બુતે ચ નરુત્તમે;

ધાતુથૂપસ્સ ઉપરિ, સોણ્ણચ્છત્તમપૂજયિં.

૧૪૭. ‘‘મુત્તચાગા સીલવતી, યાવજીવં તતો ચુતા;

જહિત્વા માનુસં દેહં, તાવતિંસૂપગા અહં.

૧૪૮. ‘‘તદા દસહિ ઠાનેહિ, અધિભોત્વાન સેસકે [અધિભોત્વા અસેસતો (સ્યા.)];

રૂપસદ્દેહિ ગન્ધેહિ, રસેહિ ફુસનેહિ ચ.

૧૪૯. ‘‘આયુનાપિ ચ વણ્ણેન, સુખેન યસસાપિ ચ;

તથેવાધિપતેય્યેન, અધિગય્હ વિરોચહં.

૧૫૦. ‘‘પચ્છિમે ચ ભવે દાનિ, જાતાહં કપિલવ્હયે;

ધીતા ખેમકસક્કસ્સ, નન્દા નામાતિ વિસ્સુતા.

૧૫૧. ‘‘અભિરૂપસમ્પદમ્પિ [અભિરુપં ઉપપદં (સી.), અભિરુપં ઉપ્પાદં (પી.)], અહુ મે કન્તિસૂચકં;

યદાહં યોબ્બનપ્પત્તા, રૂપલાવઞ્ઞભૂસિતા.

૧૫૨. ‘‘તદા [તદા મમત્થં (સી.), ઇધ મમત્તે (સ્યા. ક.)] મત્થે સક્યાનં, વિવાદો સુમહા અહુ;

પબ્બાજેસિ તતો તાતો, મા સક્યા વિનસ્સિંસુતિ.

૧૫૩. ‘‘પબ્બજિત્વા તથાગતં, રૂપદેસ્સિં નરુત્તમં;

સુત્વાન નોપગચ્છામિ, મમ રૂપેન ગબ્બિતા.

૧૫૪. ‘‘ઓવાદમ્પિ ન ગચ્છામિ, બુદ્ધદસ્સનભીરુતા;

તદા જિનો ઉપાયેન, ઉપનેત્વા સસન્તિકં.

૧૫૫. ‘‘તિસ્સિત્થિયો [તિસ્સો થીયો (સી. પી.)] નિદસ્સેસિ, ઇદ્ધિયા મગ્ગકોવિદો;

અચ્છરારૂપસદિસં, તરુણિં જરિતં [જરિકં (સ્યા. ક.)] મતં.

૧૫૬. ‘‘તાયો દિસ્વા સુસંવિગ્ગા, વિરત્તાસે કળેવરે;

અટ્ઠાસિં ભવનિબ્બિન્દા, તદા મં આહ નાયકો.

૧૫૭. ‘‘‘આતુરં અસુચિં પૂતિં, પસ્સ નન્દે સમુસ્સયં;

ઉગ્ઘરન્તં પગ્ઘરન્તં, બાલાનં અભિનન્દિતં.

૧૫૮. ‘‘‘અસુભાય ચિત્તં ભાવેહિ, એકગ્ગં સુસમાહિતં;

યથા ઇદં તથા એતં, યથા એતં તથા ઇદં.

૧૫૯. ‘‘‘એવમેતં અવેક્ખન્તી, રત્તિન્દિવમતન્દિતા;

તતો સકાય પઞ્ઞાય, અભિનિબ્બિજ્ઝ વચ્છસિ’.

૧૬૦. ‘‘તસ્સા મે અપ્પમત્તાય, વિચરન્તિયા [વિચરન્ત્વાધ (સી.), વિચિનન્તીધ (સ્યા. પી.)] યોનિસો;

યથાભૂતં અયં કાયો, દિટ્ઠો સન્તરબાહિરો.

૧૬૧. ‘‘અથ નિબ્બિન્દહં કાયે, અજ્ઝત્તઞ્ચ વિરજ્જહં;

અપ્પમત્તા વિસંયુત્તા, ઉપસન્તામ્હિ નિબ્બુતા.

૧૬૨. ‘‘ઇદ્ધીસુ ચ વસી હોમિ, દિબ્બાય સોતધાતુયા;

ચેતોપરિયઞાણસ્સ, વસી હોમિ મહામુને.

૧૬૩. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૧૬૪. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મમ મહાવીર, ઉપ્પન્નં તવ સન્તિકે.

૧૬૫. ‘‘કિલેસા ઝાપિતા મય્હં…પે… વિહરામિ અનાસવા.

૧૬૬. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૬૭. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં અભિરૂપનન્દા ભિક્ખુની ઇમા ગાથાયો અભાસિત્થાતિ.

અભિરૂપનન્દાથેરિયાપદાનં છટ્ઠં.