૪. સિઙ્ગાલમાતુથેરીઅપદાનં

૮૨. ‘‘પદુમુત્તરો નામ જિનો, સબ્બધમ્માન પારગૂ;

ઇતો સતસહસ્સમ્હિ, કપ્પે ઉપ્પજ્જિ નાયકો.

૮૩. ‘‘તદાહં હંસવતિયં, જાતામચ્ચકુલે અહું;

નાનારતનપજ્જોતે, ઇદ્ધે ફીતે મહદ્ધને.

૮૪. ‘‘પિતુના સહ ગન્ત્વાન, મહાજનપુરક્ખતા;

ધમ્મં બુદ્ધસ્સ સુત્વાન, પબ્બજિં અનગારિયં.

૮૫. ‘‘પબ્બજિત્વાન કાયેન, પાપકમ્મં વિવજ્જયિં;

વચીદુચ્ચરિતં હિત્વા, આજીવં પરિસોધયિં.

૮૬. ‘‘બુદ્ધે પસન્ના ધમ્મે ચ, સઙ્ઘે ચ તિબ્બગારવા;

સદ્ધમ્મસ્સવને યુત્તા, બુદ્ધદસ્સનલાલસા [બુદ્ધદસ્સનસાલયા (સ્યા.)].

૮૭. ‘‘અગ્ગં સદ્ધાધિમુત્તાનં, અસ્સોસિં ભિક્ખુનિં તદા;

તં ઠાનં પત્થયિત્વાન, તિસ્સો સિક્ખા અપૂરયિં.

૮૮. ‘‘તતો મં સુગતો આહ, કરુણાનુગતાસયો;

‘યસ્સ સદ્ધા તથાગતે, અચલા સુપ્પતિટ્ઠિતા;

સીલઞ્ચ યસ્સ કલ્યાણં, અરિયકન્તં પસંસિતં.

૮૯. ‘‘‘સઙ્ઘે પસાદો યસ્સત્થિ, ઉજુભૂતઞ્ચ દસ્સનં;

અદલિદ્દોતિ તં આહુ, અમોઘં તસ્સ જીવિતં.

૯૦. ‘‘‘તસ્મા સદ્ધઞ્ચ સીલઞ્ચ, પસાદં ધમ્મદસ્સનં;

અનુયુઞ્જેથ મેધાવી, સરં બુદ્ધાન [બુદ્ધાનુસાસનં (સી.), બુદ્ધાનં સાસનં (સ્યા.)] સાસનં’.

૯૧. ‘‘તં સુત્વાહં પમુદિતા, અપુચ્છિં પણિધિં મમ;

તદા અનોમો અમિતો, બ્યાકરિત્થ વિનાયકો;

‘બુદ્ધે પસન્ના કલ્યાણી, લચ્છસે તં સુપત્થિતં.

૯૨. ‘‘‘સતસહસ્સિતો કપ્પે, ઓક્કાકકુલસમ્ભવો;

ગોતમો નામ ગોત્તેન, સત્થા લોકે ભવિસ્સતિ.

૯૩. ‘‘‘તસ્સ ધમ્મેસુ દાયાદા, ઓરસા ધમ્મનિમ્મિતા;

સિઙ્ગાલકસ્સ [સિગાલકસ્સ (સી. પી.)] માતાતિ, હેસ્સતિ સત્થુ સાવિકા’.

૯૪. ‘‘તં સુત્વા મુદિતા હુત્વા, યાવજીવં તદા જિનં;

મેત્તચિત્તા પરિચરિં, પટિપત્તીહિ નાયકં.

૯૫. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૯૬. ‘‘પચ્છિમે ચ ભવે દાનિ, ગિરિબ્બજપુરુત્તમે;

જાતા સેટ્ઠિકુલે ફીતે, મહારતનસઞ્ચયે.

૯૭. ‘‘પુત્તો સિઙ્ગાલકો નામ, મમાસિ વિપથે રતો;

દિટ્ઠિગહનપક્ખન્દો, દિસાપૂજનતપ્પરો.

૯૮. ‘‘નાનાદિસા નમસ્સન્તં [નમસ્સતિ (સ્યા.)], પિણ્ડાય નગરં વજં;

તં દિસ્વા ઓવદી બુદ્ધો, મગ્ગે ઠત્વા વિનાયકો.

૯૯. ‘‘તસ્સ દેસયતો ધમ્મં, પનાદો વિમ્હયો અહુ;

દ્વેકોટિનરનારીનં, ધમ્માભિસમયો અહુ.

૧૦૦. ‘‘તદાહં પરિસં ગન્ત્વા, સુત્વા સુગતભાસિતં;

સોતાપત્તિફલં પત્તા, પબ્બજિં અનગારિયં.

૧૦૧. ‘‘ન ચિરેનેવ કાલેન, બુદ્ધદસ્સનલાલસા;

અનુસ્સતિં તં ભાવેત્વા, અરહત્તમપાપુણિં.

૧૦૨. ‘‘દસ્સનત્થાય બુદ્ધસ્સ, સબ્બદા ચ વજામહં;

અતિત્તાયેવ પસ્સામિ, રૂપં નયનનન્દનં.

૧૦૩. ‘‘સબ્બપારમિસમ્ભૂતં, લક્ખીનિલયનં વરં;

રૂપં સબ્બસુભાકિણ્ણં, અતિત્તા વિહરામહં.

૧૦૪. ‘‘જિનો તસ્મિં ગુણે તુટ્ઠો, એતદગ્ગે ઠપેસિ મં;

સિઙ્ગાલકસ્સ યા માતા, અગ્ગા સદ્ધાધિમુત્તિકા [સંઘવિમુત્તિકા (પી.), મમાધિમુત્તિકા (ક.)].

૧૦૫. ‘‘ઇદ્ધીસુ ચ વસી હોમિ, દિબ્બાય સોતધાતુયા;

ચેતોપરિયઞાણસ્સ, વસી હોમિ મહામુનિ.

૧૦૬. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૧૦૭. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મમ મહાવીર, ઉપ્પન્નં તવ સન્તિકે.

૧૦૮. ‘‘કિલેસા ઝાપિતા મય્હં…પે… વિહરામિ અનાસવા.

૧૦૯. ‘‘સ્વાગતં વત મે આસિ…પે… કતં બુદ્ધસ્સ સાસનં.

૧૧૦. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં સિઙ્ગાલમાતા ભિક્ખુની ઇમા ગાથાયો અભાસિત્થાતિ.

સિઙ્ગાલમાતુથેરિયાપદાનં ચતુત્થં.