૩. ઉપ્પલદાયિકાથેરીઅપદાનં

૫૭. ‘‘નગરે અરુણવતિયા, અરુણો નામ ખત્તિયો;

તસ્સ રઞ્ઞો અહું ભરિયા, એકજ્ઝં ચારયામહં.

૫૮. ‘‘રહોગતા નિસીદિત્વા, એવં ચિન્તેસહં તદા;

‘કુસલં મે કતં નત્થિ, આદાય ગમિયં મમ.

૫૯. ‘‘‘મહાભિતાપં કટુકં, ઘોરરૂપં સુદારુણં;

નિરયં નૂન ગચ્છામિ, એત્થ મે નત્થિ સંસયો’.

૬૦. ‘‘એવાહં ચિન્તયિત્વાન, પહંસેત્વાન માનસં;

રાજાનં ઉપગન્ત્વાન, ઇદં વચનમબ્રવિં.

૬૧. ‘‘‘ઇત્થી નામ મયં દેવ, પુરિસાનિત્તરા અહુ [પુરિસાનુગતા સદા (સી.), પુરિસા ન ભવામ નો (સ્યા.), પુરિસાનં ભરા મયં (પી.)];

એકં મે સમણં દેહિ, ભોજયિસ્સામિ ખત્તિય’.

૬૨. ‘‘અદાસિ મે તદા રાજા, સમણં ભાવિતિન્દ્રિયં;

તસ્સ પત્તં ગહેત્વાન, પરમન્નેન પૂરયિં.

૬૩. ‘‘પૂરેત્વા પરમં અન્નં, સહ સુગન્ધલેપનં;

મહાચેલેન છાદિત્વા, અદાસિં તુટ્ઠમાનસા.

૬૪. ‘‘તેન કમ્મેન સુકતેન, ચેતનાપણિધીહિ ચ;

જહિત્વા માનુસં દેહં, તાવતિંસમગચ્છહં.

૬૫. ‘‘સહસ્સદેવરાજૂનં, મહેસિત્તમકારયિં;

સહસ્સચક્કવત્તીનં, મહેસિત્તમકારયિં.

૬૬. ‘‘પદેસરજ્જં વિપુલં, ગણનાતો અસઙ્ખિયં;

નાનાવિધં બહું અઞ્ઞં, તસ્સ કમ્મફલં તતો.

૬૭. ‘‘ઉપ્પલસ્સેવ મે વણ્ણો, અભિરૂપા સુદસ્સના;

ઇત્થિસબ્બઙ્ગસમ્પન્ના, અભિજાતા જુતિન્ધરા.

૬૮. ‘‘પચ્છિમે ભવે સમ્પત્તે, અજાયિં સાકિયે કુલે;

નારીસહસ્સપામોક્ખા, સુદ્ધોદનસુતસ્સહં.

૬૯. ‘‘નિબ્બિન્દિત્વા અગારેહં, પબ્બજિં અનગારિયં;

સત્તમીરત્તિસમ્પત્તા [સત્તમિંરત્તિમપત્તા (સી. સ્યા. પી.)], ચતુસચ્ચમપાપુણિં.

૭૦. ‘‘ચીવરં પિણ્ડપાતઞ્ચ, પચ્ચયં સયનાસનં;

પરિમેતું ન સક્કોમિ, પિણ્ડપાતસ્સિદં ફલં.

૭૧. ‘‘યં મય્હં પૂરિતં કમ્મં, કુસલં સરસે મુનિ;

તુય્હત્થાય મહાવીર, પરિચત્તં બહું મયા.

૭૨. ‘‘એકત્તિંસે ઇતો કપ્પે, યં દાનમદદિં તદા;

દુગ્ગતિં નાભિજાનામિ, પિણ્ડપાતસ્સિદં ફલં.

૭૩. ‘‘દ્વે ગતિયો પજાનામિ, દેવત્તં અથ માનુસં;

અઞ્ઞં ગતિં ન જાનામિ, પિણ્ડપાતસ્સિદં ફલં.

૭૪. ‘‘ઉચ્ચે કુલે પજાયામિ, મહાસાલે [તયો સાલ (ક.)] મહદ્ધને;

અઞ્ઞે કુલે ન જાયામિ, પિણ્ડપાતસ્સિદં ફલં.

૭૫. ‘‘ભવાભવે સંસરિત્વા, સુક્કમૂલેન ચોદિતા;

અમનાપં ન પસ્સામિ, સોમનસ્સકતં ફલં.

૭૬. ‘‘ઇદ્ધીસુ ચ વસી હોમિ, દિબ્બાય સોતધાતુયા;

ચેતોપરિયઞાણસ્સ, વસી હોમિ મહામુને.

૭૭. ‘‘પુબ્બેનિવાસં જાનામિ, દિબ્બચક્ખુ વિસોધિતં;

સબ્બાસવપરિક્ખીણા, નત્થિ દાનિ પુનબ્ભવો.

૭૮. ‘‘અત્થધમ્મનિરુત્તીસુ, પટિભાને તથેવ ચ;

ઞાણં મમ મહાવીર, ઉપ્પન્નં તવ સન્તિકે.

૭૯. ‘‘કિલેસા ઝાપિતા મય્હં…પે… વિહરામિ અનાસવા.

૮૦. ‘‘સ્વાગતં વત મે આસિ…પે… કતં બુદ્ધસ્સ સાસનં.

૮૧. ‘‘પટિસમ્ભિદા ચતસ્સો…પે… કતં બુદ્ધસ્સ સાસનં’’.

ઇત્થં સુદં ઉપ્પલદાયિકા ભિક્ખુની ભગવતો સમ્મુખા ઇમા ગાથાયો અભાસિત્થાતિ.

ઉપ્પલદાયિકાથેરિયાપદાનં તતિયં.