૩. ભદ્દત્થેરગાથા

૪૭૩. ‘‘એકપુત્તો અહં આસિં, પિયો માતુ પિયો પિતુ;

બહૂહિ વતચરિયાહિ, લદ્ધો આયાચનાહિ ચ.

૪૭૪. ‘‘તે ચ મં અનુકમ્પાય, અત્થકામા હિતેસિનો;

ઉભો પિતા ચ માતા ચ, બુદ્ધસ્સ ઉપનામયું’’.

૪૭૫. ‘‘કિચ્છા લદ્ધો અયં પુત્તો, સુખુમાલો સુખેધિતો;

ઇમં દદામ તે નાથ, જિનસ્સ પરિચારકં’’.

૪૭૬. ‘‘સત્થા ચ મં પટિગ્ગય્હ, આનન્દં એતદબ્રવિ;

‘પબ્બાજેહિ ઇમં ખિપ્પં, હેસ્સત્યાજાનિયો અયં.

૪૭૭. ‘‘પબ્બાજેત્વાન મં સત્થા, વિહારં પાવિસી જિનો;

અનોગ્ગતસ્મિં સૂરિયસ્મિં, તતો ચિત્તં વિમુચ્ચિ મે.

૪૭૮. ‘‘તતો સત્થા નિરાકત્વા, પટિસલ્લાનવુટ્ઠિતો;

‘એહિ ભદ્દા’તિ મં આહ, સા મે આસૂપસમ્પદા.

૪૭૯. ‘‘જાતિયા સત્તવસ્સેન, લદ્ધા મે ઉપસમ્પદા;

તિસ્સો વિજ્જા અનુપ્પત્તા, અહો ધમ્મસુધમ્મતા’’તિ.

… ભદ્દો થેરો….