૭. સત્તકનિપાતો

૧. સુન્દરસમુદ્દત્થેરગાથા

૪૫૯. ‘‘અલઙ્કતા સુવસના, માલધારી [માલાભારી (સી.), માલભારી (સ્યા.)] વિભૂસિતા;

અલત્તકકતાપાદા, પાદુકારુય્હ વેસિકા.

૪૬૦. ‘‘પાદુકા ઓરુહિત્વાન, પુરતો પઞ્જલીકતા;

સા મં સણ્હેન મુદુના, મ્હિતપુબ્બં [મિહિતપુબ્બં (સી.)] અભાસથ’’.

૪૬૧. ‘‘યુવાસિ ત્વં પબ્બજિતો, તિટ્ઠાહિ મમ સાસને;

ભુઞ્જ માનુસકે કામે, અહં વિત્તં દદામિ તે;

સચ્ચં તે પટિજાનામિ, અગ્ગિં વા તે હરામહં.

૪૬૨. ‘‘યદા જિણ્ણા ભવિસ્સામ, ઉભો દણ્ડપરાયના;

ઉભોપિ પબ્બજિસ્સામ, ઉભયત્થ કટગ્ગહો’’.

૪૬૩. ‘‘તઞ્ચ દિસ્વાન યાચન્તિં, વેસિકં પઞ્જલીકતં;

અલઙ્કતં સુવસનં, મચ્ચુપાસંવ ઓડ્ડિતં.

૪૬૪. ‘‘તતો મે મનસીકારો…પે… નિબ્બિદા સમતિટ્ઠથ.

૪૬૫. ‘‘તતો ચિત્તં વિમુચ્ચિ મે…પે… કતં બુદ્ધસ્સ સાસન’’ન્તિ.

… સુન્દરસમુદ્દો થેરો….

૨. લકુણ્ડકભદ્દિયત્થેરગાથા

૪૬૬. પરે અમ્બાટકારામે, વનસણ્ડમ્હિ ભદ્દિયો;

સમૂલં તણ્હમબ્બુય્હ, તત્થ ભદ્દોવ ઝાયતિ [ભદ્દો’ધિઝાયાયતિ (સી.), ભદ્દો ઝિયાયતિ (સ્યા. સી. અટ્ઠ.)].

૪૬૭. ‘‘રમન્તેકે મુદિઙ્ગેહિ [મુતિઙ્ગેહિ (સી. અટ્ઠ.)], વીણાહિ પણવેહિ ચ;

અહઞ્ચ રુક્ખમૂલસ્મિં, રતો બુદ્ધસ્સ સાસને.

૪૬૮. ‘‘બુદ્ધો ચે [બુદ્ધો ચ (સબ્બત્થ)] મે વરં દજ્જા, સો ચ લબ્ભેથ મે વરો;

ગણ્હેહં સબ્બલોકસ્સ, નિચ્ચં કાયગતં સતિં.

૪૬૯. ‘‘યે મં રૂપેન પામિંસુ, યે ચ ઘોસેન અન્વગૂ;

છન્દરાગવસૂપેતા, ન મં જાનન્તિ તે જના.

૪૭૦. ‘‘અજ્ઝત્તઞ્ચ ન જાનાતિ, બહિદ્ધા ચ ન પસ્સતિ;

સમન્તાવરણો બાલો, સ વે ઘોસેન વુય્હતિ.

૪૭૧. ‘‘અજ્ઝત્તઞ્ચ ન જાનાતિ, બહિદ્ધા ચ વિપસ્સતિ;

બહિદ્ધા ફલદસ્સાવી, સોપિ ઘોસેન વુય્હતિ.

૪૭૨. ‘‘અજ્ઝત્તઞ્ચ પજાનાતિ, બહિદ્ધા ચ વિપસ્સતિ;

અનાવરણદસ્સાવી, ન સો ઘોસેન વુય્હતી’’તિ.

… લકુણ્ડકભદ્દિયો થેરો….

૩. ભદ્દત્થેરગાથા

૪૭૩. ‘‘એકપુત્તો અહં આસિં, પિયો માતુ પિયો પિતુ;

બહૂહિ વતચરિયાહિ, લદ્ધો આયાચનાહિ ચ.

૪૭૪. ‘‘તે ચ મં અનુકમ્પાય, અત્થકામા હિતેસિનો;

ઉભો પિતા ચ માતા ચ, બુદ્ધસ્સ ઉપનામયું’’.

૪૭૫. ‘‘કિચ્છા લદ્ધો અયં પુત્તો, સુખુમાલો સુખેધિતો;

ઇમં દદામ તે નાથ, જિનસ્સ પરિચારકં’’.

૪૭૬. ‘‘સત્થા ચ મં પટિગ્ગય્હ, આનન્દં એતદબ્રવિ;

‘પબ્બાજેહિ ઇમં ખિપ્પં, હેસ્સત્યાજાનિયો અયં.

૪૭૭. ‘‘પબ્બાજેત્વાન મં સત્થા, વિહારં પાવિસી જિનો;

અનોગ્ગતસ્મિં સૂરિયસ્મિં, તતો ચિત્તં વિમુચ્ચિ મે.

૪૭૮. ‘‘તતો સત્થા નિરાકત્વા, પટિસલ્લાનવુટ્ઠિતો;

‘એહિ ભદ્દા’તિ મં આહ, સા મે આસૂપસમ્પદા.

૪૭૯. ‘‘જાતિયા સત્તવસ્સેન, લદ્ધા મે ઉપસમ્પદા;

તિસ્સો વિજ્જા અનુપ્પત્તા, અહો ધમ્મસુધમ્મતા’’તિ.

… ભદ્દો થેરો….

૪. સોપાકત્થેરગાથા

૪૮૦. ‘‘દિસ્વા પાસાદછાયાયં, ચઙ્કમન્તં નરુત્તમં;

તત્થ નં ઉપસઙ્કમ્મ, વન્દિસ્સં [વન્દિસં (સી. પી.)] પુરિસુત્તમં.

૪૮૧. ‘‘એકંસં ચીવરં કત્વા, સંહરિત્વાન પાણયો;

અનુચઙ્કમિસ્સં વિરજં, સબ્બસત્તાનમુત્તમં.

૪૮૨. ‘‘તતો પઞ્હે અપુચ્છિ મં, પઞ્હાનં કોવિદો વિદૂ;

અચ્છમ્ભી ચ અભીતો ચ, બ્યાકાસિં સત્થુનો અહં.

૪૮૩. ‘‘વિસ્સજ્જિતેસુ પઞ્હેસુ, અનુમોદિ તથાગતો;

ભિક્ખુસઙ્ઘં વિલોકેત્વા, ઇમમત્થં અભાસથ’’.

૪૮૪. ‘‘લાભા અઙ્ગાનં મગધાનં, યેસાયં પરિભુઞ્જતિ;

ચીવરં પિણ્ડપાતઞ્ચ, પચ્ચયં સયનાસનં;

પચ્ચુટ્ઠાનઞ્ચ સામીચિં, તેસં લાભા’’તિ ચાબ્રવિ.

૪૮૫. ‘‘અજ્જતગ્ગે મં સોપાક, દસ્સનાયોપસઙ્કમ;

એસા ચેવ તે સોપાક, ભવતુ ઉપસમ્પદા’’.

૪૮૬. ‘‘જાતિયા સત્તવસ્સોહં, લદ્ધાન ઉપસમ્પદં;

ધારેમિ અન્તિમં દેહં, અહો ધમ્મસુધમ્મતા’’તિ.

… સોપાકો થેરો….

૫. સરભઙ્ગત્થેરગાથા

૪૮૭. ‘‘સરે હત્થેહિ ભઞ્જિત્વા, કત્વાન કુટિમચ્છિસં;

તેન મે સરભઙ્ગોતિ, નામં સમ્મુતિયા અહુ.

૪૮૮. ‘‘ન મય્હં કપ્પતે અજ્જ, સરે હત્થેહિ ભઞ્જિતું;

સિક્ખાપદા નો પઞ્ઞત્તા, ગોતમેન યસસ્સિના.

૪૮૯. ‘‘સકલં સમત્તં રોગં, સરભઙ્ગો નાદ્દસં પુબ્બે;

સોયં રોગો દિટ્ઠો, વચનકરેનાતિદેવસ્સ.

૪૯૦. ‘‘યેનેવ મગ્ગેન ગતો વિપસ્સી, યેનેવ મગ્ગેન સિખી ચ વેસ્સભૂ;

કકુસન્ધકોણાગમનો ચ કસ્સપો, તેનઞ્જસેન અગમાસિ ગોતમો.

૪૯૧. ‘‘વીતતણ્હા અનાદાના, સત્ત બુદ્ધા ખયોગધા;

યેહાયં દેસિતો ધમ્મો, ધમ્મભૂતેહિ તાદિભિ.

૪૯૨. ‘‘ચત્તારિ અરિયસચ્ચાનિ, અનુકમ્પાય પાણિનં;

દુક્ખં સમુદયો મગ્ગો, નિરોધો દુક્ખસઙ્ખયો.

૪૯૩. ‘‘યસ્મિં નિવત્તતે [યસ્મિં ન નિબ્બત્તતે (ક.)] દુક્ખં, સંસારસ્મિં અનન્તકં;

ભેદા ઇમસ્સ કાયસ્સ, જીવિતસ્સ ચ સઙ્ખયા;

અઞ્ઞો પુનબ્ભવો નત્થિ, સુવિમુત્તોમ્હિ સબ્બધી’’તિ.

… સરભઙ્ગો થેરો….

સત્તકનિપાતો નિટ્ઠિતો.