૮. અટ્ઠકનિપાતો

૧. મહાકચ્ચાયનત્થેરગાથા

૪૯૪. ‘‘કમ્મં બહુકં ન કારયે, પરિવજ્જેય્ય જનં ન ઉય્યમે;

સો ઉસ્સુક્કો રસાનુગિદ્ધો, અત્થં રિઞ્ચતિ યો સુખાધિવાહો.

૪૯૫. ‘‘પઙ્કોતિ હિ નં અવેદયું, યાયં વન્દનપૂજના કુલેસુ;

સુખુમં સલ્લં દુરુબ્બહં, સક્કારો કાપુરિસેન દુજ્જહો.

૪૯૬. ‘‘ન પરસ્સુપનિધાય, કમ્મં મચ્ચસ્સ પાપકં;

અત્તના તં ન સેવેય્ય, કમ્મબન્ધૂહિ માતિયા.

૪૯૭. ‘‘ન પરે વચના ચોરો, ન પરે વચના મુનિ;

અત્તા ચ નં યથાવેદિ [યથા વેત્તિ (સી.)], દેવાપિ નં તથા વિદૂ.

૪૯૮. ‘‘પરે ચ ન વિજાનન્તિ, મયમેત્થ યમામસે;

યે ચ તત્થ વિજાનન્તિ, તતો સમ્મન્તિ મેધગા.

૪૯૯. ‘‘જીવતે વાપિ સપ્પઞ્ઞો, અપિ વિત્તપરિક્ખયો;

પઞ્ઞાય ચ અલાભેન [અભાવેન (સી. અટ્ઠ.)], વિત્તવાપિ ન જીવતિ.

૫૦૦. ‘‘સબ્બં સુણાતિ સોતેન, સબ્બં પસ્સતિ ચક્ખુના;

ન ચ દિટ્ઠં સુતં ધીરો, સબ્બં ઉજ્ઝિતુમરહતિ.

૫૦૧. ‘‘ચક્ખુમાસ્સ યથા અન્ધો, સોતવા બધિરો યથા;

પઞ્ઞવાસ્સ યથા મૂગો, બલવા દુબ્બલોરિવ;

અથ અત્થે સમુપ્પન્ને, સયેથ [પસ્સેથ (ક.)] મતસાયિક’’ન્તિ.

… મહાકચ્ચાયનો થેરો….

૨. સિરિમિત્તત્થેરગાથા

૫૦૨. ‘‘અક્કોધનોનુપનાહી, અમાયો રિત્તપેસુણો;

સ વે તાદિસકો ભિક્ખુ, એવં પેચ્ચ ન સોચતિ.

૫૦૩. ‘‘અક્કોધનોનુપનાહી, અમાયો રિત્તપેસુણો;

ગુત્તદ્વારો સદા ભિક્ખુ, એવં પેચ્ચ ન સોચતિ.

૫૦૪. ‘‘અક્કોધનોનુપનાહી, અમાયો રિત્તપેસુણો;

કલ્યાણસીલો સો [યો (સ્યા.)] ભિક્ખુ, એવં પેચ્ચ ન સોચતિ.

૫૦૫. ‘‘અક્કોધનોનુપનાહી, અમાયો રિત્તપેસુણો;

કલ્યાણમિત્તો સો ભિક્ખુ, એવં પેચ્ચ ન સોચતિ.

૫૦૬. ‘‘અક્કોધનોનુપનાહી, અમાયો રિત્તપેસુણો;

કલ્યાણપઞ્ઞો સો ભિક્ખુ, એવં પેચ્ચ ન સોચતિ.

૫૦૭. ‘‘યસ્સ સદ્ધા તથાગતે, અચલા સુપ્પતિટ્ઠિતા;

સીલઞ્ચ યસ્સ કલ્યાણં, અરિયકન્તં પસંસિતં.

૫૦૮. ‘‘સઙ્ઘે પસાદો યસ્સત્થિ, ઉજુભૂતઞ્ચ દસ્સનં;

‘અદલિદ્દો’તિ તં આહુ, અમોઘં તસ્સ જીવિતં.

૫૦૯. ‘‘તસ્મા સદ્ધઞ્ચ સીલઞ્ચ, પસાદં ધમ્મદસ્સનં;

અનુયુઞ્જેથ મેધાવી, સરં બુદ્ધાન સાસન’’ન્તિ.

… સિરિમિત્તો થેરો….

૩. મહાપન્થકત્થેરગાથા

૫૧૦. ‘‘યદા પઠમમદ્દક્ખિં, સત્થારમકુતોભયં;

તતો મે અહુ સંવેગો, પસ્સિત્વા પુરિસુત્તમં.

૫૧૧. ‘‘સિરિં હત્થેહિ પાદેહિ, યો પણામેય્ય આગતં;

એતાદિસં સો સત્થારં, આરાધેત્વા વિરાધયે.

૫૧૨. ‘‘તદાહં પુત્તદારઞ્ચ, ધનધઞ્ઞઞ્ચ છડ્ડયિં;

કેસમસ્સૂનિ છેદેત્વા, પબ્બજિં અનગારિયં.

૫૧૩. ‘‘સિક્ખાસાજીવસમ્પન્નો, ઇન્દ્રિયેસુ સુસંવુતો;

નમસ્સમાનો સમ્બુદ્ધં, વિહાસિં અપરાજિતો.

૫૧૪. ‘‘તતો મે પણિધી આસિ, ચેતસો અભિપત્થિતો;

ન નિસીદે મુહુત્તમ્પિ, તણ્હાસલ્લે અનૂહતે.

૫૧૫. ‘‘તસ્સ મેવં વિહરતો, પસ્સ વીરિયપરક્કમં;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૫૧૬. ‘‘પુબ્બેનિવાસં જાનામિ, દિબ્બચક્ખુ વિસોધિતં;

અરહા દક્ખિણેય્યોમ્હિ, વિપ્પમુત્તો નિરૂપધિ.

૫૧૭. ‘‘તતો રત્યા વિવસાને [વિવસને (સી. સ્યા.)], સૂરિયસ્સુગ્ગમનં પતિ;

સબ્બં તણ્હં વિસોસેત્વા, પલ્લઙ્કેન ઉપાવિસિ’’ન્તિ.

… મહાપન્થકો થેરો….

અટ્ઠકનિપાતો નિટ્ઠિતો.