૬. સપ્પદાસત્થેરગાથા

૪૦૫. ‘‘પણ્ણવીસતિવસ્સાનિ, યતો પબ્બજિતો અહં;

અચ્છરાસઙ્ઘાતમત્તમ્પિ, ચેતોસન્તિમનજ્ઝગં.

૪૦૬. ‘‘અલદ્ધા ચિત્તસ્સેકગ્ગં, કામરાગેન અટ્ટિતો [અદ્દિતો (સ્યા. સી. અટ્ઠ.), અડ્ડિતો (ક.)];

બાહા પગ્ગય્હ કન્દન્તો, વિહારા ઉપનિક્ખમિં [નૂપનિક્ખમિં (સબ્બત્થ), દુપનિક્ખમિં (?)].

૪૦૭. ‘‘સત્થં વા આહરિસ્સામિ, કો અત્થો જીવિતેન મે;

કથં હિ સિક્ખં પચ્ચક્ખં, કાલં કુબ્બેથ માદિસો.

૪૦૮. ‘‘તદાહં ખુરમાદાય, મઞ્ચકમ્હિ ઉપાવિસિં;

પરિનીતો ખુરો આસિ, ધમનિં છેત્તુમત્તનો.

૪૦૯. ‘‘તતો મે મનસીકારો, યોનિસો ઉદપજ્જથ;

આદીનવો પાતુરહુ, નિબ્બિદા સમતિટ્ઠથ.

૪૧૦. ‘‘તતો ચિત્તં વિમુચ્ચિ મે, પસ્સ ધમ્મસુધમ્મતં;

તિસ્સો વિજ્જા અનુપ્પત્તા, કતં બુદ્ધસ્સ સાસન’’ન્તિ.

… સપ્પદાસો થેરો….

૭.કાતિયાનત્થેરગાથા

૪૧૧. ‘‘ઉટ્ઠેહિ નિસીદ કાતિયાન, મા નિદ્દાબહુલો અહુ જાગરસ્સુ;

મા તં અલસં પમત્તબન્ધુ, કૂટેનેવ જિનાતુ મચ્ચુરાજા.

૪૧૨. ‘‘સેય્યથાપિ [સયથાપિ (સી. પી.)] મહાસમુદ્દવેગો, એવં જાતિજરાતિવત્તતે તં;

સો કરોહિ સુદીપમત્તનો ત્વં, ન હિ તાણં તવ વિજ્જતેવ અઞ્ઞં.

૪૧૩. ‘‘સત્થા હિ વિજેસિ મગ્ગમેતં, સઙ્ગા જાતિજરાભયા અતીતં;

પુબ્બાપરરત્તમપ્પમત્તો, અનુયુઞ્જસ્સુ દળ્હં કરોહિ યોગં.

૪૧૪. ‘‘પુરિમાનિ પમુઞ્ચ બન્ધનાનિ, સઙ્ઘાટિખુરમુણ્ડભિક્ખભોજી;

મા ખિડ્ડારતિઞ્ચ મા નિદ્દં, અનુયુઞ્જિત્થ ઝાય કાતિયાન.

૪૧૫. ‘‘ઝાયાહિ જિનાહિ કાતિયાન, યોગક્ખેમપથેસુ કોવિદોસિ;

પપ્પુય્ય અનુત્તરં વિસુદ્ધિં, પરિનિબ્બાહિસિ વારિનાવ જોતિ.

૪૧૬. ‘‘પજ્જોતકરો પરિત્તરંસો, વાતેન વિનમ્યતે લતાવ;

એવમ્પિ તુવં અનાદિયાનો, મારં ઇન્દસગોત્ત નિદ્ધુનાહિ;

સો વેદયિતાસુ વીતરાગો, કાલં કઙ્ખ ઇધેવ સીતિભૂતો’’તિ.

… કાતિયાનો થેરો….