૬. નદીકસ્સપત્થેરગાથા

૩૪૦. ‘‘અત્થાય વત મે બુદ્ધો, નદિં નેરઞ્જરં અગા;

યસ્સાહં ધમ્મં સુત્વાન, મિચ્છાદિટ્ઠિં વિવજ્જયિં.

૩૪૧. ‘‘યજિં ઉચ્ચાવચે યઞ્ઞે, અગ્ગિહુત્તં જુહિં અહં;

‘એસા સુદ્ધી’તિ મઞ્ઞન્તો, અન્ધભૂતો [અન્ધીભૂતો (ક.)] પુથુજ્જનો.

૩૪૨. ‘‘દિટ્ઠિગહનપક્ખન્દો [પક્ખન્તો (સી.), પક્ખન્નો (સ્યા. પી.)], પરામાસેન મોહિતો;

અસુદ્ધિં મઞ્ઞિસં સુદ્ધિં, અન્ધભૂતો અવિદ્દસુ.

૩૪૩. ‘‘મિચ્છાદિટ્ઠિ પહીના મે, ભવા સબ્બે પદાલિતા [વિદાલિતા (ક.)];

જુહામિ દક્ખિણેય્યગ્ગિં, નમસ્સામિ તથાગતં.

૩૪૪. ‘‘મોહા સબ્બે પહીના મે, ભવતણ્હા પદાલિતા;

વિક્ખીણો જાતિસંસારો, નત્થિ દાનિ પુનબ્ભવો’’તિ.

… નદીકસ્સપો થેરો….