૨. સુભૂતત્થેરગાથા

૩૨૦. ‘‘અયોગે યુઞ્જમત્તાનં, પુરિસો કિચ્ચમિચ્છકો [કિચ્ચમિચ્છતો (સી.), કિચ્ચમિચ્છયં (કત્થચિ)];

ચરં ચે નાધિગચ્છેય્ય, ‘તં મે દુબ્ભગલક્ખણં’.

૩૨૧. ‘‘અબ્બૂળ્હં અઘગતં વિજિતં, એકઞ્ચે ઓસ્સજેય્ય કલીવ સિયા;

સબ્બાનિપિ ચે ઓસ્સજેય્ય અન્ધોવ સિયા, સમવિસમસ્સ અદસ્સનતો.

૩૨૨. ‘‘યઞ્હિ કયિરા તઞ્હિ વદે, યં ન કયિરા ન તં વદે;

અકરોન્તં ભાસમાનં, પરિજાનન્તિ પણ્ડિતા.

૩૨૩. [ધ. પ. ૫૧ ધમ્મપદેપિ] ‘‘યથાપિ રુચિરં પુપ્ફં, વણ્ણવન્તં અગન્ધકં;

એવં સુભાસિતા વાચા, અફલા હોતિ અકુબ્બતો.

૩૨૪. [ધ. પ. ૫૨] ‘‘યથાપિ રુચિરં પુપ્ફં, વણ્ણવન્તં સુગન્ધકં [સગન્ધકં (સી. સ્યા. પી.)];

એવં સુભાસિતા વાચા, સફલા હોતિ કુબ્બતો’’તિ [સકુબ્બતો (સી. પી.), સુકુબ્બતો (સ્યા.)].

… સુભૂતો થેરો….