૧૧. સોણકુટિકણ્ણત્થેરગાથા

૩૬૫. ‘‘ઉપસમ્પદા ચ મે લદ્ધા, વિમુત્તો ચમ્હિ અનાસવો;

સો ચ મે ભગવા દિટ્ઠો, વિહારે ચ સહાવસિં.

૩૬૬. ‘‘બહુદેવ રત્તિં ભગવા, અબ્ભોકાસેતિનામયિ;

વિહારકુસલો સત્થા, વિહારં પાવિસી તદા.

૩૬૭. ‘‘સન્થરિત્વાન સઙ્ઘાટિં, સેય્યં કપ્પેસિ ગોતમો;

સીહો સેલગુહાયંવ, પહીનભયભેરવો.

૩૬૮. ‘‘તતો કલ્યાણવાક્કરણો, સમ્માસમ્બુદ્ધસાવકો;

સોણો અભાસિ સદ્ધમ્મં, બુદ્ધસેટ્ઠસ્સ સમ્મુખા.

૩૬૯. ‘‘પઞ્ચક્ખન્ધે પરિઞ્ઞાય, ભાવયિત્વાન અઞ્જસં;

પપ્પુય્ય પરમં સન્તિં, પરિનિબ્બિસ્સત્યનાસવો’’તિ.

… સોણો કુટિકણ્ણથેરો….