૧૦. ધમ્મિકત્થેરગાથા

૩૦૩. [જા. ૧.૧૦.૧૦૨ જાતકેપિ] ‘‘ધમ્મો હવે રક્ખતિ ધમ્મચારિં, ધમ્મો સુચિણ્ણો સુખમાવહતિ;

એસાનિસંસો ધમ્મે સુચિણ્ણે, ન દુગ્ગતિં ગચ્છતિ ધમ્મચારી.

૩૦૪. [જા. ૧.૧૫.૩૮૫] ‘‘નહિ ધમ્મો અધમ્મો ચ, ઉભો સમવિપાકિનો;

અધમ્મો નિરયં નેતિ, ધમ્મો પાપેતિ સુગ્ગતિં.

૩૦૫. ‘‘તસ્મા હિ ધમ્મેસુ કરેય્ય છન્દં, ઇતિ મોદમાનો સુગતેન તાદિના;

ધમ્મે ઠિતા સુગતવરસ્સ સાવકા, નીયન્તિ ધીરા સરણવરગ્ગગામિનો.

૩૦૬. ‘‘વિપ્ફોટિતો ગણ્ડમૂલો, તણ્હાજાલો સમૂહતો;

સો ખીણસંસારો ન ચત્થિ કિઞ્ચનં,

ચન્દો યથા દોસિના પુણ્ણમાસિય’’ન્તિ.

… ધમ્મિકો થેરો….