૧. મહામોગ્ગલ્લાનત્થેરગાથા
૧૧૪૯. ‘‘આરઞ્ઞિકા પિણ્ડપાતિકા, ઉઞ્છાપત્તાગતે રતા;
દાલેમુ મચ્ચુનો સેનં, અજ્ઝત્તં સુસમાહિતા.
૧૧૫૦. ‘‘આરઞ્ઞિકા પિણ્ડપાતિકા, ઉઞ્છાપત્તાગતે રતા;
ધુનામ મચ્ચુનો સેનં, નળાગારંવ કુઞ્જરો.
૧૧૫૧. ‘‘રુક્ખમૂલિકા સાતતિકા, ઉઞ્છાપત્તાગતે રતા;
દાલેમુ મચ્ચુનો સેનં, અજ્ઝત્તં સુસમાહિતા.
૧૧૫૨. ‘‘રુક્ખમૂલિકા સાતતિકા, ઉઞ્છાપત્તાગતે રતા;
ધુનામ મચ્ચુનો સેનં, નળાગારંવ કુઞ્જરો.
૧૧૫૩. ‘‘અટ્ઠિકઙ્કલકુટિકે, મંસન્હારુપસિબ્બિતે;
ધિરત્થુ પુરે દુગ્ગન્ધે, પરગત્તે મમાયસે.
૧૧૫૪. ‘‘ગૂથભસ્તે તચોનદ્ધે, ઉરગણ્ડિપિસાચિનિ;
નવ સોતાનિ તે કાયે, યાનિ સન્દન્તિ સબ્બદા.
૧૧૫૫. ‘‘તવ સરીરં નવસોતં, દુગ્ગન્ધકરં પરિબન્ધં;
ભિક્ખુ પરિવજ્જયતે તં, મીળ્હં ચ યથા સુચિકામો.
૧૧૫૬. ‘‘એવઞ્ચે તં જનો જઞ્ઞા, યથા જાનામિ તં અહં;
આરકા પરિવજ્જેય્ય, ગૂથટ્ઠાનંવ પાવુસે’’.
૧૧૫૭. ‘‘એવમેતં મહાવીર, યથા સમણ ભાસસિ;
એત્થ ચેકે વિસીદન્તિ, પઙ્કમ્હિવ જરગ્ગવો.
૧૧૫૮. ‘‘આકાસમ્હિ હલિદ્દિયા, યો મઞ્ઞેથ રજેતવે;
અઞ્ઞેન વાપિ રઙ્ગેન, વિઘાતુદયમેવ તં.
૧૧૫૯. ‘‘તદાકાસસમં ચિત્તં, અજ્ઝત્તં સુસમાહિતં;
મા પાપચિત્તે આસાદિ, અગ્ગિખન્ધંવ પક્ખિમા.
૧૧૬૦. ‘‘પસ્સ ચિત્તકતં બિમ્બં, અરુકાયં સમુસ્સિતં;
આતુરં બહુસઙ્કપ્પં, યસ્સ નત્થિ ધુવં ઠિતિ.
૧૧૬૧. ‘‘પસ્સ ચિત્તકતં રૂપં, મણિના કુણ્ડલેન ચ;
અટ્ઠિં તચેન ઓનદ્ધં, સહ વત્થેહિ સોભતિ.
૧૧૬૨. ‘‘અલત્તકકતા પાદા, મુખં ચુણ્ણકમક્ખિતં;
અલં બાલસ્સ મોહાય, નો ચ પારગવેસિનો.
૧૧૬૩. ‘‘અટ્ઠપદકતા કેસા, નેત્તા અઞ્જનમક્ખિતા;
અલં બાલસ્સ મોહાય, નો ચ પારગવેસિનો.
૧૧૬૪. ‘‘અઞ્જનીવ નવા ચિત્તા, પૂતિકાયો અલઙ્કતો;
અલં બાલસ્સ મોહાય, નો ચ પારગવેસિનો.
૧૧૬૫. ‘‘ઓદહિ મિગવો પાસં, નાસદા વાગુરં મિગો;
ભુત્વા નિવાપં ગચ્છામ, કદ્દન્તે મિગબન્ધકે.
૧૧૬૬. ‘‘છિન્નો પાસો મિગવસ્સ, નાસદા વાગુરં મિગો;
ભુત્વા નિવાપં ગચ્છામ, સોચન્તે મિગલુદ્દકે.
૧૧૬૭. ‘‘તદાસિ યં ભિંસનકં, તદાસિ લોમહંસનં;
અનેકાકારસમ્પન્ને, સારિપુત્તમ્હિ નિબ્બુતે.
૧૧૬૮. [દી. નિ. ૨.૨૨૧, ૨૭૨; સં. નિ. ૧.૧૮૬; ૨.૧૪૩; અપ. થેર ૧.૨.૧૧૫; જા. ૧.૧.૯૫] ‘‘અનિચ્ચા વત સઙ્ખારા ઉપ્પાદવય ધમ્મિનો.
ઉપજ્જિત્વા નિરુજ્ઝન્તિ, તેસં વૂપસમો સુખો.
૧૧૬૯. ‘‘સુખુમં તે પટિવિજ્ઝન્તિ, વાલગ્ગં ઉસુના યથા;
યે પઞ્ચક્ખન્ધે પસ્સન્તિ, પરતો નો ચ અત્તતો.
૧૧૭૦. ‘‘યે ચ પસ્સન્તિ સઙ્ખારે, પરતો નો ચ અત્તતો;
પચ્ચબ્યાધિંસુ નિપુણં, વાલગ્ગં ઉસુના યથા.
૧૧૭૧. [સં. નિ. ૧.૨૧, ૯૭] ‘‘સત્તિયા વિય ઓમટ્ઠો, ડય્હમાનોવ મત્થકે;
કામરાગપ્પહાનાય, સતો ભિક્ખુ પરિબ્બજે.
૧૧૭૨. [સં. નિ. ૧.૨૧, ૯૭]‘‘સત્તિયા વિય ઓમટ્ઠો, ડય્હમાનોવ મત્થકે;
ભવરાગપ્પહાનાય, સતો ભિક્ખુ પરિબ્બજે’’.
૧૧૭૩. ‘‘ચોદિતો ભાવિતત્તેન, સરીરન્તિમધારિના;
મિગારમાતુપાસાદં, પાદઙ્ગુટ્ઠેન કમ્પયિં.
૧૧૭૪. ‘‘નયિદં સિથિલમારબ્ભ, નયિદં અપ્પેન થામસા;
નિબ્બાનમધિગન્તબ્બં, સબ્બગન્થ-પમોચનં.
૧૧૭૫. ‘‘અયઞ્ચ દહરો ભિક્ખુ, અયમુત્તમપોરિસો;
ધારેતિ અન્તિમં દેહં, જેત્વા મારં સવાહિનિં [સવાહનં (ક.)].
૧૧૭૬. ‘‘વિવરમનુપભન્તિ વિજ્જુતા, વેભારસ્સ ચ પણ્ડવસ્સ ચ;
નગવિવરગતો ઝાયતિ, પુત્તો અપ્પટિમસ્સ તાદિનો.
૧૧૭૭. ‘‘ઉપસન્તો ઉપરતો, પન્તસેનાસનો મુનિ;
દાયાદો બુદ્ધસેટ્ઠસ્સ, બ્રહ્મુના અભિવન્દિતો.
૧૧૭૮. ‘‘ઉપસન્તં ઉપરતં, પન્તસેનાસનં મુનિં;
દાયાદં બુદ્ધસેટ્ઠસ્સ, વન્દ બ્રાહ્મણ કસ્સપં.
૧૧૭૯. ‘‘યો ચ જાતિસતં ગચ્છે, સબ્બા બ્રાહ્મણજાતિયો;
સોત્તિયો વેદસમ્પન્નો, મનુસ્સેસુ પુનપ્પુનં.
૧૧૮૦. ‘‘અજ્ઝાયકોપિ ચે અસ્સ, તિણ્ણં વેદાન પારગૂ;
એતસ્સ વન્દનાયેતં, કલં નાગ્ઘતિ સોળસિં.
૧૧૮૧. ‘‘યો સો અટ્ઠ વિમોક્ખાનિ, પુરેભત્તં અફસ્સયિ [અપસ્સયિ (સી. ક.), અફુસ્સયિ (સ્યા.)];
અનુલોમં પટિલોમં, તતો પિણ્ડાય ગચ્છતિ.
૧૧૮૨. ‘‘તાદિસં ભિક્ખું માસાદિ [મા હનિ (સી.)], માત્તાનં ખણિ બ્રાહ્મણ;
અભિપ્પસાદેહિ મનં, અરહન્તમ્હિ તાદિને;
ખિપ્પં પઞ્જલિકો વન્દ, મા તે વિજટિ મત્થકં.
૧૧૮૩. ‘‘નેસો પસ્સતિ સદ્ધમ્મં, સંસારેન પુરક્ખતો;
અધોગમં જિમ્હપથં, કુમ્મગ્ગમનુધાવતિ.
૧૧૮૪. ‘‘કિમીવ મીળ્હસલ્લિત્તો, સઙ્ખારે અધિમુચ્છિતો;
પગાળ્હો લાભસક્કારે, તુચ્છો ગચ્છતિ પોટ્ઠિલો.
૧૧૮૫. ‘‘ઇમઞ્ચ પસ્સ આયન્તં, સારિપુત્તં સુદસ્સનં;
વિમુત્તં ઉભતોભાગે, અજ્ઝત્તં સુસમાહિતં.
૧૧૮૬. ‘‘વિસલ્લં ખીણસંયોગં, તેવિજ્જં મચ્ચુહાયિનં;
દક્ખિણેય્યં મનુસ્સાનં, પુઞ્ઞક્ખેત્તં અનુત્તરં.
૧૧૮૭. ‘‘એતે સમ્બહુલા દેવા, ઇદ્ધિમન્તો યસસ્સિનો;
દસ દેવસહસ્સાનિ, સબ્બે બ્રહ્મપુરોહિતા;
મોગ્ગલ્લાનં નમસ્સન્તા, તિટ્ઠન્તિ પઞ્જલીકતા.
૧૧૮૮. ‘‘‘નમો તે પુરિસાજઞ્ઞ, નમો તે પુરિસુત્તમ;
યસ્સ તે આસવા ખીણા, દક્ખિણેય્યોસિ મારિસ’.
૧૧૮૯. ‘‘પૂજિતો નરદેવેન, ઉપ્પન્નો મરણાભિભૂ;
પુણ્ડરીકંવ તોયેન, સઙ્ખારેનુપલિપ્પતિ.
૧૧૯૦. ‘‘યસ્સ મુહુત્તેન સહસ્સધા લોકો, સંવિદિતો સબ્રહ્મકપ્પો વસિ;
ઇદ્ધિગુણે ચુતુપપાતે કાલે, પસ્સતિ દેવતા સ ભિક્ખુ.
૧૧૯૧. ‘‘સારિપુત્તોવ પઞ્ઞાય, સીલેન ઉપસમેન ચ;
યોપિ પારઙ્ગતો ભિક્ખુ, એતાવપરમો સિયા.
૧૧૯૨. ‘‘કોટિસતસહસ્સસ્સ, અત્તભાવં ખણેન નિમ્મિને;
અહં વિકુબ્બનાસુ કુસલો, વસીભૂતોમ્હિ ઇદ્ધિયા.
૧૧૯૩. ‘‘સમાધિવિજ્જાવસિપારમીગતો, મોગ્ગલ્લાનગોત્તો અસિતસ્સ સાસને;
ધીરો સમુચ્છિન્દિ સમાહિતિન્દ્રિયો, નાગો યથા પૂતિલતંવ બન્ધનં.
૧૧૯૪. ‘‘પરિચિણ્ણો મયા સત્થા, કતં બુદ્ધસ્સ સાસનં;
ઓહિતો ગરુકો ભારો, ભવનેત્તિ સમૂહતા.
૧૧૯૫. ‘‘યસ્સ ચત્થાય પબ્બજિતો, અગારસ્માનગારિયં;
સો મે અત્થો અનુપ્પત્તો, સબ્બસંયોજનક્ખયો.
૧૧૯૬. [મ. નિ. ૧.૫૧૩] ‘‘કીદિસો નિરયો આસિ, યત્થ દુસ્સી અપચ્ચથ;
વિધુરં સાવકમાસજ્જ, કકુસન્ધઞ્ચ બ્રાહ્મણં.
૧૧૯૭. ‘‘સતં આસિ અયોસઙ્કૂ, સબ્બે પચ્ચત્તવેદના;
ઈદિસો નિરયો આસિ, યત્થ દુસ્સી અપચ્ચથ;
વિધુરં સાવકમાસજ્જ, કકુસન્ધઞ્ચ બ્રાહ્મણં.
૧૧૯૮. ‘‘યો એતમભિજાનાતિ, ભિક્ખુ બુદ્ધસ્સ સાવકો;
તાદિસં ભિક્ખુમાસજ્જ, કણ્હ દુક્ખં નિગચ્છસિ.
૧૧૯૯. ‘‘મજ્ઝેસરસ્મિં [સરસ્સ (સી.), સાગરસ્મિં (ક.)] તિટ્ઠન્તિ, વિમાના કપ્પઠાયિનો;
વેળુરિયવણ્ણા રુચિરા, અચ્ચિમન્તો પભસ્સરા;
અચ્છરા તત્થ નચ્ચન્તિ, પુથુ નાનત્તવણ્ણિયો.
૧૨૦૦. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૦૧. ‘‘યો વે બુદ્ધેન ચોદિતો, ભિક્ખુસઙ્ઘસ્સ પેક્ખતો;
મિગારમાતુપાસાદં, પાદઙ્ગુટ્ઠેન કમ્પયિ.
૧૨૦૨. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૦૩. ‘‘યો વેજયન્તપાસાદં, પાદઙ્ગુટ્ઠેન કમ્પયિ;
ઇદ્ધિબલેનુપત્થદ્ધો, સંવેજેસિ ચ દેવતા.
૧૨૦૪. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૦૪. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૦૫. ‘‘યો વેજયન્તપાસાદે, સક્કં સો પરિપુચ્છતિ;
અપિ આવુસો જાનાસિ, તણ્હક્ખયવિમુત્તિયો;
તસ્સ સક્કો વિયાકાસિ, પઞ્હં પુટ્ઠો યથાતથં.
૧૨૦૬. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૦૭. ‘‘યો બ્રહ્માનં પરિપુચ્છતિ, સુધમ્માયં ઠિતો [સુધમ્માયા’ભિતો (સ્યા.)] સભં;
અજ્જાપિ ત્યાવુસો સા દિટ્ઠિ, યા તે દિટ્ઠિ પુરે અહુ;
પસ્સસિ વીતિવત્તન્તં, બ્રહ્મલોકે પભસ્સરં.
૧૨૦૮. ‘‘તસ્સ બ્રહ્મા વિયાકાસિ, પઞ્હં પુટ્ઠો યથાતથં;
ન મે મારિસ સા દિટ્ઠિ, યા મે દિટ્ઠિ પુરે અહુ.
૧૨૦૯. ‘‘પસ્સામિ વીતિવત્તન્તં, બ્રહ્મલોકે પભસ્સરં;
સોહં અજ્જ કથં વજ્જં, અહં નિચ્ચોમ્હિ સસ્સતો.
૧૨૧૦. ‘‘યો એતમભિજાનાતિ…પે… કણ્હ દુક્ખં નિગચ્છસિ.
૧૨૧૧. ‘‘યો મહાનેરુનો કૂટં, વિમોક્ખેન અફસ્સયિ [અપસ્સયિ (સી. ક.)];
વનં પુબ્બવિદેહાનં, યે ચ ભૂમિસયા નરા.
૧૨૧૨. ‘‘યો એતમભિજાનાતિ, ભિક્ખુ બુદ્ધસ્સ સાવકો;
તાદિસં ભિક્ખુમાસજ્જ, કણ્હ દુક્ખં નિગચ્છસિ.
૧૨૧૩. ‘‘ન વે અગ્ગિ ચેતયતિ, અહં બાલં ડહામીતિ;
બાલોવ જલિતં અગ્ગિં, આસજ્જ નં પડય્હતિ.
૧૨૧૪. ‘‘એવમેવ તુવં માર, આસજ્જ નં તથાગતં;
સયં ડહિસ્સસિ અત્તાનં, બાલો અગ્ગિંવ સમ્ફુસં.
૧૨૧૫. ‘‘અપુઞ્ઞં પસવી મારો, આસજ્જ નં તથાગતં;
કિં નુ મઞ્ઞસિ પાપિમ, ન મે પાપં વિપચ્ચતિ.
૧૨૧૬. ‘‘કરતો તે ચીયતે [મિય્યતે (સબ્બત્થ) મ. નિ. ૧.૫૧૩ પસ્સિતબ્બં] પાપં, ચિરરત્તાય અન્તક;
માર નિબ્બિન્દ બુદ્ધમ્હા, આસં માકાસિ ભિક્ખુસુ.
૧૨૧૭. ‘‘ઇતિ મારં અતજ્જેસિ, ભિક્ખુ ભેસકળાવને;
તતો સો દુમ્મનો યક્ખો, તત્થેવન્તરધાયથા’’તિ.
ઇત્થં સુદં આયસ્મા મહામોગ્ગલ્લાનો [મહામોગ્ગલાનો (ક.)] થેરો ગાથાયો અભાસિત્થાતિ.
સટ્ઠિનિપાતો નિટ્ઠિતો.