૮. અઙ્ગુલિમાલત્થેરગાથા

૮૬૬. ‘‘ગચ્છં વદેસિ સમણ ‘ટ્ઠિતોમ્હિ’, મમઞ્ચ બ્રૂસિ ઠિતમટ્ઠિતોતિ;

પુચ્છામિ તં સમણ એતમત્થં, ‘કથં ઠિતો ત્વં અહમટ્ઠિતોમ્હિ’’’.

૮૬૭. ‘‘ઠિતો અહં અઙ્ગુલિમાલ સબ્બદા, સબ્બેસુ ભૂતેસુ નિધાય દણ્ડં;

તુવઞ્ચ પાણેસુ અસઞ્ઞતોસિ, તસ્મા ઠિતોહં તુવમટ્ઠિતોસિ’’.

૮૬૮. ‘‘ચિરસ્સં વત મે મહિતો મહેસી, મહાવનં સમણો પચ્ચપાદિ [પચ્ચુપાદિ (સબ્બત્થ)];

સોહં ચજિસ્સામિ સહસ્સપાપં, સુત્વાન ગાથં તવ ધમ્મયુત્તં’’.

૮૬૯. ઇચ્ચેવ ચોરો અસિમાવુધઞ્ચ, સોબ્ભે પપાતે નરકે અન્વકાસિ [અકિરિ (મ. નિ. ૨.૩૪૯)];

અવન્દિ ચોરો સુગતસ્સ પાદે, તત્થેવ પબ્બજ્જમયાચિ બુદ્ધં.

૮૭૦. બુદ્ધો ચ ખો કારુણિકો મહેસિ, યો સત્થા લોકસ્સ સદેવકસ્સ;

‘તમેહિ ભિક્ખૂ’તિ તદા અવોચ, એસેવ તસ્સ અહુ ભિક્ખુભાવો.

૮૭૧. ‘‘યો ચ પુબ્બે પમજ્જિત્વા, પચ્છા સો નપ્પમજ્જતિ;

સોમં લોકં પભાસેતિ, અબ્ભા મુત્તોવ ચન્દિમા.

૮૭૨. ‘‘યસ્સ પાપં કતં કમ્મં, કુસલેન પિધીયતિ [પિથીયતિ (સી. સ્યા.)];

સોમં લોકં પભાસેતિ, અબ્ભા મુત્તોવ ચન્દિમા.

૮૭૩. ‘‘યો હવે દહરો ભિક્ખુ, યુઞ્જતિ બુદ્ધસાસને;

સોમં લોકં પભાસેતિ, અબ્ભા મુત્તોવ ચન્દિમા.

૮૭૪. [દિસા હિ (સ્યા. ક., મ. નિ. ૨.૩૫૨)] ‘‘દિસાપિ મે ધમ્મકથં સુણન્તુ, દિસાપિ મે યુઞ્જન્તુ બુદ્ધસાસને;

દિસાપિ મે તે મનુજે ભજન્તુ, યે ધમ્મમેવાદપયન્તિ સન્તો.

૮૭૫. ‘‘દિસા હિ મે ખન્તિવાદાનં, અવિરોધપ્પસંસિનં;

સુણન્તુ ધમ્મં કાલેન, તઞ્ચ અનુવિધીયન્તુ.

૮૭૬. ‘‘ન હિ જાતુ સો મમં હિંસે, અઞ્ઞં વા પન કિઞ્ચનં [કઞ્ચિનં (સી. સ્યા.), કઞ્ચનં (?)];

પપ્પુય્ય પરમં સન્તિં, રક્ખેય્ય તસથાવરે.

૮૭૭. [થેરગા. ૧૯] ‘‘ઉદકઞ્હિ નયન્તિ નેત્તિકા, ઉસુકારા નમયન્તિ [દમયન્તિ (ક.)] તેજનં;

દારું નમયન્તિ [દમયન્તિ (ક.)] તચ્છકા, અત્તાનં દમયન્તિ પણ્ડિતા.

૮૭૮. ‘‘દણ્ડેનેકે દમયન્તિ, અઙ્કુસેભિ કસાહિ ચ;

અદણ્ડેન અસત્થેન, અહં દન્તોમ્હિ તાદિના.

૮૭૯. ‘‘‘અહિંસકો’તિ મે નામં, હિંસકસ્સ પુરે સતો;

અજ્જાહં સચ્ચનામોમ્હિ, ન નં હિંસામિ કિઞ્ચનં [કઞ્ચિનં (સી. સ્યા.), કઞ્ચનં (?)].

૮૮૦. ‘‘ચોરો અહં પુરે આસિં, અઙ્ગુલિમાલોતિ વિસ્સુતો;

વુય્હમાનો મહોઘેન, બુદ્ધં સરણમાગમં.

૮૮૧. ‘‘લોહિતપાણિ પુરે આસિં, અઙ્ગુલિમાલોતિ વિસ્સુતો;

સરણગમનં પસ્સ, ભવનેત્તિ સમૂહતા.

૮૮૨. ‘‘તાદિસં કમ્મં કત્વાન, બહું દુગ્ગતિગામિનં;

ફુટ્ઠો કમ્મવિપાકેન, અનણો ભુઞ્જામિ ભોજનં.

૮૮૩. ‘‘પમાદમનુયુઞ્જન્તિ, બાલા દુમ્મેધિનો જના;

અપ્પમાદઞ્ચ મેધાવી, ધનં સેટ્ઠંવ રક્ખતિ.

૮૮૪. ‘‘મા પમાદમનુયુઞ્જેથ, મા કામરતિસન્થવં [સન્ધવં (ક.)];

અપ્પમત્તો હિ ઝાયન્તો, પપ્પોતિ પરમં સુખં.

૮૮૫. ‘‘સ્વાગતં નાપગતં, નેતં દુમ્મન્તિતં મમ;

સવિભત્તેસુ ધમ્મેસુ, યં સેટ્ઠં તદુપાગમં.

૮૮૬. ‘‘સ્વાગતં નાપગતં, નેતં દુમ્મન્તિતં મમ;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૮૮૭. ‘‘અરઞ્ઞે રુક્ખમૂલે વા, પબ્બતેસુ ગુહાસુ વા;

તત્થ તત્થેવ અટ્ઠાસિં, ઉબ્બિગ્ગમનસો તદા.

૮૮૮. ‘‘સુખં સયામિ ઠાયામિ, સુખં કપ્પેમિ જીવિતં;

અહત્થપાસો મારસ્સ, અહો સત્થાનુકમ્પિતો.

૮૮૯. ‘‘બ્રહ્મજચ્ચો પુરે આસિં, ઉદિચ્ચો ઉભતો અહુ;

સોજ્જ પુત્તો સુગતસ્સ, ધમ્મરાજસ્સ સત્થુનો.

૮૯૦. ‘‘વીતતણ્હો અનાદાનો, ગુત્તદ્વારો સુસંવુતો;

અઘમૂલં વધિત્વાન, પત્તો મે આસવક્ખયો.

૮૯૧. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, ભવનેત્તિ સમૂહતા’’તિ.

… અઙ્ગુલિમાલો થેરો….