૬. સેલત્થેરગાથા

૮૧૮. ‘‘પરિપુણ્ણકાયો સુરુચિ, સુજાતો ચારુદસ્સનો;

સુવણ્ણવણ્ણોસિ ભગવા, સુસુક્કદાઠોસિ વીરિયવા [સુસુક્કદાઠો વિરીયવા (સી.)].

૮૧૯. ‘‘નરસ્સ હિ સુજાતસ્સ, યે ભવન્તિ વિયઞ્જના;

સબ્બે તે તવ કાયસ્મિં, મહાપુરિસલક્ખણા.

૮૨૦. ‘‘પસન્નનેત્તો સુમુખો, બ્રહા ઉજુ પતાપવા;

મજ્ઝે સમણસઙ્ઘસ્સ, આદિચ્ચોવ વિરોચસિ.

૮૨૧. ‘‘કલ્યાણદસ્સનો ભિક્ખુ, કઞ્ચનસન્નિભત્તચો;

કિં તે સમણભાવેન, એવં ઉત્તમવણ્ણિનો.

૮૨૨. ‘‘રાજા અરહસિ ભવિતું, ચક્કવત્તી રથેસભો;

ચાતુરન્તો વિજિતાવી, જમ્બુસણ્ડસ્સ [જમ્બુમણ્ડસ્સ (ક.)] ઇસ્સરો.

૮૨૩. ‘‘ખત્તિયા ભોગી રાજાનો [ભોગા રાજાનો (સી. ક.), ભોજરાજાનો (સ્યા.)], અનુયન્તા ભવન્તિ તે;

રાજાભિરાજા [રાજાધિરાજા (સી. ક.)] મનુજિન્દો, રજ્જં કારેહિ ગોતમ’’.

૮૨૪. ‘‘રાજાહમસ્મિ સેલ, (સેલાતિ ભગવા) ધમ્મરાજા અનુત્તરો;

ધમ્મેન ચક્કં વત્તેમિ, ચક્કં અપ્પટિવત્તિયં’’.

૮૨૫. ‘‘સમ્બુદ્ધો પટિજાનાસિ, (ઇતિ સેલો બ્રાહ્મણો) ધમ્મરાજા અનુત્તરો;

‘ધમ્મેન ચક્કં વત્તેમિ’, ઇતિ ભાસથ ગોતમ.

૮૨૬. ‘‘કો નુ સેનાપતિ ભોતો, સાવકો સત્થુરન્વયો [અન્વયો (સી.)];

કો તેતમનુવત્તેતિ, ધમ્મચક્કં પવત્તિતં’’.

૮૨૭. ‘‘મયા પવત્તિતં ચક્કં, (સેલાતિ ભગવા) ધમ્મચક્કં અનુત્તરં;

સારિપુત્તો અનુવત્તેતિ, અનુજાતો તથાગતં.

૮૨૮. ‘‘અભિઞ્ઞેય્યં અભિઞ્ઞાતં, ભાવેતબ્બઞ્ચ ભાવિતં;

પહાતબ્બં પહીનં મે, તસ્મા બુદ્ધોસ્મિ બ્રાહ્મણ.

૮૨૯. ‘‘વિનયસ્સુ મયિ કઙ્ખં, અધિમુઞ્ચસ્સુ બ્રાહ્મણ;

દુલ્લભં દસ્સનં હોતિ, સમ્બુદ્ધાનં અભિણ્હસો.

૮૩૦. ‘‘યેસં વે દુલ્લભો લોકે, પાતુભાવો અભિણ્હસો;

સોહં બ્રાહ્મણ બુદ્ધોસ્મિ, સલ્લકત્તો [સલ્લકન્તો (સી.)] અનુત્તરો.

૮૩૧. ‘‘બ્રહ્મભૂતો અતિતુલો, મારસેનપ્પમદ્દનો;

સબ્બામિત્તે વસે [વસી (સ્યા. ક., મ. નિ. ૨.૩૯૯; સુ. નિ. ૯૬૬)] કત્વા, મોદામિ અકુતોભયો’’.

૮૩૨. ‘‘ઇદં ભોન્તો નિસામેથ, યથા ભાસતિ ચક્ખુમા;

સલ્લકત્તો મહાવીરો, સીહોવ નદતી વને.

૮૩૩. ‘‘બ્રહ્મભૂતં અતિતુલં, મારસેનપ્પમદ્દનં;

કો દિસ્વા નપ્પસીદેય્ય, અપિ કણ્હાભિજાતિકો.

૮૩૪. ‘‘યો મં ઇચ્છતિ અન્વેતુ, યો વા નિચ્છતિ ગચ્છતુ;

ઇધાહં પબ્બજિસ્સામિ, વરપઞ્ઞસ્સ સન્તિકે’’.

૮૩૫. ‘‘એતં ચે રુચ્ચતિ ભોતો, સમ્માસમ્બુદ્ધસાસનં;

મયમ્પિ પબ્બજિસ્સામ, વરપઞ્ઞસ્સ સન્તિકે.

૮૩૬. ‘‘બ્રાહ્મણા તિસતા ઇમે, યાચન્તિ પઞ્જલીકતા;

‘બ્રહ્મચરિયં ચરિસ્સામ, ભગવા તવ સન્તિકે’’’.

૮૩૭. ‘‘સ્વાખાતં બ્રહ્મચરિયં, (સેલાતિ ભગવા) સન્દિટ્ઠિકમકાલિકં;

યત્થ અમોઘા પબ્બજ્જા, અપ્પમત્તસ્સ સિક્ખતો’’.

૮૩૮. ‘‘યં તં સરણમાગમ્હ [સરણમાગમ્મ (સબ્બત્થ)], ઇતો અટ્ઠમે [અટ્ઠમિ (સ્યા. ક.)] ચક્ખુમ;

સત્તરત્તેન ભગવા, દન્તામ્હ તવ સાસને.

૮૩૯. ‘‘તુવં બુદ્ધો તુવં સત્થા, તુવં મારાભિભૂ મુનિ;

તુવં અનુસયે છેત્વા, તિણ્ણો તારેસિમં પજં.

૮૪૦. ‘‘ઉપધી તે સમતિક્કન્તા, આસવા તે પદાલિતા;

સીહોવ અનુપાદાનો, પહીનભયભેરવો.

૮૪૧. ‘‘ભિક્ખવો તિસતા ઇમે, તિટ્ઠન્તિ પઞ્જલીકતા;

પાદે વીર પસારેહિ, નાગા વન્દન્તુ સત્થુનો’’તિ.

… સેલો થેરો….