૩. તેલકાનિત્થેરગાથા

૭૪૭. ‘‘ચિરરત્તં વતાતાપી, ધમ્મં અનુવિચિન્તયં;

સમં ચિત્તસ્સ નાલત્થં, પુચ્છં સમણબ્રાહ્મણે.

૭૪૮. ‘‘‘કો સો પારઙ્ગતો લોકે, કો પત્તો અમતોગધં;

કસ્સ ધમ્મં પટિચ્છામિ, પરમત્થવિજાનનં’.

૭૪૯. ‘‘અન્તોવઙ્કગતો આસિ, મચ્છોવ ઘસમામિસં;

બદ્ધો મહિન્દપાસેન, વેપચિત્યસુરો યથા.

૭૫૦. ‘‘અઞ્છામિ નં ન મુઞ્ચામિ, અસ્મા સોકપરિદ્દવા;

કો મે બન્ધં મુઞ્ચં લોકે, સમ્બોધિં વેદયિસ્સતિ.

૭૫૧. ‘‘સમણં બ્રાહ્મણં વા કં, આદિસન્તં પભઙ્ગુનં.

કસ્સ ધમ્મં પટિચ્છામિ, જરામચ્ચુપવાહનં.

૭૫૨. ‘‘વિચિકિચ્છાકઙ્ખાગન્થિતં, સારમ્ભબલસઞ્ઞુતં;

કોધપ્પત્તમનત્થદ્ધં, અભિજપ્પપ્પદારણં.

૭૫૩. ‘‘તણ્હાધનુસમુટ્ઠાનં, દ્વે ચ પન્નરસાયુતં [દ્વેધાપન્નરસાયુતં (?)];

પસ્સ ઓરસિકં બાળ્હં, ભેત્વાન યદિ [યદ (સી. અટ્ઠ.) હદિ (?) ‘‘હદયે’’તિ તંસંવણ્ણના] તિટ્ઠતિ.

૭૫૪. ‘‘અનુદિટ્ઠીનં અપ્પહાનં, સઙ્કપ્પપરતેજિતં;

તેન વિદ્ધો પવેધામિ, પત્તંવ માલુતેરિતં.

૭૫૫. ‘‘અજ્ઝત્તં મે સમુટ્ઠાય, ખિપ્પં પચ્ચતિ મામકં;

છફસ્સાયતની કાયો, યત્થ સરતિ સબ્બદા.

૭૫૬. ‘‘તં ન પસ્સામિ તેકિચ્છં, યો મેતં સલ્લમુદ્ધરે;

નાનારજ્જેન સત્થેન [નારગ્ગેન ન સત્થેન (?)], નાઞ્ઞેન વિચિકિચ્છિતં.

૭૫૭. ‘‘કો મે અસત્થો અવણો, સલ્લમબ્ભન્તરપસ્સયં;

અહિંસં સબ્બગત્તાનિ, સલ્લં મે ઉદ્ધરિસ્સતિ.

૭૫૮. ‘‘ધમ્મપ્પતિ હિ સો સેટ્ઠો, વિસદોસપ્પવાહકો;

ગમ્ભીરે પતિતસ્સ મે, થલં પાણિઞ્ચ દસ્સયે.

૭૫૯. ‘‘રહદેહમસ્મિ ઓગાળ્હો, અહારિયરજમત્તિકે;

માયાઉસૂયસારમ્ભ, થિનમિદ્ધમપત્થટે.

૭૬૦. ‘‘ઉદ્ધચ્ચમેઘથનિતં, સંયોજનવલાહકં;

વાહા વહન્તિ કુદ્દિટ્ઠિં [દુદ્દિટ્ઠિં (સી. ધ. પ. ૩૩૯)], સઙ્કપ્પા રાગનિસ્સિતા.

૭૬૧. ‘‘સવન્તિ સબ્બધિ સોતા, લતા ઉબ્ભિજ્જ તિટ્ઠતિ;

તે સોતે કો નિવારેય્ય, તં લતં કો હિ છેચ્છતિ.

૭૬૨. ‘‘વેલં કરોથ ભદ્દન્તે, સોતાનં સન્નિવારણં;

મા તે મનોમયો સોતો, રુક્ખંવ સહસા લુવે.

૭૬૩. ‘‘એવં મે ભયજાતસ્સ, અપારા પારમેસતો;

તાણો પઞ્ઞાવુધો સત્થા, ઇસિસઙ્ઘનિસેવિતો.

૭૬૪. ‘‘સોપાણં સુગતં સુદ્ધં, ધમ્મસારમયં દળ્હં;

પાદાસિ વુય્હમાનસ્સ, ‘મા ભાયી’તિ ચ મબ્રવિ.

૭૬૫. ‘‘સતિપટ્ઠાનપાસાદં, આરુય્હ પચ્ચવેક્ખિસં;

યં તં પુબ્બે અમઞ્ઞિસ્સં, સક્કાયાભિરતં પજં.

૭૬૬. ‘‘યદા ચ મગ્ગમદ્દક્ખિં, નાવાય અભિરૂહનં;

અનધિટ્ઠાય અત્તાનં, તિત્થમદ્દક્ખિમુત્તમં.

૭૬૭. ‘‘સલ્લં અત્તસમુટ્ઠાનં, ભવનેત્તિપ્પભાવિતં;

એતેસં અપ્પવત્તાય [અપ્પવત્તિયા (?)], દેસેસિ મગ્ગમુત્તમં.

૭૬૮. ‘‘દીઘરત્તાનુસયિતં, ચિરરત્તમધિટ્ઠિતં;

બુદ્ધો મેપાનુદી ગન્થં, વિસદોસપ્પવાહનો’’તિ.

…તેલકાનિ થેરો….