૧૫. સોળસકનિપાતો

૧. અઞ્ઞાસિકોણ્ડઞ્ઞત્થેરગાથા

૬૭૩. ‘‘એસ ભિય્યો પસીદામિ, સુત્વા ધમ્મં મહારસં;

વિરાગો દેસિતો ધમ્મો, અનુપાદાય સબ્બસો.

૬૭૪. ‘‘બહૂનિ લોકે ચિત્રાનિ, અસ્મિં પથવિમણ્ડલે;

મથેન્તિ મઞ્ઞે સઙ્કપ્પં, સુભં રાગૂપસંહિતં.

૬૭૫. ‘‘રજમુહતઞ્ચ વાતેન, યથા મેઘોપસમ્મયે;

એવં સમ્મન્તિ સઙ્કપ્પા, યદા પઞ્ઞાય પસ્સતિ.

૬૭૬. [ધ. પ. ૨૭૭ ધમ્મપદે] ‘‘સબ્બે સઙ્ખારા અનિચ્ચાતિ, યદા પઞ્ઞાય પસ્સતિ;

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૬૭૭. [ધ. પ. ૨૭૮ ધમ્મપદે] ‘‘સબ્બે સઙ્ખારા દુક્ખાતિ, યદા પઞ્ઞાય પસ્સતિ

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૬૭૮. [ધ. પ. ૨૭૯ ધમ્મપદે] ‘‘સબ્બે ધમ્મા અનત્તાતિ, યદા પઞ્ઞાય પસ્સતિ;

અથ નિબ્બિન્દતિ દુક્ખે, એસ મગ્ગો વિસુદ્ધિયા.

૬૭૯. ‘‘બુદ્ધાનુબુદ્ધો યો થેરો, કોણ્ડઞ્ઞો તિબ્બનિક્કમો;

પહીનજાતિમરણો, બ્રહ્મચરિયસ્સ કેવલી.

૬૮૦. ‘‘ઓઘપાસો દળ્હખિલો [દળ્હો ખિલો (સ્યા. ક.)], પબ્બતો દુપ્પદાલયો;

છેત્વા ખિલઞ્ચ પાસઞ્ચ, સેલં ભેત્વાન [છેત્વાન (ક.)] દુબ્ભિદં;

તિણ્ણો પારઙ્ગતો ઝાયી, મુત્તો સો મારબન્ધના.

૬૮૧. ‘‘ઉદ્ધતો ચપલો ભિક્ખુ, મિત્તે આગમ્મ પાપકે;

સંસીદતિ મહોઘસ્મિં, ઊમિયા પટિકુજ્જિતો.

૬૮૨. ‘‘અનુદ્ધતો અચપલો, નિપકો સંવુતિન્દ્રિયો;

કલ્યાણમિત્તો મેધાવી, દુક્ખસ્સન્તકરો સિયા.

૬૮૩. ‘‘કાલપબ્બઙ્ગસઙ્કાસો, કિસો ધમનિસન્થતો;

મત્તઞ્ઞૂ અન્નપાનસ્મિં, અદીનમનસો નરો.

૬૮૪. ‘‘ફુટ્ઠો ડંસેહિ મકસેહિ, અરઞ્ઞસ્મિં બ્રહાવને;

નાગો સઙ્ગામસીસેવ, સતો તત્રાધિવાસયે.

૬૮૫. ‘‘નાભિનન્દામિ મરણં…પે… નિબ્બિસં ભતકો યથા.

૬૮૬. ‘‘નાભિનન્દામિ મરણં…પે… સમ્પજાનો પતિસ્સતો.

૬૮૭. ‘‘પરિચિણ્ણો મયા સત્થા…પે… ભવનેત્તિ સમૂહતા.

૬૮૮. ‘‘યસ્સ ચત્થાય પબ્બજિતો, અગારસ્માનગારિયં;

સો મે અત્થો અનુપ્પત્તો, કિં મે સદ્ધિવિહારિના’’તિ.

… અઞ્ઞાસિકોણ્ડઞ્ઞો [અઞ્ઞાકોણ્ડઞ્ઞો (સી. સ્યા.)] થેરો….

૨. ઉદાયિત્થેરગાથા

૬૮૯. [અ. નિ. ૬.૪૩] ‘‘મનુસ્સભૂતં સમ્બુદ્ધં, અત્તદન્તં સમાહિતં;

ઇરિયમાનં બ્રહ્મપથે, ચિત્તસ્સૂપસમે રતં.

૬૯૦. ‘‘યં મનુસ્સા નમસ્સન્તિ, સબ્બધમ્માન પારગું;

દેવાપિ તં નમસ્સન્તિ, ઇતિ મે અરહતો સુતં.

૬૯૧. ‘‘સબ્બસંયોજનાતીતં, વના નિબ્બનમાગતં;

કામેહિ નેક્ખમ્મરતં [નિક્ખમ્મરતં (ક.)], મુત્તં સેલાવ કઞ્ચનં.

૬૯૨. ‘‘સ વે અચ્ચરુચિ નાગો, હિમવાવઞ્ઞે સિલુચ્ચયે;

સબ્બેસં નાગનામાનં, સચ્ચનામો અનુત્તરો.

૬૯૩. ‘‘નાગં વો કિત્તયિસ્સામિ, ન હિ આગું કરોતિ સો;

સોરચ્ચં અવિહિંસા ચ, પાદા નાગસ્સ તે દુવે.

૬૯૪. ‘‘સતિ ચ સમ્પજઞ્ઞઞ્ચ, ચરણા નાગસ્સ તેપરે;

સદ્ધાહત્થો મહાનાગો, ઉપેક્ખાસેતદન્તવા.

૬૯૫. ‘‘સતિ ગીવા સિરો પઞ્ઞા, વીમંસા ધમ્મચિન્તના;

ધમ્મકુચ્છિસમાવાસો, વિવેકો તસ્સ વાલધિ.

૬૯૬. ‘‘સો ઝાયી અસ્સાસરતો, અજ્ઝત્તં સુસમાહિતો;

ગચ્છં સમાહિતો નાગો, ઠિતો નાગો સમાહિતો.

૬૯૭. ‘‘સયં સમાહિતો નાગો, નિસિન્નોપિ સમાહિતો;

સબ્બત્થ સંવુતો નાગો, એસા નાગસ્સ સમ્પદા.

૬૯૮. ‘‘ભુઞ્જતિ અનવજ્જાનિ, સાવજ્જાનિ ન ભુઞ્જતિ;

ઘાસમચ્છાદનં લદ્ધા, સન્નિધિં પરિવજ્જયં.

૬૯૯. ‘‘સંયોજનં અણું થૂલં, સબ્બં છેત્વાન બન્ધનં;

યેન યેનેવ ગચ્છતિ, અનપક્ખોવ ગચ્છતિ.

૭૦૦. ‘‘યથાપિ ઉદકે જાતં, પુણ્ડરીકં પવડ્ઢતિ;

નોપલિપ્પતિ તોયેન, સુચિગન્ધં મનોરમં.

૭૦૧. ‘‘તથેવ ચ લોકે જાતો, બુદ્ધો લોકે વિહરતિ;

નોપલિપ્પતિ લોકેન, તોયેન પદુમં યથા.

૭૦૨. ‘‘મહાગિનિ પજ્જલિતો, અનાહારોપસમ્મતિ;

અઙ્ગારેસુ ચ સન્તેસુ, નિબ્બુતોતિ પવુચ્ચતિ.

૭૦૩. ‘‘અત્થસ્સાયં વિઞ્ઞાપની, ઉપમા વિઞ્ઞૂહિ દેસિતા;

વિઞ્ઞિસ્સન્તિ મહાનાગા, નાગં નાગેન દેસિતં.

૭૦૪. ‘‘વીતરાગો વીતદોસો, વીતમોહો અનાસવો;

સરીરં વિજહં નાગો, પરિનિબ્બિસ્સત્યનાસવો’’તિ.

… ઉદાયી થેરો….

સોળસકનિપાતો નિટ્ઠિતો.