૧૪. ચુદ્દસકનિપાતો

૧. ખદિરવનિયરેવતત્થેરગાથા

૬૪૫. ‘‘યદા અહં પબ્બજિતો, અગારસ્માનગારિયં;

નાભિજાનામિ સઙ્કપ્પં, અનરિયં દોસસંહિતં.

૬૪૬. ‘‘‘ઇમે હઞ્ઞન્તુ વજ્ઝન્તુ, દુક્ખં પપ્પોન્તુ પાણિનો’;

સઙ્કપ્પં નાભિજાનામિ, ઇમસ્મિં દીઘમન્તરે.

૬૪૭. ‘‘મેત્તઞ્ચ અભિજાનામિ, અપ્પમાણં સુભાવિતં;

અનુપુબ્બં પરિચિતં, યથા બુદ્ધેન દેસિતં.

૬૪૮. ‘‘સબ્બમિત્તો સબ્બસખો, સબ્બભૂતાનુકમ્પકો;

મેત્તચિત્તઞ્ચ [મેત્તં ચિત્તં (સી. સ્યા.)] ભાવેમિ, અબ્યાપજ્જરતો [અબ્યાપજ્ઝરતો (સી. સ્યા.)] સદા.

૬૪૯. ‘‘અસંહીરં અસંકુપ્પં, ચિત્તં આમોદયામહં;

બ્રહ્મવિહારં ભાવેમિ, અકાપુરિસસેવિતં.

૬૫૦. ‘‘અવિતક્કં સમાપન્નો, સમ્માસમ્બુદ્ધસાવકો;

અરિયેન તુણ્હીભાવેન, ઉપેતો હોતિ તાવદે.

૬૫૧. ‘‘યથાપિ પબ્બતો સેલો, અચલો સુપ્પતિટ્ઠિતો;

એવં મોહક્ખયા ભિક્ખુ, પબ્બતોવ ન વેધતિ.

૬૫૨. ‘‘અનઙ્ગણસ્સ પોસસ્સ, નિચ્ચં સુચિગવેસિનો;

વાલગ્ગમત્તં પાપસ્સ, અબ્ભમત્તંવ ખાયતિ.

૬૫૩. ‘‘નગરં યથા પચ્ચન્તં, ગુત્તં સન્તરબાહિરં;

એવં ગોપેથ અત્તાનં, ખણો વો મા ઉપચ્ચગા.

૬૫૪. ‘‘નાભિનન્દામિ મરણં, નાભિનન્દામિ જીવિતં;

કાલઞ્ચ પટિકઙ્ખામિ, નિબ્બિસં ભતકો યથા.

૬૫૫. ‘‘નાભિનન્દામિ મરણં…પે… સમ્પજાનો પતિસ્સતો.

૬૫૬. ‘‘પરિચિણ્ણો મયા સત્થા, કતં બુદ્ધસ્સ સાસનં;

ઓહિતો ગરુકો ભારો, ભવનેત્તિ સમૂહતા.

૬૫૭. ‘‘યસ્સ ચત્થાય પબ્બજિતો, અગારસ્માનગારિયં;

સો મે અત્થો અનુપ્પત્તો, સબ્બસંયોજનક્ખયો.

૬૫૮. ‘‘સમ્પાદેથપ્પમાદેન, એસા મે અનુસાસની;

હન્દાહં પરિનિબ્બિસ્સં, વિપ્પમુત્તોમ્હિ સબ્બધી’’તિ.

… ખદિરવનિયરેવતો થેરો….

૨. ગોદત્તત્થેરગાથા

૬૫૯. ‘‘યથાપિ ભદ્દો આજઞ્ઞો, ધુરે યુત્તો ધુરસ્સહો [ધુરાસહો (અટ્ઠ.)];

મથિતો અતિભારેન, સંયુગં નાતિવત્તતિ.

૬૬૦. ‘‘એવં પઞ્ઞાય યે તિત્તા, સમુદ્દો વારિના યથા;

ન પરે અતિમઞ્ઞન્તિ, અરિયધમ્મોવ પાણિનં.

૬૬૧. ‘‘કાલે કાલવસં પત્તા, ભવાભવવસં ગતા;

નરા દુક્ખં નિગચ્છન્તિ, તેધ સોચન્તિ માણવા [માનવા (સી.)].

૬૬૨. ‘‘ઉન્નતા સુખધમ્મેન, દુક્ખધમ્મેન ચોનતા;

દ્વયેન બાલા હઞ્ઞન્તિ, યથાભૂતં અદસ્સિનો.

૬૬૩. ‘‘યે ચ દુક્ખે સુખસ્મિઞ્ચ, મજ્ઝે સિબ્બિનિમચ્ચગૂ;

ઠિતા તે ઇન્દખીલોવ, ન તે ઉન્નતઓનતા.

૬૬૪. ‘‘ન હેવ લાભે નાલાભે, ન યસે ન ચ કિત્તિયા;

ન નિન્દાયં પસંસાય, ન તે દુક્ખે સુખમ્હિ.

૬૬૫. ‘‘સબ્બત્થ તે ન લિમ્પન્તિ, ઉદબિન્દુવ પોક્ખરે;

સબ્બત્થ સુખિતા ધીરા, સબ્બત્થ અપરાજિતા.

૬૬૬. ‘‘ધમ્મેન ચ અલાભો યો, યો ચ લાભો અધમ્મિકો;

અલાભો ધમ્મિકો સેય્યો, યં ચે લાભો અધમ્મિકો.

૬૬૭. ‘‘યસો ચ અપ્પબુદ્ધીનં, વિઞ્ઞૂનં અયસો ચ યો;

અયસોવ સેય્યો વિઞ્ઞૂનં, ન યસો અપ્પબુદ્ધિનં.

૬૬૮. ‘‘દુમ્મેધેહિ પસંસા ચ, વિઞ્ઞૂહિ ગરહા ચ યા;

ગરહાવ સેય્યો વિઞ્ઞૂહિ, યં ચે બાલપ્પસંસના.

૬૬૯. ‘‘સુખઞ્ચ કામમયિકં, દુક્ખઞ્ચ પવિવેકિયં;

પવિવેકદુક્ખં સેય્યો, યં ચે કામમયં સુખં.

૬૭૦. ‘‘જીવિતઞ્ચ અધમ્મેન, ધમ્મેન મરણઞ્ચ યં;

મરણં ધમ્મિકં સેય્યો, યં ચે જીવે અધમ્મિકં.

૬૭૧. ‘‘કામકોપપ્પહીના યે, સન્તચિત્તા ભવાભવે;

ચરન્તિ લોકે અસિતા, નત્થિ તેસં પિયાપિયં.

૬૭૨. ‘‘ભાવયિત્વાન બોજ્ઝઙ્ગે, ઇન્દ્રિયાનિ બલાનિ ચ;

પપ્પુય્ય પરમં સન્તિં, પરિનિબ્બન્તિનાસવા’’તિ.

… ગોદત્તો થેરો….

ચુદ્દસકનિપાતો નિટ્ઠિતો.