૧૩. તેરસનિપાતો

૧. સોણકોળિવિસત્થેરગાથા

૬૩૨. ‘‘યાહુ રટ્ઠે સમુક્કટ્ઠો, રઞ્ઞો અઙ્ગસ્સ પદ્ધગૂ [પત્થગૂ (સ્યા.), પટ્ઠગૂ (ક.)];

સ્વાજ્જ ધમ્મેસુ ઉક્કટ્ઠો, સોણો દુક્ખસ્સ પારગૂ.

૬૩૩. ‘‘પઞ્ચ છિન્દે પઞ્ચ જહે, પઞ્ચ ચુત્તરિ ભાવયે;

પઞ્ચસઙ્ગાતિગો ભિક્ખુ, ઓઘતિણ્ણોતિ વુચ્ચતિ.

૬૩૪. ‘‘ઉન્નળસ્સ પમત્તસ્સ, બાહિરાસસ્સ [બાહિરાસયસ્સ (ક.)] ભિક્ખુનો;

સીલં સમાધિ પઞ્ઞા ચ, પારિપૂરિં ન ગચ્છતિ.

૬૩૫. ‘‘યઞ્હિ કિચ્ચં અપવિદ્ધં [તદપવિદ્ધં (સી. સ્યા.)], અકિચ્ચં પન કરીયતિ;

ઉન્નળાનં પમત્તાનં, તેસં વડ્ઢન્તિ આસવા.

૬૩૬. ‘‘યેસઞ્ચ સુસમારદ્ધા, નિચ્ચં કાયગતા સતિ;

અકિચ્ચં તે ન સેવન્તિ, કિચ્ચે સાતચ્ચકારિનો;

સતાનં સમ્પજાનાનં, અત્થં ગચ્છન્તિ આસવા.

૬૩૭. ‘‘ઉજુમગ્ગમ્હિ અક્ખાતે, ગચ્છથ મા નિવત્તથ;

અત્તના ચોદયત્તાનં, નિબ્બાનમભિહારયે.

૬૩૮. ‘‘અચ્ચારદ્ધમ્હિ વીરિયમ્હિ, સત્થા લોકે અનુત્તરો;

વીણોપમં કરિત્વા મે, ધમ્મં દેસેસિ ચક્ખુમા;

તસ્સાહં વચનં સુત્વા, વિહાસિં સાસને રતો.

૬૩૯. ‘‘સમથં પટિપાદેસિં, ઉત્તમત્થસ્સ પત્તિયા;

તિસ્સો વિજ્જા અનુપ્પત્તા, કતં બુદ્ધસ્સ સાસનં.

૬૪૦. ‘‘નેક્ખમ્મે [નિક્ખમે (ક.), નેક્ખમ્મં (મહાવ. ૨૪૪; અ. નિ. ૬.૫૫)] અધિમુત્તસ્સ, પવિવેકઞ્ચ ચેતસો;

અબ્યાપજ્ઝાધિમુત્તસ્સ [અબ્યાપજ્ઝાધિમ્હત્તસ્સ (ક.)], ઉપાદાનક્ખયસ્સ ચ.

૬૪૧. ‘‘તણ્હક્ખયાધિમુત્તસ્સ, અસમ્મોહઞ્ચ ચેતસો;

દિસ્વા આયતનુપ્પાદં, સમ્મા ચિત્તં વિમુચ્ચતિ.

૬૪૨. ‘‘તસ્સ સમ્મા વિમુત્તસ્સ, સન્તચિત્તસ્સ ભિક્ખુનો;

કતસ્સ પટિચયો નત્થિ, કરણીયં ન વિજ્જતિ.

૬૪૩. ‘‘સેલો યથા એકઘનો [એકઘનો (ક.)], વાતેન ન સમીરતિ;

એવં રૂપા રસા સદ્દા, ગન્ધા ફસ્સા ચ કેવલા.

૬૪૪. ‘‘ઇટ્ઠા ધમ્મા અનિટ્ઠા ચ, નપ્પવેધેન્તિ તાદિનો;

ઠિતં ચિત્તં વિસઞ્ઞુત્તં, વયઞ્ચસ્સાનુપસ્સતી’’તિ.

… સોણો કોળિવિસો થેરો….

તેરસનિપાતો નિટ્ઠિતો.