૧૨. દ્વાદસકનિપાતો

૧. સીલવત્થેરગાથા

૬૦૮. ‘‘સીલમેવિધ સિક્ખેથ, અસ્મિં લોકે સુસિક્ખિતં;

સીલં હિ સબ્બસમ્પત્તિં, ઉપનામેતિ સેવિતં.

૬૦૯. ‘‘સીલં રક્ખેય્ય મેધાવી, પત્થયાનો તયો સુખે;

પસંસં વિત્તિલાભઞ્ચ, પેચ્ચ સગ્ગે પમોદનં [પેચ્ચ સગ્ગે ચ મોદનં (સી. પી.)].

૬૧૦. ‘‘સીલવા હિ બહૂ મિત્તે, સઞ્ઞમેનાધિગચ્છતિ;

દુસ્સીલો પન મિત્તેહિ, ધંસતે પાપમાચરં.

૬૧૧. ‘‘અવણ્ણઞ્ચ અકિત્તિઞ્ચ, દુસ્સીલો લભતે નરો;

વણ્ણં કિત્તિં પસંસઞ્ચ, સદા લભતિ સીલવા.

૬૧૨. ‘‘આદિ સીલં પતિટ્ઠા ચ, કલ્યાણાનઞ્ચ માતુકં;

પમુખં સબ્બધમ્માનં, તસ્મા સીલં વિસોધયે.

૬૧૩. ‘‘વેલા ચ સંવરં સીલં [સંવરો સીલં (સી.), સંવરસીલં (સી. અટ્ઠ.)], ચિત્તસ્સ અભિહાસનં;

તિત્થઞ્ચ સબ્બબુદ્ધાનં, તસ્મા સીલં વિસોધયે.

૬૧૪. ‘‘સીલં બલં અપ્પટિમં, સીલં આવુધમુત્તમં;

સીલમાભરણં સેટ્ઠં, સીલં કવચમબ્ભુતં.

૬૧૫. ‘‘સીલં સેતુ મહેસક્ખો, સીલં ગન્ધો અનુત્તરો;

સીલં વિલેપનં સેટ્ઠં, યેન વાતિ દિસોદિસં.

૬૧૬. ‘‘સીલં સમ્બલમેવગ્ગં, સીલં પાથેય્યમુત્તમં;

સીલં સેટ્ઠો અતિવાહો, યેન યાતિ દિસોદિસં.

૬૧૭. ‘‘ઇધેવ નિન્દં લભતિ, પેચ્ચાપાયે ચ દુમ્મનો;

સબ્બત્થ દુમ્મનો બાલો, સીલેસુ અસમાહિતો.

૬૧૮. ‘‘ઇધેવ કિત્તિં લભતિ, પેચ્ચ સગ્ગે ચ સુમ્મનો;

સબ્બત્થ સુમનો ધીરો, સીલેસુ સુસમાહિતો.

૬૧૯. ‘‘સીલમેવ ઇધ અગ્ગં, પઞ્ઞવા પન ઉત્તમો;

મનુસ્સેસુ ચ દેવેસુ, સીલપઞ્ઞાણતો જય’’ન્તિ.

… સીલવો થેરો….

૨. સુનીતત્થેરગાથા

૬૨૦. ‘‘નીચે કુલમ્હિ જાતોહં, દલિદ્દો અપ્પભોજનો;

હીનકમ્મં [હીનં કમ્મં (સ્યા.)] મમં આસિ, અહોસિં પુપ્ફછડ્ડકો.

૬૨૧. ‘‘જિગુચ્છિતો મનુસ્સાનં, પરિભૂતો ચ વમ્ભિતો;

નીચં મનં કરિત્વાન, વન્દિસ્સં બહુકં જનં.

૬૨૨. ‘‘અથદ્દસાસિં સમ્બુદ્ધં, ભિક્ખુસઙ્ઘપુરક્ખતં;

પવિસન્તં મહાવીરં, મગધાનં પુરુત્તમં.

૬૨૩. ‘‘નિક્ખિપિત્વાન બ્યાભઙ્ગિં, વન્દિતું ઉપસઙ્કમિં;

મમેવ અનુકમ્પાય, અટ્ઠાસિ પુરિસુત્તમો.

૬૨૪. ‘‘વન્દિત્વા સત્થુનો પાદે, એકમન્તં ઠિતો તદા;

પબ્બજ્જં અહમાયાચિં, સબ્બસત્તાનમુત્તમં.

૬૨૫. ‘‘તતો કારુણિકો સત્થા, સબ્બલોકાનુકમ્પકો;

‘એહિ ભિક્ખૂ’તિ મં આહ, સા મે આસૂપસમ્પદા.

૬૨૬. ‘‘સોહં એકો અરઞ્ઞસ્મિં, વિહરન્તો અતન્દિતો;

અકાસિં સત્થુવચનં, યથા મં ઓવદી જિનો.

૬૨૭. ‘‘રત્તિયા પઠમં યામં, પુબ્બજાતિમનુસ્સરિં;

રત્તિયા મજ્ઝિમં યામં, દિબ્બચક્ખું વિસોધયિં [દિબ્બચક્ખુ વિસોધિતં (ક.)];

રત્તિયા પચ્છિમે યામે, તમોખન્ધં પદાલયિં.

૬૨૮. ‘‘તતો રત્યા વિવસાને, સૂરિયસ્સુગ્ગમનં પતિ;

ઇન્દો બ્રહ્મા ચ આગન્ત્વા, મં નમસ્સિંસુ પઞ્જલી.

૬૨૯. ‘‘‘નમો તે પુરિસાજઞ્ઞ, નમો તે પુરિસુત્તમ;

યસ્સ તે આસવા ખીણા, દક્ખિણેય્યોસિ મારિસ’.

૬૩૦. ‘‘તતો દિસ્વાન મં સત્થા, દેવસઙ્ઘપુરક્ખતં;

સિતં પાતુકરિત્વાન, ઇમમત્થં અભાસથ.

૬૩૧. [સુ. નિ. ૬૬૦ સુત્તનિપાતેપિ] ‘‘‘તપેન બ્રહ્મચરિયેન, સંયમેન દમેન ચ;

એતેન બ્રાહ્મણો હોતિ, એતં બ્રાહ્મણમુત્તમ’’’ન્તિ.

… સુનીતો થેરો….

દ્વાદસકનિપાતો નિટ્ઠિતો.