૬. વઙ્ગન્તપુત્તઉપસેનત્થેરગાથા

૫૭૭. ‘‘વિવિત્તં અપ્પનિગ્ઘોસં, વાળમિગનિસેવિતં;

સેવે સેનાસનં ભિક્ખુ, પટિસલ્લાનકારણા.

૫૭૮. ‘‘સઙ્કારપુઞ્જા આહત્વા [આહિત્વા (ક.)], સુસાના રથિયાહિ ચ;

તતો સઙ્ઘાટિકં કત્વા, લૂખં ધારેય્ય ચીવરં.

૫૭૯. ‘‘નીચં મનં કરિત્વાન, સપદાનં કુલા કુલં;

પિણ્ડિકાય ચરે ભિક્ખુ, ગુત્તદ્વારો સુસંવુતો.

૫૮૦. ‘‘લૂખેનપિ વા [લૂખેનપિ ચ (બહૂસુ)] સન્તુસ્સે, નાઞ્ઞં પત્થે રસં બહું;

રસેસુ અનુગિદ્ધસ્સ, ઝાને ન રમતી મનો.

૫૮૧. ‘‘અપ્પિચ્છો ચેવ સન્તુટ્ઠો, પવિવિત્તો વસે મુનિ;

અસંસટ્ઠો ગહટ્ઠેહિ, અનાગારેહિ ચૂભયં.

૫૮૨. ‘‘યથા જળો વ મૂગો વ, અત્તાનં દસ્સયે તથા;

નાતિવેલં સમ્ભાસેય્ય, સઙ્ઘમજ્ઝમ્હિ પણ્ડિતો.

૫૮૩. ‘‘ન સો ઉપવદે કઞ્ચિ, ઉપઘાતં વિવજ્જયે;

સંવુતો પાતિમોક્ખસ્મિં, મત્તઞ્ઞૂ ચસ્સ ભોજને.

૫૮૪. ‘‘સુગ્ગહીતનિમિત્તસ્સ, ચિત્તસ્સુપ્પાદકોવિદો;

સમં અનુયુઞ્જેય્ય, કાલેન ચ વિપસ્સનં.

૫૮૫. ‘‘વીરિયસાતચ્ચસમ્પન્નો, યુત્તયોગો સદા સિયા;

ન ચ અપ્પત્વા દુક્ખન્તં, વિસ્સાસં એય્ય પણ્ડિતો.

૫૮૬. ‘‘એવં વિહરમાનસ્સ, સુદ્ધિકામસ્સ ભિક્ખુનો;

ખીયન્તિ આસવા સબ્બે, નિબ્બુતિઞ્ચાધિગચ્છતી’’તિ.

… ઉપસેનો વઙ્ગન્તપુત્તો થેરો….