૩. મહાકપ્પિનત્થેરગાથા

૫૪૭. ‘‘અનાગતં યો પટિકચ્ચ [પટિગચ્ચ (સી.)] પસ્સતિ, હિતઞ્ચ અત્થં અહિતઞ્ચ તં દ્વયં;

વિદ્દેસિનો તસ્સ હિતેસિનો વા, રન્ધં ન પસ્સન્તિ સમેક્ખમાના.

૫૪૮. [પટિ. મ. ૧.૧૬૦ પટિસમ્ભિદામગ્ગે] ‘‘આનાપાનસતી યસ્સ, પરિપુણ્ણા સુભાવિતા;

અનુપુબ્બં પરિચિતા, યથા બુદ્ધેન દેસિતા;

સોમં લોકં પભાસેતિ, અબ્ભા મુત્તોવ ચન્દિમા.

૫૪૯. ‘‘ઓદાતં વત મે ચિત્તં, અપ્પમાણં સુભાવિતં;

નિબ્બિદ્ધં પગ્ગહીતઞ્ચ, સબ્બા ઓભાસતે દિસા.

૫૫૦. ‘‘જીવતે વાપિ સપ્પઞ્ઞો, અપિ વિત્તપરિક્ખયો;

પઞ્ઞાય ચ અલાભેન, વિત્તવાપિ ન જીવતિ.

૫૫૧. ‘‘પઞ્ઞા સુતવિનિચ્છિની, પઞ્ઞા કિત્તિસિલોકવદ્ધની;

પઞ્ઞાસહિતો નરો ઇધ, અપિ દુક્ખેસુ સુખાનિ વિન્દતિ.

૫૫૨. ‘‘નાયં અજ્જતનો ધમ્મો, નચ્છેરો નપિ અબ્ભુતો;

યત્થ જાયેથ મીયેથ, તત્થ કિં વિય અબ્ભુતં.

૫૫૩. ‘‘અનન્તરં હિ જાતસ્સ, જીવિતા મરણં ધુવં;

જાતા જાતા મરન્તીધ, એવંધમ્મા હિ પાણિનો.

૫૫૪. ‘‘ન હેતદત્થાય મતસ્સ હોતિ, યં જીવિતત્થં પરપોરિસાનં;

મતમ્હિ રુણ્ણં ન યસો ન લોક્યં, ન વણ્ણિતં સમણબ્રાહ્મણેહિ.

૫૫૫. ‘‘ચક્ખું સરીરં ઉપહન્તિ તેન [ઉપહન્તિ રુણ્ણં (સી.), ઉપહન્તિ રોણ્ણં (સ્યા. પી.)], નિહીયતિ વણ્ણબલં મતી ચ;

આનન્દિનો તસ્સ દિસા ભવન્તિ, હિતેસિનો નાસ્સ સુખી ભવન્તિ.

૫૫૬. ‘‘તસ્મા હિ ઇચ્છેય્ય કુલે વસન્તે, મેધાવિનો ચેવ બહુસ્સુતે ચ;

યેસં હિ પઞ્ઞાવિભવેન કિચ્ચં, તરન્તિ નાવાય નદિંવ પુણ્ણ’’ન્તિ.

… મહાકપ્પિનો થેરો….