૭. સત્તમવગ્ગો

૬૧. ‘‘પસ્સતિ પસ્સો પસ્સન્તં, અપસ્સન્તઞ્ચ પસ્સતિ;

અપસ્સન્તો અપસ્સન્તં, પસ્સન્તઞ્ચ ન પસ્સતી’’તિ.

… વપ્પો થેરો….

૬૨. ‘‘એકકા મયં અરઞ્ઞે વિહરામ, અપવિદ્ધંવ વનસ્મિં દારુકં;

તસ્સ મે બહુકા પિહયન્તિ, નેરયિકા વિય સગ્ગગામિન’’ન્તિ.

… વજ્જિપુત્તો થેરો….

૬૩. ‘‘ચુતા પતન્તિ પતિતા, ગિદ્ધા ચ પુનરાગતા;

કતં કિચ્ચં રતં રમ્મં, સુખેનન્વાગતં સુખ’’ન્તિ.

… પક્ખો થેરો….

૬૪. ‘‘દુમવ્હયાય ઉપ્પન્નો, જાતો પણ્ડરકેતુના;

કેતુહા કેતુનાયેવ, મહાકેતું પધંસયી’’તિ.

… વિમલકોણ્ડઞ્ઞો થેરો….

૬૫. ‘‘ઉક્ખેપકતવચ્છસ્સ, સઙ્કલિતં બહૂહિ વસ્સેહિ;

તં ભાસતિ ગહટ્ઠાનં, સુનિસિન્નો ઉળારપામોજ્જો’’તિ.

… ઉક્ખેપકતવચ્છો થેરો….

૬૬. ‘‘અનુસાસિ મહાવીરો, સબ્બધમ્માન પારગૂ;

તસ્સાહં ધમ્મં સુત્વાન, વિહાસિં સન્તિકે સતો;

તિસ્સો વિજ્જા અનુપ્પત્તા, કતં બુદ્ધસ્સ સાસન’’ન્તિ.

… મેઘિયો થેરો….

૬૭. ‘‘કિલેસા ઝાપિતા મય્હં, ભવા સબ્બે સમૂહતા;

વિક્ખીણો જાતિસંસારો, નત્થિ દાનિ પુનબ્ભવો’’તિ.

… એકધમ્મસવનીયો થેરો….

૬૮. [ઉદા. ૩૭; પાચિ. ૧૫૩] ‘‘અધિચેતસો અપ્પમજ્જતો, મુનિનો મોનપથેસુ સિક્ખતો;

સોકા ન ભવન્તિ તાદિનો, ઉપસન્તસ્સ સદા સતીમતો’’તિ.

… એકુદાનિયો થેરો….

૬૯. ‘‘સુત્વાન ધમ્મં મહતો મહારસં, સબ્બઞ્ઞુતઞ્ઞાણવરેન દેસિતં;

મગ્ગં પપજ્જિં [પપજ્જં (ક.)] અમતસ્સ પત્તિયા, સો યોગક્ખેમસ્સ પથસ્સ કોવિદો’’તિ.

… છન્નો થેરો….

૭૦. ‘‘સીલમેવ ઇધ અગ્ગં, પઞ્ઞવા પન ઉત્તમો;

મનુસ્સેસુ ચ દેવેસુ, સીલપઞ્ઞાણતો જય’’ન્તિ.

… પુણ્ણો થેરો….

વગ્ગો સત્તમો નિટ્ઠિતો.

તસ્સુદ્દાનં –

વપ્પો ચ વજ્જિપુત્તો ચ, પક્ખો વિમલકોણ્ડઞ્ઞો;

ઉક્ખેપકતવચ્છો ચ, મેઘિયો એકધમ્મિકો;

એકુદાનિયછન્ના ચ, પુણ્ણત્થેરો મહબ્બલોતિ.