૮. અટ્ઠમવગ્ગો

૧. વચ્છપાલત્થેરગાથા

૭૧. ‘‘સુસુખુમનિપુણત્થદસ્સિના, મતિકુસલેન નિવાતવુત્તિના;

સંસેવિતવુદ્ધસીલિના [સંસેવિતબુદ્ધસીલિના (ક.)], નિબ્બાનં ન હિ તેન દુલ્લભ’’ન્તિ.

… વચ્છપાલો થેરો….

૨. આતુમત્થેરગાથા

૭૨. ‘‘યથા કળીરો સુસુ વડ્ઢિતગ્ગો, દુન્નિક્ખમો હોતિ પસાખજાતો;

એવં અહં ભરિયાયાનિતાય, અનુમઞ્ઞં મં પબ્બજિતોમ્હિ દાની’’તિ.

… આતુમો થેરો….

૩. માણવત્થેરગાથા

૭૩. ‘‘જિણ્ણઞ્ચ દિસ્વા દુખિતઞ્ચ બ્યાધિતં, મતઞ્ચ દિસ્વા ગતમાયુસઙ્ખયં;

તતો અહં નિક્ખમિતૂન પબ્બજિં, પહાય કામાનિ મનોરમાની’’તિ.

… માણવો થેરો….

૪. સુયામનત્થેરગાથા

૭૪. ‘‘કામચ્છન્દો ચ બ્યાપાદો, થિનમિદ્ધઞ્ચ [થીનમિદ્ધઞ્ચ (સી. સ્યા.)] ભિક્ખુનો;

ઉદ્ધચ્ચં વિચિકિચ્છા ચ, સબ્બસોવ ન વિજ્જતી’’તિ.

… સુયામનો થેરો….

૫. સુસારદત્થેરગાથા

૭૫. ‘‘સાધુ સુવિહિતાન દસ્સનં, કઙ્ખા છિજ્જતિ બુદ્ધિ વડ્ઢતિ;

બાલમ્પિ કરોન્તિ પણ્ડિતં, તસ્મા સાધુ સતં સમાગમો’’તિ.

… સુસારદો થેરો….

૬. પિયઞ્જહત્થેરગાથા

૭૬. ‘‘ઉપ્પતન્તેસુ નિપતે, નિપતન્તેસુ ઉપ્પતે;

વસે અવસમાનેસુ, રમમાનેસુ નો રમે’’તિ.

… પિયઞ્જહો થેરો….

૭. હત્થારોહપુત્તત્થેરગાથા

૭૭. ‘‘ઇદં પુરે ચિત્તમચારિ ચારિકં, યેનિચ્છકં યત્થકામં યથાસુખં;

તદજ્જહં નિગ્ગહેસ્સામિ યોનિસો, હત્થિપ્પભિન્નં વિય અઙ્કુસગ્ગહો’’તિ.

… હત્થારોહપુત્તો થેરો….

૮. મેણ્ડસિરત્થેરગાથા

૭૮. ‘‘અનેકજાતિસંસારં, સન્ધાવિસ્સં અનિબ્બિસં;

તસ્સ મે દુક્ખજાતસ્સ, દુક્ખક્ખન્ધો અપરદ્ધો’’તિ.

… મેણ્ડસિરો થેરો….

૯. રક્ખિતત્થેરગાથા

૭૯. ‘‘સબ્બો રાગો પહીનો મે, સબ્બો દોસો સમૂહતો;

સબ્બો મે વિગતો મોહો, સીતિભૂતોસ્મિ નિબ્બુતો’’તિ.

… રક્ખિતો થેરો….

૧૦. ઉગ્ગત્થેરગાથા

૮૦. ‘‘યં મયા પકતં કમ્મં, અપ્પં વા યદિ વા બહું;

સબ્બમેતં પરિક્ખીણં, નત્થિ દાનિ પુનબ્ભવો’’તિ.

… ઉગ્ગો થેરો….

વગ્ગો અટ્ઠમો નિટ્ઠિતો.

તસ્સુદ્દાનં –

વચ્છપાલો ચ યો થેરો, આતુમો માણવો ઇસિ;

સુયામનો સુસારદો, થેરો યો ચ પિયઞ્જહો;

આરોહપુત્તો મેણ્ડસિરો, રક્ખિતો ઉગ્ગસવ્હયોતિ.