૬. છટ્ઠવગ્ગો

૫૧. ‘‘વસ્સતિ દેવો યથા સુગીતં, છન્ના મે કુટિકા સુખા નિવાતા;

ચિત્તં સુસમાહિતઞ્ચ મય્હં, અથ ચે પત્થયસિ પવસ્સ દેવા’’તિ.

… ગોધિકો થેરો….

૫૨. ‘‘વસ્સતિ દેવો યથા સુગીતં, છન્ના મે કુટિકા સુખા નિવાતા;

ચિત્તં સુસમાહિતઞ્ચ કાયે, અથ ચે પત્થયસિ પવસ્સ દેવા’’તિ.

… સુબાહુત્થેરો….

૫૩. ‘‘વસ્સતિ દેવો યથા સુગીતં, છન્ના મે કુટિકા સુખા નિવાતા;

તસ્સં વિહરામિ અપ્પમત્તો, અથ ચે પત્થયસિ પવસ્સ દેવા’’તિ.

… વલ્લિયો થેરો….

૫૪. ‘‘વસ્સતિ દેવો યથા સુગીતં, છન્ના મે કુટિકા સુખા નિવાતા;

તસ્સં વિહરામિ અદુતિયો, અથ ચે પત્થયસિ પવસ્સ દેવા’’તિ.

… ઉત્તિયો થેરો….

૫૫. ‘‘આસન્દિં કુટિકં કત્વા, ઓગય્હ અઞ્જનં વનં;

તિસ્સો વિજ્જા અનુપ્પત્તા, કતં બુદ્ધસ્સ સાસન’’ન્તિ.

… અઞ્જનવનિયો થેરો….

૫૬. ‘‘કો કુટિકાયં ભિક્ખુ કુટિકાયં, વીતરાગો સુસમાહિતચિત્તો;

એવં જાનાહિ આવુસો, અમોઘા તે કુટિકા કતા’’તિ.

… કુટિવિહારિત્થેરો….

૫૭. ‘‘અયમાહુ પુરાણિયા કુટિ, અઞ્ઞં પત્થયસે નવં કુટિં;

આસં કુટિયા વિરાજય, દુક્ખા ભિક્ખુ પુન નવા કુટી’’તિ.

… દુતિયકુટિવિહારિત્થેરો….

૫૮. ‘‘રમણીયા મે કુટિકા, સદ્ધાદેય્યા મનોરમા;

ન મે અત્થો કુમારીહિ, યેસં અત્થો તહિં ગચ્છથ નારિયો’’તિ.

… રમણીયકુટિકો થેરો….

૫૯. ‘‘સદ્ધાયાહં પબ્બજિતો, અરઞ્ઞે મે કુટિકા કતા;

અપ્પમત્તો ચ આતાપી, સમ્પજાનો પતિસ્સતો’’તિ [પટિસ્સતોતિ (ક.)].

… કોસલવિહારિત્થેરો….

૬૦. ‘‘તે મે ઇજ્ઝિંસુ સઙ્કપ્પા, યદત્થો પાવિસિં કુટિં;

વિજ્જાવિમુત્તિં પચ્ચેસં, માનાનુસયમુજ્જહ’’ન્તિ.

… સીવલિત્થેરો….

વગ્ગો છટ્ઠો નિટ્ઠિતો.

તસ્સુદ્દાનં –

ગોધિકો ચ સુબાહુ ચ, વલ્લિયો ઉત્તિયો ઇસિ;

અઞ્જનવનિયો થેરો, દુવે કુટિવિહારિનો;

રમણીયકુટિકો ચ, કોસલવ્હયસીવલીતિ.