૫. પઞ્ચમવગ્ગો

૪૧. ‘‘વિવરમનુપતન્તિ વિજ્જુતા, વેભારસ્સ ચ પણ્ડવસ્સ ચ;

નગવિવરગતો ચ ઝાયતિ, પુત્તો અપ્પટિમસ્સ તાદિનો’’તિ.

… સિરિવડ્ઢો થેરો….

૪૨. ‘‘ચાલે ઉપચાલે સીસૂપચાલે ( ) [(ચાલા ઉપચાલા, સીસૂપચાલા) (ક.)] પતિસ્સતા [પટિસ્સતિકા (સ્યા. ક.)] નુ ખો વિહરથ;

આગતો વો વાલં વિય વેધી’’તિ.

… ખદિરવનિયો થેરો….

૪૩. ‘‘સુમુત્તિકો સુમુત્તિકો સાહુ, સુમુત્તિકોમ્હિ તીહિ ખુજ્જકેહિ;

અસિતાસુ મયા નઙ્ગલાસુ, મયા ખુદ્દકુદ્દાલાસુ મયા.

યદિપિ ઇધમેવ ઇધમેવ, અથ વાપિ અલમેવ અલમેવ;

ઝાય સુમઙ્ગલ ઝાય સુમઙ્ગલ, અપ્પમત્તો વિહર સુમઙ્ગલા’’તિ.

… સુમઙ્ગલો થેરો….

૪૪. [સં. નિ. ૧.૨૩૯] ‘‘મતં વા અમ્મ રોદન્તિ, યો વા જીવં ન દિસ્સતિ;

જીવન્તં મં અમ્મ પસ્સન્તી, કસ્મા મં અમ્મ રોદસી’’તિ.

… સાનુત્થેરો….

૪૫. ‘‘યથાપિ ભદ્દો આજઞ્ઞો, ખલિત્વા પતિતિટ્ઠતિ;

એવં દસ્સનસમ્પન્નં, સમ્માસમ્બુદ્ધસાવક’’ન્તિ.

… રમણીયવિહારિત્થેરો….

૪૬. ‘‘સદ્ધાયાહં પબ્બજિતો, અગારસ્માનગારિયં;

સતિ પઞ્ઞા ચ મે વુડ્ઢા, ચિત્તઞ્ચ સુસમાહિતં;

કામં કરસ્સુ રૂપાનિ, નેવ મં બ્યાધયિસ્સસી’’તિ [બાધયિસ્સસીતિ (સી.), બ્યાથયિસ્સસીતિ (?)].

… સમિદ્ધિત્થેરો….

૪૭. ‘‘નમો તે બુદ્ધ વીરત્થુ, વિપ્પમુત્તોસિ સબ્બધિ;

તુય્હાપદાને વિહરં, વિહરામિ અનાસવો’’તિ.

… ઉજ્જયો થેરો….

૪૮. ‘‘યતો અહં પબ્બજિતો, અગારસ્માનગારિયં;

નાભિજાનામિ સઙ્કપ્પં, અનરિયં દોસસંહિત’’ન્તિ.

… સઞ્જયો થેરો….

૪૯. ‘‘ચિહચિહાભિનદિતે [વિહવિહાભિનદિતે (સી. સ્યા.)], સિપ્પિકાભિરુતેહિ ચ;

ન મે તં ફન્દતિ ચિત્તં, એકત્તનિરતં હિ મે’’તિ.

… રામણેય્યકો થેરો….

૫૦. ‘‘ધરણી ચ સિઞ્ચતિ વાતિ, માલુતો વિજ્જુતા ચરતિ નભે;

ઉપસમન્તિ વિતક્કા, ચિત્તં સુસમાહિતં મમા’’તિ.

… વિમલો થેરો….

વગ્ગો પઞ્ચમો નિટ્ઠિતો.

તસ્સુદ્દાનં –

સિરીવડ્ઢો રેવતો થેરો, સુમઙ્ગલો સાનુસવ્હયો;

રમણીયવિહારી ચ, સમિદ્ધિઉજ્જયસઞ્જયા;

રામણેય્યો ચ સો થેરો, વિમલો ચ રણઞ્જહોતિ.