૪. ચતુત્થવગ્ગો

૩૧. ‘‘ફુટ્ઠો ડંસેહિ મકસેહિ, અરઞ્ઞસ્મિં બ્રહાવને;

નાગો સંગામસીસેવ, સતો તત્રાધિવાસયે’’તિ.

… ગહ્વરતીરિયો થેરો….

૩૨. ‘‘અજરં જીરમાનેન, તપ્પમાનેન નિબ્બુતિં;

નિમિયં [નિમ્મિસ્સં (સી.), નિરામિસં (સ્યા.), નિમિનેય્યં (?)] પરમં સન્તિં, યોગક્ખેમં અનુત્તર’’ન્તિ.

… સુપ્પિયો થેરો….

૩૩. ‘‘યથાપિ એકપુત્તસ્મિં, પિયસ્મિં કુસલી સિયા;

એવં સબ્બેસુ પાણેસુ, સબ્બત્થ કુસલો સિયા’’તિ.

… સોપાકો થેરો….

૩૪. ‘‘અનાસન્નવરા એતા, નિચ્ચમેવ વિજાનતા;

ગામા અરઞ્ઞમાગમ્મ, તતો ગેહં ઉપાવિસિ [ઉપાવિસિં (સી.)];

તતો ઉટ્ઠાય પક્કામિ, અનામન્તેત્વા [અનામન્તિય (સી.)] પોસિયો’’તિ.

… પોસિયો થેરો….

૩૫. ‘‘સુખં સુખત્થો લભતે તદાચરં, કિત્તિઞ્ચ પપ્પોતિ યસસ્સ વડ્ઢતિ;

યો અરિયમટ્ઠઙ્ગિકમઞ્જસં ઉજું, ભાવેતિ મગ્ગં અમતસ્સ પત્તિયા’’તિ.

… સામઞ્ઞકાનિત્થેરો….

૩૬. ‘‘સાધુ સુતં સાધુ ચરિતકં, સાધુ સદા અનિકેતવિહારો;

અત્થપુચ્છનં પદક્ખિણકમ્મં, એતં સામઞ્ઞમકિઞ્ચનસ્સા’’તિ.

… કુમાપુત્તો થેરો….

૩૭. ‘‘નાનાજનપદં યન્તિ, વિચરન્તા અસઞ્ઞતા;

સમાધિઞ્ચ વિરાધેન્તિ, કિંસુ રટ્ઠચરિયા કરિસ્સતિ;

તસ્મા વિનેય્ય સારમ્ભં, ઝાયેય્ય અપુરક્ખતો’’તિ.

… કુમાપુત્તત્થેરસ્સ સહાયકો થેરો….

૩૮. ‘‘યો ઇદ્ધિયા સરભું અટ્ઠપેસિ, સો ગવમ્પતિ અસિતો અનેજો;

તં સબ્બસઙ્ગાતિગતં મહામુનિં, દેવા નમસ્સન્તિ ભવસ્સ પારગુ’’ન્તિ.

… ગવમ્પતિત્થેરો….

૩૯. [સં. નિ. ૧.૨૧, ૯૭]‘‘સત્તિયા વિય ઓમટ્ઠો, ડય્હમાનોવ [ડય્હમાનેવ (સબ્બત્થ)] મત્થકે;

કામરાગપ્પહાનાય, સતો ભિક્ખુ પરિબ્બજે’’તિ.

… તિસ્સો થેરો….

૪૦. ‘‘સત્તિયા વિય ઓમટ્ઠો, ડય્હમાનોવ મત્થકે;

ભવરાગપ્પહાનાય, સતો ભિક્ખુ પરિબ્બજે’’તિ.

… વડ્ઢમાનો થેરો….

વગ્ગો ચતુત્થો નિટ્ઠિતો.

તસ્સુદ્દાનં –

ગહ્વરતીરિયો સુપ્પિયો, સોપાકો ચેવ પોસિયો;

સામઞ્ઞકાનિ કુમાપુત્તો, કુમાપુત્તસહાયકો;

ગવમ્પતિ તિસ્સત્થેરો, વડ્ઢમાનો મહાયસોતિ.