૧૦. દસમવગ્ગો

૧. પરિપુણ્ણકત્થેરગાથા

૯૧. ‘‘ન તથા મતં સતરસં, સુધન્નં યં મયજ્જ પરિભુત્તં;

અપરિમિતદસ્સિના ગોતમેન, બુદ્ધેન દેસિતો ધમ્મો’’તિ.

… પરિપુણ્ણકો થેરો….

૨. વિજયત્થેરગાથા

૯૨. ‘‘યસ્સાસવા પરિક્ખીણા, આહારે ચ અનિસ્સિતો;

સુઞ્ઞતા અનિમિત્તો ચ, વિમોક્ખો યસ્સ ગોચરો;

આકાસેવ સકુન્તાનં, પદં તસ્સ દુરન્નય’’ન્તિ.

… વિજયો થેરો….

૩. એરકત્થેરગાથા

૯૩. ‘‘દુક્ખા કામા એરક, ન સુખા કામા એરક;

યો કામે કામયતિ, દુક્ખં સો કામયતિ એરક;

યો કામે ન કામયતિ, દુક્ખં સો ન કામયતિ એરકા’’તિ.

… એરકો થેરો….

૪. મેત્તજિત્થેરગાથા

૯૪. ‘‘નમો હિ તસ્સ ભગવતો, સક્યપુત્તસ્સ સિરીમતો;

તેનાયં અગ્ગપ્પત્તેન, અગ્ગધમ્મો [અગ્ગો ધમ્મો (સી.)] સુદેસિતો’’તિ.

… મેત્તજિ થેરો….

૫. ચક્ખુપાલત્થેરગાથા

૯૫. ‘‘અન્ધોહં હતનેત્તોસ્મિ, કન્તારદ્ધાનપક્ખન્દો [પક્ખન્નો (સી.), પક્કન્તો (સ્યા. સી. અટ્ઠ.)];

સયમાનોપિ ગચ્છિસ્સં, ન સહાયેન પાપેના’’તિ.

… ચક્ખુપાલો થેરો….

૬. ખણ્ડસુમનત્થેરગાથા

૯૬. ‘‘એકપુપ્ફં ચજિત્વાન, અસીતિ [અસીતિં (સી.)] વસ્સકોટિયો;

સગ્ગેસુ પરિચારેત્વા, સેસકેનમ્હિ નિબ્બુતો’’તિ.

… ખણ્ડસુમનો થેરો….

૭. તિસ્સત્થેરગાથા

૯૭. ‘‘હિત્વા સતપલં કંસં, સોવણ્ણં સતરાજિકં;

અગ્ગહિં મત્તિકાપત્તં, ઇદં દુતિયાભિસેચન’’ન્તિ.

… તિસ્સો થેરો….

૮. અભયત્થેરગાથા

૯૮. ‘‘રૂપં દિસ્વા સતિ મુટ્ઠા, પિયં નિમિત્તં મનસિકરોતો;

સારત્તચિત્તો વેદેતિ, તઞ્ચ અજ્ઝોસ તિટ્ઠતિ;

તસ્સ વડ્ઢન્તિ આસવા, ભવમૂલોપગામિનો’’તિ [ભવમૂલા ભવગામિનોતિ (સી. ક.)].

… અભયો થેરો….

૯. ઉત્તિયત્થેરગાથા

૯૯. ‘‘સદ્દં સુત્વા સતિ મુટ્ઠા, પિયં નિમિત્તં મનસિકરોતો;

સારત્તચિત્તો વેદેતિ, તઞ્ચ અજ્ઝોસ તિટ્ઠતિ;

તસ્સ વડ્ઢન્તિ આસવા, સંસારં ઉપગામિનો’’તિ.

… ઉત્તિયો થેરો….

૧૦. (દુતિય)-દેવસભત્થેરગાથા

૧૦૦. ‘‘સમ્મપ્પધાનસમ્પન્નો, સતિપટ્ઠાનગોચરો;

વિમુત્તિકુસુમસઞ્છન્નો, પરિનિબ્બિસ્સત્યનાસવો’’તિ.

… દેવસભો થેરો….

વગ્ગો દસમો નિટ્ઠિતો.

તસ્સુદ્દાનં –

પરિપુણ્ણકો ચ વિજયો, એરકો મેત્તજી મુનિ;

ચક્ખુપાલો ખણ્ડસુમનો, તિસ્સો ચ અભયો તથા;

ઉત્તિયો ચ મહાપઞ્ઞો, થેરો દેવસભોપિ ચાતિ.