૧૧. એકાદસમવગ્ગો

૧૦૧. ‘‘હિત્વા ગિહિત્તં અનવોસિતત્તો, મુખનઙ્ગલી ઓદરિકો કુસીતો;

મહાવરાહોવ નિવાપપુટ્ઠો, પુનપ્પુનં ગબ્ભમુપેતિ મન્દો’’તિ.

… બેલટ્ઠાનિકો થેરો….

૧૦૨. ‘‘માનેન વઞ્ચિતાસે, સઙ્ખારેસુ સંકિલિસ્સમાનાસે;

લાભાલાભેન મથિતા, સમાધિં નાધિગચ્છન્તી’’તિ.

… સેતુચ્છો થેરો….

૧૦૩. ‘‘નાહં એતેન અત્થિકો, સુખિતો ધમ્મરસેન તપ્પિતો;

પિત્વા [પીત્વાન (સી. સ્યા.)] રસગ્ગમુત્તમં, ન ચ કાહામિ વિસેન સન્થવ’’ન્તિ.

… બન્ધુરો [બન્ધનો (ક.)] થેરો….

૧૦૪. ‘‘લહુકો વત મે કાયો, ફુટ્ઠો ચ પીતિસુખેન વિપુલેન;

તૂલમિવ એરિતં માલુતેન, પિલવતીવ મે કાયો’’તિ.

… ખિતકો થેરો….

૧૦૫. ‘‘ઉક્કણ્ઠિતોપિ ન વસે, રમમાનોપિ પક્કમે;

ન ત્વેવાનત્થસંહિતં, વસે વાસં વિચક્ખણો’’તિ.

… મલિતવમ્ભો થેરો….

૧૦૬. ‘‘સતલિઙ્ગસ્સ અત્થસ્સ, સતલક્ખણધારિનો;

એકઙ્ગદસ્સી દુમ્મેધો, સતદસ્સી ચ પણ્ડિતો’’તિ.

… સુહેમન્તો થેરો….

૧૦૭. ‘‘પબ્બજિં તુલયિત્વાન, અગારસ્માનગારિયં;

તિસ્સો વિજ્જા અનુપ્પત્તા, કતં બુદ્ધસ્સ સાસન’’ન્તિ.

… ધમ્મસવો થેરો….

૧૦૮. ‘‘સ વીસવસ્સસતિકો, પબ્બજિં અનગારિયં;

તિસ્સો વિજ્જા અનુપ્પત્તા, કતં બુદ્ધસ્સ સાસન’’ન્તિ.

… ધમ્મસવપિતુ થેરો….

૧૦૯. ‘‘ન નૂનાયં પરમહિતાનુકમ્પિનો, રહોગતો અનુવિગણેતિ સાસનં;

તથાહયં વિહરતિ પાકતિન્દ્રિયો, મિગી યથા તરુણજાતિકા વને’’તિ.

… સઙ્ઘરક્ખિતો થેરો….

૧૧૦. ‘‘નગા નગગ્ગેસુ સુસંવિરૂળ્હા, ઉદગ્ગમેઘેન નવેન સિત્તા;

વિવેકકામસ્સ અરઞ્ઞસઞ્ઞિનો, જનેતિ ભિય્યો ઉસભસ્સ કલ્યત’’ન્તિ.

… ઉસભો થેરો….

વગ્ગો એકાદસમો નિટ્ઠિતો.

તસ્સુદ્દાનં –

બેલટ્ઠાનિકો સેતુચ્છો, બન્ધુરો ખિતકો ઇસિ;

મલિતવમ્ભો સુહેમન્તો, ધમ્મસવો ધમ્મસવપિતા;

સઙ્ઘરક્ખિતત્થેરો ચ, ઉસભો ચ મહામુનીતિ.