૧. પઠમવગ્ગો

૧. ‘‘છન્ના મે કુટિકા સુખા નિવાતા, વસ્સ દેવ યથાસુખં;

ચિત્તં મે સુસમાહિતં વિમુત્તં, આતાપી વિહરામિ વસ્સ દેવા’’તિ.

ઇત્થં સુદં [ઇત્થં સુમં (ક. અટ્ઠ.)] આયસ્મા સુભૂતિત્થેરો ગાથં અભાસિત્થાતિ.

૨. ‘‘ઉપસન્તો ઉપરતો, મન્તભાણી અનુદ્ધતો;

ધુનાતિ પાપકે ધમ્મે, દુમપત્તંવ માલુતો’’તિ.

ઇત્થં સુદં આયસ્મા મહાકોટ્ઠિકો [મહાકોટ્ઠિતો (સી. સ્યા.)] થેરો ગાથં અભાસિત્થાતિ.

૩. ‘‘પઞ્ઞં ઇમં પસ્સ તથાગતાનં, અગ્ગિ યથા પજ્જલિતો નિસીથે;

આલોકદા ચક્ખુદદા ભવન્તિ, યે આગતાનં વિનયન્તિ કઙ્ખ’’ન્તિ.

ઇત્થં સુદં આયસ્મા કઙ્ખારેવતો થેરો ગાથં અભાસિત્થાતિ.

૪. ‘‘સમ્ભિરેવ સમાસેથ, પણ્ડિતેહત્થદસ્સિભિ;

અત્થં મહન્તં ગમ્ભીરં, દુદ્દસં નિપુણં અણું;

ધીરા સમધિગચ્છન્તિ, અપ્પમત્તા વિચક્ખણા’’તિ.

ઇત્થં સુદં આયસ્મા પુણ્ણો મન્તાણિપુત્તો [મન્તાનિપુત્તો (સ્યા. ક.)] થેરો ગાથં અભાસિત્થાતિ.

૫. ‘‘યો દુદ્દમિયો દમેન દન્તો, દબ્બો સન્તુસિતો વિતિણ્ણકઙ્ખો;

વિજિતાવી અપેતભેરવો હિ, દબ્બો સો પરિનિબ્બુતો ઠિતત્તો’’તિ.

ઇત્થં સુદં આયસ્મા દબ્બો થેરો ગાથં અભાસિત્થાતિ.

૬. ‘‘યો સીતવનં ઉપગા ભિક્ખુ, એકો સન્તુસિતો સમાહિતત્તો;

વિજિતાવી અપેતલોમહંસો, રક્ખં કાયગતાસતિં ધિતિમા’’તિ.

ઇત્થં સુદં આયસ્મા સીતવનિયો થેરો ગાથં અભાસિત્થાતિ.

૭. ‘‘યોપાનુદી મચ્ચુરાજસ્સ સેનં, નળસેતુંવ સુદુબ્બલં મહોઘો;

વિજિતાવી અપેતભેરવો હિ, દન્તો સો પરિનિબ્બુતો ઠિતત્તો’’તિ.

ઇત્થં સુદં આયસ્મા ભલ્લિયો થેરો ગાથં અભાસિત્થાતિ.

૮. ‘‘યો દુદ્દમિયો દમેન દન્તો, વીરો સન્તુસિતો વિતિણ્ણકઙ્ખો;

વિજિતાવી અપેતલોમહંસો, વીરો સો પરિનિબ્બુતો ઠિતત્તો’’તિ.

ઇત્થં સુદં આયસ્મા વીરો થેરો ગાથં અભાસિત્થાતિ.

૯. ‘‘સ્વાગતં ન દુરાગતં [નાપગતં (સી. સ્યા.)], નયિદં દુમન્તિતં મમ;

સંવિભત્તેસુ ધમ્મેસુ, યં સેટ્ઠં તદુપાગમિ’’ન્તિ.

ઇત્થં સુદં આયસ્મા પિલિન્દવચ્છો [પિલિન્દિવચ્છો (સી.)] થેરો ગાથં અભાસિત્થાતિ.

૧૦. ‘‘વિહરિ અપેક્ખં ઇધ વા હુરં વા, યો વેદગૂ સમિતો યતત્તો;

સબ્બેસુ ધમ્મેસુ અનૂપલિત્તો, લોકસ્સ જઞ્ઞા ઉદયબ્બયઞ્ચા’’તિ.

ઇત્થં સુદં આયસ્મા પુણ્ણમાસો થેરો ગાથં અભાસિત્થાતિ.

વગ્ગો પઠમો નિટ્ઠિતો.

તસ્સુદ્દાનં –

સુભૂતિ કોટ્ઠિકો થેરો, કઙ્ખારેવતસમ્મતો;

મન્તાણિપુત્તો દબ્બો ચ, સીતવનિયો ચ ભલ્લિયો;

વીરો પિલિન્દવચ્છો ચ, પુણ્ણમાસો તમોનુદોતિ.