૨. દુતિયવગ્ગો

૧૧. ‘‘પામોજ્જબહુલો ભિક્ખુ, ધમ્મે બુદ્ધપ્પવેદિતે;

અધિગચ્છે પદં સન્તં, સઙ્ખારૂપસમં સુખ’’ન્તિ.

… ચૂળવચ્છો [ચૂલગવચ્છો (સી.)] થેરો….

૧૨. ‘‘પઞ્ઞાબલી સીલવતૂપપન્નો, સમાહિતો ઝાનરતો સતીમા;

યદત્થિયં ભોજનં ભુઞ્જમાનો, કઙ્ખેથ કાલં ઇધ વીતરાગો’’તિ.

… મહાવચ્છો [મહાગવચ્છો (સી.)] થેરો….

૧૩. ‘‘નીલબ્ભવણ્ણા રુચિરા, સીતવારી સુચિન્ધરા;

ઇન્દગોપકસઞ્છન્ના, તે સેલા રમયન્તિ મ’’ન્તિ.

… વનવચ્છો થેરો….

૧૪. ‘‘ઉપજ્ઝાયો મં અવચ, ઇતો ગચ્છામ સીવક;

ગામે મે વસતિ કાયો, અરઞ્ઞં મે ગતો મનો;

સેમાનકોપિ ગચ્છામિ, નત્થિ સઙ્ગો વિજાનત’’ન્તિ.

… સિવકો સામણેરો….

૧૫. ‘‘પઞ્ચ છિન્દે પઞ્ચ જહે, પઞ્ચ ચુત્તરિ ભાવયે;

પઞ્ચસઙ્ગાતિગો ભિક્ખુ, ઓઘતિણ્ણોતિ વુચ્ચતી’’તિ.

… કુણ્ડધાનો થેરો….

૧૬. ‘‘યથાપિ ભદ્દો આજઞ્ઞો, નઙ્ગલાવત્તની સિખી;

ગચ્છતિ અપ્પકસિરેન, એવં રત્તિન્દિવા મમ;

ગચ્છન્તિ અપ્પકસિરેન, સુખે લદ્ધે નિરામિસે’’તિ.

… બેલટ્ઠસીસો થેરો….

૧૭. ‘‘મિદ્ધી યદા હોતિ મહગ્ઘસો ચ, નિદ્દાયિતા સમ્પરિવત્તસાયી;

મહાવરાહોવ નિવાપપુટ્ઠો, પુનપ્પુનં ગબ્ભમુપેતિ મન્દો’’તિ.

… દાસકો થેરો….

૧૮. ‘‘અહુ બુદ્ધસ્સ દાયાદો, ભિક્ખુ ભેસકળાવને;

કેવલં અટ્ઠિસઞ્ઞાય, અફરી પથવિં [પઠવિં (સી. સ્યા.)] ઇમં;

મઞ્ઞેહં કામરાગં સો, ખિપ્પમેવ પહિસ્સતી’’તિ [પહીયભિ (સબ્બત્થ પાળિયં)].

… સિઙ્ગાલપિતા [સીગાલપિતા (સી.)] થેરો….

૧૯. [ધ. પ. ૮૦, ૧૪૫ ધમ્મપદેપિ] ‘‘ઉદકં હિ નયન્તિ નેત્તિકા, ઉસુકારા નમયન્તિ [દમયન્તિ (ક.)] તેજનં;

દારું નમયન્તિ તચ્છકા, અત્તાનં દમયન્તિ સુબ્બતા’’તિ.

… કુલો [કુણ્ડલો (સી.), કુળો (સ્યા. ક.)] થેરો….

૨૦. ‘‘મરણે મે ભયં નત્થિ, નિકન્તિ નત્થિ જીવિતે;

સન્દેહં નિક્ખિપિસ્સામિ, સમ્પજાનો પટિસ્સતો’’તિ [પતિસ્સતોતિ (સી. સ્યા.)].

… અજિતો થેરો ….

વગ્ગો દુતિયો નિટ્ઠિતો.

તસ્સુદ્દાનં –

ચૂળવચ્છો મહાવચ્છો, વનવચ્છો ચ સીવકો;

કુણ્ડધાનો ચ બેલટ્ઠિ, દાસકો ચ તતોપરિ;

સિઙ્ગાલપિતિકો થેરો, કુલો ચ અજિતો દસાતિ.