૭. તિસ્સમેત્તેય્યસુત્તં

૮૨૦. ‘‘મેથુનમનુયુત્તસ્સ, (ઇચ્ચાયસ્મા તિસ્સો મેત્તેય્યો) વિઘાતં બ્રૂહિ મારિસ;

સુત્વાન તવ સાસનં, વિવેકે સિક્ખિસ્સામસે.

૮૨૧. ‘‘મેથુનમનુયુત્તસ્સ, (મેત્તેય્યાતિ ભગવા) મુસ્સતે વાપિ સાસનં;

મિચ્છા ચ પટિપજ્જતિ, એતં તસ્મિં અનારિયં.

૮૨૨. ‘‘એકો પુબ્બે ચરિત્વાન, મેથુનં યો નિસેવતિ;

યાનં ભન્તં વ તં લોકે, હીનમાહુ પુથુજ્જનં.

૮૨૩. ‘‘યસો કિત્તિ ચ યા પુબ્બે, હાયતે વાપિ તસ્સ સા;

એતમ્પિ દિસ્વા સિક્ખેથ, મેથુનં વિપ્પહાતવે.

૮૨૪. ‘‘સઙ્કપ્પેહિ પરેતો સો, કપણો વિય ઝાયતિ;

સુત્વા પરેસં નિગ્ઘોસં, મઙ્કુ હોતિ તથાવિધો.

૮૨૫. ‘‘અથ સત્થાનિ કુરુતે, પરવાદેહિ ચોદિતો;

એસ ખ્વસ્સ મહાગેધો, મોસવજ્જં પગાહતિ.

૮૨૬. ‘‘પણ્ડિતોતિ સમઞ્ઞાતો, એકચરિયં અધિટ્ઠિતો;

અથાપિ [સ ચાપિ (નિદ્દેસે)] મેથુને યુત્તો, મન્દોવ પરિકિસ્સતિ [પરિકિલિસ્સતિ (સી.)].

૮૨૭. ‘‘એતમાદીનવં ઞત્વા, મુનિ પુબ્બાપરે ઇધ;

એકચરિયં દળ્હં કયિરા, ન નિસેવેથ મેથુનં.

૮૨૮. ‘‘વિવેકઞ્ઞેવ સિક્ખેથ, એતદરિયાનમુત્તમં;

ન તેન સેટ્ઠો મઞ્ઞેથ, સ વે નિબ્બાનસન્તિકે.

૮૨૯. ‘‘રિત્તસ્સ મુનિનો ચરતો, કામેસુ અનપેક્ખિનો;

ઓઘતિણ્ણસ્સ પિહયન્તિ, કામેસુ ગધિતા [ગથિતા (સી.)] પજા’’તિ.

તિસ્સમેત્તેય્યસુત્તં સત્તમં નિટ્ઠિતં.