૮. પસૂરસુત્તં

૮૩૦. ઇધેવ સુદ્ધિ ઇતિ વાદયન્તિ [વિદિયન્તિ (સી. પી.)], નાઞ્ઞેસુ ધમ્મેસુ વિસુદ્ધિમાહુ;

યં નિસ્સિતા તત્થ સુભં વદાના, પચ્ચેકસચ્ચેસુ પુથૂ નિવિટ્ઠા.

૮૩૧. તે વાદકામા પરિસં વિગય્હ, બાલં દહન્તી મિથુ અઞ્ઞમઞ્ઞં;

વદન્તિ તે અઞ્ઞસિતા કથોજ્જં, પસંસકામા કુસલા વદાના.

૮૩૨. યુત્તો કથાયં પરિસાય મજ્ઝે, પસંસમિચ્છં વિનિઘાતિ હોતિ;

અપાહતસ્મિં પન મઙ્કુ હોતિ, નિન્દાય સો કુપ્પતિ રન્ધમેસી.

૮૩૩. યમસ્સ વાદં પરિહીનમાહુ, અપાહતં પઞ્હવિમંસકાસે;

પરિદેવતિ સોચતિ હીનવાદો, ઉપચ્ચગા મન્તિ અનુત્થુનાતિ.

૮૩૪. એતે વિવાદા સમણેસુ જાતા, એતેસુ ઉગ્ઘાતિ નિઘાતિ હોતિ;

એતમ્પિ દિસ્વા વિરમે કથોજ્જં, ન હઞ્ઞદત્થત્થિપસંસલાભા.

૮૩૫. પસંસિતો વા પન તત્થ હોતિ, અક્ખાય વાદં પરિસાય મજ્ઝે;

સો હસ્સતી ઉણ્ણમતી [ઉન્નમતી (?)] ચ તેન, પપ્પુય્ય તમત્થં યથા મનો અહુ.

૮૩૬. યા ઉણ્ણતી [ઉન્નતી (?)] સાસ્સ વિઘાતભૂમિ, માનાતિમાનં વદતે પનેસો;

એતમ્પિ દિસ્વા ન વિવાદયેથ, ન હિ તેન સુદ્ધિં કુસલા વદન્તિ.

૮૩૭. સૂરો યથા રાજખાદાય પુટ્ઠો, અભિગજ્જમેતિ પટિસૂરમિચ્છં;

યેનેવ સો તેન પલેહિ સૂર, પુબ્બેવ નત્થિ યદિદં યુધાય.

૮૩૮. યે દિટ્ઠિમુગ્ગય્હ વિવાદયન્તિ [વિવાદિયન્તિ (સી. પી.)], ઇદમેવ સચ્ચન્તિ ચ વાદયન્તિ;

તે ત્વં વદસ્સૂ ન હિ તેધ અત્થિ, વાદમ્હિ જાતે પટિસેનિકત્તા.

૮૩૯. વિસેનિકત્વા પન યે ચરન્તિ, દિટ્ઠીહિ દિટ્ઠિં અવિરુજ્ઝમાના;

તેસુ ત્વં કિં લભેથો પસૂર, યેસીધ નત્થી પરમુગ્ગહીતં.

૮૪૦. અથ ત્વં પવિતક્કમાગમા, મનસા દિટ્ઠિગતાનિ ચિન્તયન્તો;

ધોનેન યુગં સમાગમા, ન હિ ત્વં સક્ખસિ સમ્પયાતવેતિ.

પસૂરસુત્તં અટ્ઠમં નિટ્ઠિતં.