૧૬. સારિપુત્તસુત્તં

૯૬૧. ‘‘ન મે દિટ્ઠો ઇતો પુબ્બે, (ઇચ્ચાયસ્મા સારિપુત્તો)

ન સુતો ઉદ કસ્સચિ;

એવં વગ્ગુવદો સત્થા,

તુસિતા ગણિમાગતો.

૯૬૨. ‘‘સદેવકસ્સ લોકસ્સ, યથા દિસ્સતિ ચક્ખુમા;

સબ્બં તમં વિનોદેત્વા, એકોવ રતિમજ્ઝગા.

૯૬૩. ‘‘તં બુદ્ધં અસિતં તાદિં, અકુહં ગણિમાગતં;

બહૂનમિધ બદ્ધાનં, અત્થિ પઞ્હેન આગમં.

૯૬૪. ‘‘ભિક્ખુનો વિજિગુચ્છતો, ભજતો રિત્તમાસનં;

રુક્ખમૂલં સુસાનં વા, પબ્બતાનં ગુહાસુ વા.

૯૬૫. ‘‘ઉચ્ચાવચેસુ સયનેસુ, કીવન્તો તત્થ ભેરવા;

યેહિ ભિક્ખુ ન વેધેય્ય, નિગ્ઘોસે સયનાસને.

૯૬૬. ‘‘કતી પરિસ્સયા લોકે, ગચ્છતો અગતં દિસં;

યે ભિક્ખુ અભિસમ્ભવે, પન્તમ્હિ સયનાસને.

૯૬૭. ‘‘ક્યાસ્સ બ્યપ્પથયો અસ્સુ, ક્યાસ્સસ્સુ ઇધ ગોચરા;

કાનિ સીલબ્બતાનાસ્સુ, પહિતત્તસ્સ ભિક્ખુનો.

૯૬૮. ‘‘કં સો સિક્ખં સમાદાય, એકોદિ નિપકો સતો;

કમ્મારો રજતસ્સેવ, નિદ્ધમે મલમત્તનો’’.

૯૬૯. ‘‘વિજિગુચ્છમાનસ્સ યદિદં ફાસુ, (સારિપુત્તાતિ ભગવા)

રિત્તાસનં સયનં સેવતો ચે;

સમ્બોધિકામસ્સ યથાનુધમ્મં,

તં તે પવક્ખામિ યથા પજાનં.

૯૭૦. ‘‘પઞ્ચન્નં ધીરો ભયાનં ન ભાયે, ભિક્ખુ સતો સપરિયન્તચારી;

ડંસાધિપાતાનં સરીસપાનં, મનુસ્સફસ્સાનં ચતુપ્પદાનં.

૯૭૧. ‘‘પરધમ્મિકાનમ્પિ ન સન્તસેય્ય, દિસ્વાપિ તેસં બહુભેરવાનિ;

અથાપરાનિ અભિસમ્ભવેય્ય, પરિસ્સયાનિ કુસલાનુએસી.

૯૭૨. ‘‘આતઙ્કફસ્સેન ખુદાય ફુટ્ઠો, સીતં અતુણ્હં [અચ્ચુણ્હં (સી. સ્યા.)] અધિવાસયેય્ય;

સો તેહિ ફુટ્ઠો બહુધા અનોકો, વીરિયં પરક્કમ્મદળ્હં કરેય્ય.

૯૭૩. ‘‘થેય્યં ન કારે [ન કરેય્ય (સી. સ્યા. ક.)] ન મુસા ભણેય્ય, મેત્તાય ફસ્સે તસથાવરાનિ;

યદાવિલત્તં મનસો વિજઞ્ઞા, કણ્હસ્સ પક્ખોતિ વિનોદયેય્ય.

૯૭૪. ‘‘કોધાતિમાનસ્સ વસં ન ગચ્છે, મૂલમ્પિ તેસં પલિખઞ્ઞ તિટ્ઠે;

અથપ્પિયં વા પન અપ્પિયં વા, અદ્ધા ભવન્તો અભિસમ્ભવેય્ય.

૯૭૫. ‘‘પઞ્ઞં પુરક્ખત્વા કલ્યાણપીતિ, વિક્ખમ્ભયે તાનિ પરિસ્સયાનિ;

અરતિં સહેથ સયનમ્હિ પન્તે, ચતુરો સહેથ પરિદેવધમ્મે.

૯૭૬. ‘‘કિંસૂ અસિસ્સામિ કુવં વા [કુધ વા (ક.), કુથ વા (નિદ્દેસ)] અસિસ્સં, દુક્ખં વત સેત્થ ક્વજ્જ સેસ્સં;

એતે વિતક્કે પરિદેવનેય્યે, વિનયેથ સેખો અનિકેતચારી.

૯૭૭. ‘‘અન્નઞ્ચ લદ્ધા વસનઞ્ચ કાલે, મત્તં સો જઞ્ઞા ઇધ તોસનત્થં;

સો તેસુ ગુત્તો યતચારિ ગામે, રુસિતોપિ વાચં ફરુસં ન વજ્જા.

૯૭૮. ‘‘ઓક્ખિત્તચક્ખુ ન ચ પાદલોલો, ઝાનાનુયુત્તો બહુજાગરસ્સ;

ઉપેક્ખમારબ્ભ સમાહિતત્તો, તક્કાસયં કુક્કુચ્ચિયૂપછિન્દે.

૯૭૯. ‘‘ચુદિતો વચીભિ સતિમાભિનન્દે, સબ્રહ્મચારીસુ ખિલં પભિન્દે;

વાચં પમુઞ્ચે કુસલં નાતિવેલં, જનવાદધમ્માય ન ચેતયેય્ય.

૯૮૦. ‘‘અથાપરં પઞ્ચ રજાનિ લોકે, યેસં સતીમા વિનયાય સિક્ખે;

રૂપેસુ સદ્દેસુ અથો રસેસુ, ગન્ધેસુ ફસ્સેસુ સહેથ રાગં.

૯૮૧. ‘‘એતેસુ ધમ્મેસુ વિનેય્ય છન્દં, ભિક્ખુ સતિમા સુવિમુત્તચિત્તો;

કાલેન સો સમ્મા ધમ્મં પરિવીમંસમાનો,

એકોદિભૂતો વિહને તમં સો’’તિ.

સારિપુત્તસુત્તં સોળસમં નિટ્ઠિતં.

અટ્ઠકવગ્ગો ચતુત્થો