૧૫. અત્તદણ્ડસુત્તં

૯૪૧. ‘‘અત્તદણ્ડા ભયં જાતં, જનં પસ્સથ મેધગં;

સંવેગં કિત્તયિસ્સામિ, યથા સંવિજિતં મયા.

૯૪૨. ‘‘ફન્દમાનં પજં દિસ્વા, મચ્છે અપ્પોદકે યથા;

અઞ્ઞમઞ્ઞેહિ બ્યારુદ્ધે, દિસ્વા મં ભયમાવિસિ.

૯૪૩. ‘‘સમન્તમસારો લોકો, દિસા સબ્બા સમેરિતા;

ઇચ્છં ભવનમત્તનો, નાદ્દસાસિં અનોસિતં.

૯૪૪. ‘‘ઓસાનેત્વેવ બ્યારુદ્ધે, દિસ્વા મે અરતી અહુ;

અથેત્થ સલ્લમદ્દક્ખિં, દુદ્દસં હદયનિસ્સિતં.

૯૪૫. ‘‘યેન સલ્લેન ઓતિણ્ણો, દિસા સબ્બા વિધાવતિ;

તમેવ સલ્લમબ્બુય્હ, ન ધાવતિ ન સીદતિ.

૯૪૬. ‘‘તત્થ સિક્ખાનુગીયન્તિ [સિક્ખાનુકિરિયન્તિ (ક.)], યાનિ લોકે ગધિતાનિ;

ન તેસુ પસુતો સિયા, નિબ્બિજ્ઝ સબ્બસો કામે;

સિક્ખે નિબ્બાનમત્તનો.

૯૪૭. ‘‘સચ્ચો સિયા અપ્પગબ્ભો, અમાયો રિત્તપેસુણો;

અક્કોધનો લોભપાપં, વેવિચ્છં વિતરે મુનિ.

૯૪૮. ‘‘નિદ્દં તન્દિં સહે થીનં, પમાદેન ન સંવસે;

અતિમાને ન તિટ્ઠેય્ય, નિબ્બાનમનસો નરો.

૯૪૯. ‘‘મોસવજ્જે ન નીયેથ, રૂપે સ્નેહં ન કુબ્બયે;

માનઞ્ચ પરિજાનેય્ય, સાહસા વિરતો ચરે.

૯૫૦. ‘‘પુરાણં નાભિનન્દેય્ય, નવે ખન્તિં ન કુબ્બયે;

હિય્યમાને ન સોચેય્ય, આકાસં ન સિતો સિયા.

૯૫૧. ‘‘ગેધં બ્રૂમિ મહોઘોતિ, આજવં બ્રૂમિ જપ્પનં;

આરમ્મણં પકપ્પનં, કામપઙ્કો દુરચ્ચયો.

૯૫૨. ‘‘સચ્ચા અવોક્કમ્મ [અવોક્કમં (નિદ્દેસ)] મુનિ, થલે તિટ્ઠતિ બ્રાહ્મણો;

સબ્બં સો [સબ્બસો (સ્યા. ક.)] પટિનિસ્સજ્જ, સ વે સન્તોતિ વુચ્ચતિ.

૯૫૩. ‘‘સ વે વિદ્વા સ વેદગૂ, ઞત્વા ધમ્મં અનિસ્સિતો;

સમ્મા સો લોકે ઇરિયાનો, ન પિહેતીધ કસ્સચિ.

૯૫૪. ‘‘યોધ કામે અચ્ચતરિ, સઙ્ગં લોકે દુરચ્ચયં;

ન સો સોચતિ નાજ્ઝેતિ, છિન્નસોતો અબન્ધનો.

૯૫૫. ‘‘યં પુબ્બે તં વિસોસેહિ, પચ્છા તે માહુ કિઞ્ચનં;

મજ્ઝે ચે નો ગહેસ્સસિ, ઉપસન્તો ચરિસ્સસિ.

૯૫૬. ‘‘સબ્બસો નામરૂપસ્મિં, યસ્સ નત્થિ મમાયિતં;

અસતા ચ ન સોચતિ, સ વે લોકે ન જીયતિ.

૯૫૭. ‘‘યસ્સ નત્થિ ઇદં મેતિ, પરેસં વાપિ કિઞ્ચનં;

મમત્તં સો અસંવિન્દં, નત્થિ મેતિ ન સોચતિ.

૯૫૮. ‘‘અનિટ્ઠુરી અનનુગિદ્ધો, અનેજો સબ્બધી સમો;

તમાનિસંસં પબ્રૂમિ, પુચ્છિતો અવિકમ્પિનં.

૯૫૯. ‘‘અનેજસ્સ વિજાનતો, નત્થિ કાચિ નિસઙ્ખતિ [નિસઙ્ખિતિ (સી. પી.)].

વિરતો સો વિયારબ્ભા, ખેમં પસ્સતિ સબ્બધિ.

૯૬૦. ‘‘ન સમેસુ ન ઓમેસુ, ન ઉસ્સેસુ વદતે મુનિ;

સન્તો સો વીતમચ્છરો, નાદેતિ ન નિરસ્સતી’’તિ.

અત્તદણ્ડસુત્તં પન્નરસમં નિટ્ઠિતં.