૧૪. તુવટકસુત્તં

૯૨૧. ‘‘પુચ્છામિ તં આદિચ્ચબન્ધુ [આદિચ્ચબન્ધું (સી. સ્યા.)], વિવેકં સન્તિપદઞ્ચ મહેસિ;

કથં દિસ્વા નિબ્બાતિ ભિક્ખુ, અનુપાદિયાનો લોકસ્મિં કિઞ્ચિ’’.

૯૨૨. ‘‘મૂલં પપઞ્ચસઙ્ખાય, (ઇતિ ભગવા)

મન્તા અસ્મીતિ સબ્બમુપરુન્ધે [સબ્બમુપરુદ્ધે (સ્યા. પી. ક.)];

યા કાચિ તણ્હા અજ્ઝત્તં,

તાસં વિનયા [વિનયાય (?)] સદા સતો સિક્ખે.

૯૨૩. ‘‘યં કિઞ્ચિ ધમ્મમભિજઞ્ઞા, અજ્ઝત્તં અથવાપિ બહિદ્ધા;

ન તેન થામં [માનં (સી. ક.)] કુબ્બેથ, ન હિ સા નિબ્બુતિ સતં વુત્તા.

૯૨૪. ‘‘સેય્યો ન તેન મઞ્ઞેય્ય, નીચેય્યો અથવાપિ સરિક્ખો;

ફુટ્ઠો [પુટ્ઠો (સી. સ્યા. ક.)] અનેકરૂપેહિ, નાતુમાનં વિકપ્પયં તિટ્ઠે.

૯૨૫. ‘‘અજ્ઝત્તમેવુપસમે, ન અઞ્ઞતો ભિક્ખુ સન્તિમેસેય્ય;

અજ્ઝત્તં ઉપસન્તસ્સ, નત્થિ અત્તા કુતો નિરત્તા વા.

૯૨૬. ‘‘મજ્ઝે યથા સમુદ્દસ્સ, ઊમિ નો જાયતી ઠિતો હોતિ;

એવં ઠિતો અનેજસ્સ, ઉસ્સદં ભિક્ખુ ન કરેય્ય કુહિઞ્ચિ’’.

૯૨૭. ‘‘અકિત્તયી વિવટચક્ખુ, સક્ખિધમ્મં પરિસ્સયવિનયં;

પટિપદં વદેહિ ભદ્દન્તે, પાતિમોક્ખં અથવાપિ સમાધિં’’.

૯૨૮. ‘‘ચક્ખૂહિ નેવ લોલસ્સ, ગામકથાય આવરયે સોતં;

રસે ચ નાનુગિજ્ઝેય્ય, ન ચ મમાયેથ કિઞ્ચિ લોકસ્મિં.

૯૨૯. ‘‘ફસ્સેન યદા ફુટ્ઠસ્સ, પરિદેવં ભિક્ખુ ન કરેય્ય કુહિઞ્ચિ;

ભવઞ્ચ નાભિજપ્પેય્ય, ભેરવેસુ ચ ન સમ્પવેધેય્ય.

૯૩૦. ‘‘અન્નાનમથો પાનાનં, ખાદનીયાનં અથોપિ વત્થાનં;

લદ્ધા ન સન્નિધિં કયિરા, ન ચ પરિત્તસે તાનિ અલભમાનો.

૯૩૧. ‘‘ઝાયી ન પાદલોલસ્સ, વિરમે કુક્કુચ્ચા નપ્પમજ્જેય્ય;

અથાસનેસુ સયનેસુ, અપ્પસદ્દેસુ ભિક્ખુ વિહરેય્ય.

૯૩૨. ‘‘નિદ્દં ન બહુલીકરેય્ય, જાગરિયં ભજેય્ય આતાપી;

તન્દિં માયં હસ્સં ખિડ્ડં, મેથુનં વિપ્પજહે સવિભૂસં.

૯૩૩. ‘‘આથબ્બણં સુપિનં લક્ખણં, નો વિદહે અથોપિ નક્ખત્તં;

વિરુતઞ્ચ ગબ્ભકરણં, તિકિચ્છં મામકો ન સેવેય્ય.

૯૩૪. ‘‘નિન્દાય નપ્પવેધેય્ય, ન ઉણ્ણમેય્ય પસંસિતો ભિક્ખુ;

લોભં સહ મચ્છરિયેન, કોધં પેસુણિયઞ્ચ પનુદેય્ય.

૯૩૫. ‘‘કયવિક્કયે ન તિટ્ઠેય્ય, ઉપવાદં ભિક્ખુ ન કરેય્ય કુહિઞ્ચિ;

ગામે ચ નાભિસજ્જેય્ય, લાભકમ્યા જનં ન લપયેય્ય.

૯૩૬. ‘‘ન ચ કત્થિતા સિયા ભિક્ખુ, ન ચ વાચં પયુત્તં ભાસેય્ય;

પાગબ્ભિયં ન સિક્ખેય્ય, કથં વિગ્ગાહિકં ન કથયેય્ય.

૯૩૭. ‘‘મોસવજ્જે ન નીયેથ, સમ્પજાનો સઠાનિ ન કયિરા;

અથ જીવિતેન પઞ્ઞાય, સીલબ્બતેન નાઞ્ઞમતિમઞ્ઞે.

૯૩૮. ‘‘સુત્વા રુસિતો બહું વાચં, સમણાનં વા પુથુજનાનં [પુથુવચનાનં (સી. સ્યા. પી.)];

ફરુસેન ને ન પટિવજ્જા, ન હિ સન્તો પટિસેનિકરોન્તિ.

૯૩૯. ‘‘એતઞ્ચ ધમ્મમઞ્ઞાય, વિચિનં ભિક્ખુ સદા સતો સિક્ખે;

સન્તીતિ નિબ્બુતિં ઞત્વા, સાસને ગોતમસ્સ ન પમજ્જેય્ય.

૯૪૦. ‘‘અભિભૂ હિ સો અનભિભૂતો, સક્ખિધમ્મમનીતિહમદસ્સી;

તસ્મા હિ તસ્સ ભગવતો સાસને, અપ્પમત્તો સદા નમસ્સમનુસિક્ખે’’તિ.

તુવટકસુત્તં ચુદ્દસમં નિટ્ઠિતં.