૧૩. મહાબ્યૂહસુત્તં

૯૦૧. યે કેચિમે દિટ્ઠિપરિબ્બસાના, ઇદમેવ સચ્ચન્તિ વિવાદયન્તિ [વિવાદિયન્તિ (સી. પી.)];

સબ્બેવ તે નિન્દમન્વાનયન્તિ, અથો પસંસમ્પિ લભન્તિ તત્થ.

૯૦૨. અપ્પઞ્હિ એતં ન અલં સમાય, દુવે વિવાદસ્સ ફલાનિ બ્રૂમિ;

એતમ્પિ દિસ્વા ન વિવાદયેથ, ખેમાભિપસ્સં અવિવાદભૂમિં.

૯૦૩. યા કાચિમા સમ્મુતિયો પુથુજ્જા, સબ્બાવ એતા ન ઉપેતિ વિદ્વા;

અનૂપયો સો ઉપયં કિમેય્ય, દિટ્ઠે સુતે ખન્તિમકુબ્બમાનો.

૯૦૪. સીલુત્તમા સઞ્ઞમેનાહુ સુદ્ધિં, વતં સમાદાય ઉપટ્ઠિતાસે;

ઇધેવ સિક્ખેમ અથસ્સ સુદ્ધિં, ભવૂપનીતા કુસલા વદાના.

૯૦૫. સચે ચુતો સીલવતતો હોતિ, પવેધતી [સ વેધતિ (સી. પી.)] કમ્મ વિરાધયિત્વા;

પજપ્પતી પત્થયતી ચ સુદ્ધિં, સત્થાવ હીનો પવસં ઘરમ્હા.

૯૦૬. સીલબ્બતં વાપિ પહાય સબ્બં, કમ્મઞ્ચ સાવજ્જનવજ્જમેતં;

સુદ્ધિં અસુદ્ધિન્તિ અપત્થયાનો, વિરતો ચરે સન્તિમનુગ્ગહાય.

૯૦૭. તમૂપનિસ્સાય જિગુચ્છિતં વા, અથવાપિ દિટ્ઠં વ સુતં મુતં વા;

ઉદ્ધંસરા સુદ્ધિમનુત્થુનન્તિ, અવીતતણ્હાસે ભવાભવેસુ.

૯૦૮. પત્થયમાનસ્સ હિ જપ્પિતાનિ, પવેધિતં વાપિ પકપ્પિતેસુ;

ચુતૂપપાતો ઇધ યસ્સ નત્થિ, સ કેન વેધેય્ય કુહિંવ જપ્પે [કુહિઞ્ચિ જપ્પે (સી. સ્યા. ક.), કુહિં પજપ્પે (પી.) નિદ્દેસો પસ્સિતબ્બો].

૯૦૯. યમાહુ ધમ્મં પરમન્તિ એકે, તમેવ હીનન્તિ પનાહુ અઞ્ઞે;

સચ્ચો નુ વાદો કતમો ઇમેસં, સબ્બેવ હીમે કુસલા વદાના.

૯૧૦. સકઞ્હિ ધમ્મં પરિપુણ્ણમાહુ, અઞ્ઞસ્સ ધમ્મં પન હીનમાહુ;

એવમ્પિ વિગ્ગય્હ વિવાદયન્તિ, સકં સકં સમ્મુતિમાહુ સચ્ચં.

૯૧૧. પરસ્સ ચે વમ્ભયિતેન હીનો, ન કોચિ ધમ્મેસુ વિસેસિ અસ્સ;

પુથૂ હિ અઞ્ઞસ્સ વદન્તિ ધમ્મં, નિહીનતો સમ્હિ દળ્હં વદાના.

૯૧૨. સદ્ધમ્મપૂજાપિ નેસં તથેવ, યથા પસંસન્તિ સકાયનાનિ;

સબ્બેવ વાદા [સબ્બે પવાદા (સ્યા.)] તથિયા [તથિવા (સબ્બત્થ)] ભવેય્યું, સુદ્ધી હિ નેસં પચ્ચત્તમેવ.

૯૧૩. ન બ્રાહ્મણસ્સ પરનેય્યમત્થિ, ધમ્મેસુ નિચ્છેય્ય સમુગ્ગહીતં;

તસ્મા વિવાદાનિ ઉપાતિવત્તો, ન હિ સેટ્ઠતો પસ્સતિ ધમ્મમઞ્ઞં.

૯૧૪. જાનામિ પસ્સામિ તથેવ એતં, દિટ્ઠિયા એકે પચ્ચેન્તિ સુદ્ધિં;

અદ્દક્ખિ ચે કિઞ્હિ તુમસ્સ તેન, અતિસિત્વા અઞ્ઞેન વદન્તિ સુદ્ધિં.

૯૧૫. પસ્સં નરો દક્ખતિ [દક્ખિતિ (સી.)] નામરૂપં, દિસ્વાન વા ઞસ્સતિ તાનિમેવ;

કામં બહું પસ્સતુ અપ્પકં વા, ન હિ તેન સુદ્ધિં કુસલા વદન્તિ.

૯૧૬. નિવિસ્સવાદી ન હિ સુબ્બિનાયો, પકપ્પિતં દિટ્ઠિ પુરેક્ખરાનો;

યં નિસ્સિતો તત્થ સુભં વદાનો, સુદ્ધિંવદો તત્થ તથદ્દસા સો.

૯૧૭. ન બ્રાહ્મણો કપ્પમુપેતિ સઙ્ખા [સઙ્ખં (સી. સ્યા. પી.)], ન દિટ્ઠિસારી નપિ ઞાણબન્ધુ;

ઞત્વા ચ સો સમ્મુતિયો [સમ્મતિયો (સ્યા.)] પુથુજ્જા, ઉપેક્ખતી ઉગ્ગહણન્તિ મઞ્ઞે.

૯૧૮. વિસ્સજ્જ ગન્થાનિ મુનીધ લોકે, વિવાદજાતેસુ ન વગ્ગસારી;

સન્તો અસન્તેસુ ઉપેક્ખકો સો, અનુગ્ગહો ઉગ્ગહણન્તિ મઞ્ઞે.

૯૧૯. પુબ્બાસવે હિત્વા નવે અકુબ્બં, ન છન્દગૂ નોપિ નિવિસ્સવાદી;

સ વિપ્પમુત્તો દિટ્ઠિગતેહિ ધીરો, ન લિમ્પતિ [ન લિપ્પતિ (સી. પી.)] લોકે અનત્તગરહી.

૯૨૦. સ સબ્બધમ્મેસુ વિસેનિભૂતો, યં કિઞ્ચિ દિટ્ઠં વ સુતં મુતં વા;

સ પન્નભારો મુનિ વિપ્પમુત્તો, ન કપ્પિયો નૂપરતો ન પત્થિયોતિ.

મહાબ્યૂહસુત્તં તેરસમં નિટ્ઠિતં.