૧૨. ચૂળબ્યૂહસુત્તં [ચૂળવિયૂહસુત્તં (સી. સ્યા. નિદ્દેસ)]

૮૮૪. સકંસકંદિટ્ઠિપરિબ્બસાના, વિગ્ગય્હ નાના કુસલા વદન્તિ;

યો એવં જાનાતિ સ વેદિ ધમ્મં, ઇદં પટિક્કોસમકેવલી સો.

૮૮૫. એવમ્પિ વિગ્ગય્હ વિવાદયન્તિ, બાલો પરો અક્કુસલોતિ [અકુસલોતિ (સી. સ્યા. પી.)] ચાહુ;

સચ્ચો નુ વાદો કતમો ઇમેસં, સબ્બેવ હીમે કુસલા વદાના.

૮૮૬. પરસ્સ ચે ધમ્મમનાનુજાનં, બાલોમકો [બાલો મગો (સી. સ્યા. ક.)] હોતિ નિહીનપઞ્ઞો;

સબ્બેવ બાલા સુનિહીનપઞ્ઞા, સબ્બેવિમે દિટ્ઠિપરિબ્બસાના.

૮૮૭. સન્દિટ્ઠિયા ચેવ ન વીવદાતા, સંસુદ્ધપઞ્ઞા કુસલા મુતીમા;

ન તેસં કોચિ પરિહીનપઞ્ઞો [કોચિપિ નિહીનપઞ્ઞો (સી. સ્યા. ક.)], દિટ્ઠી હિ તેસમ્પિ તથા સમત્તા.

૮૮૮. ન વાહમેતં તથિયન્તિ [તથિવન્તિ (સ્યા. ક.)] બ્રૂમિ, યમાહુ બાલા મિથુ અઞ્ઞમઞ્ઞં;

સકંસકંદિટ્ઠિમકંસુ સચ્ચં, તસ્મા હિ બાલોતિ પરં દહન્તિ.

૮૮૯. યમાહુ સચ્ચં તથિયન્તિ એકે, તમાહુ અઞ્ઞે [અઞ્ઞેપિ (સ્યા.), અઞ્ઞે ચ (?)] તુચ્છં મુસાતિ;

એવમ્પિ વિગય્હ વિવાદયન્તિ, કસ્મા ન એકં સમણા વદન્તિ.

૮૯૦. એકઞ્હિ સચ્ચં ન દુતીયમત્થિ, યસ્મિં પજા નો વિવદે પજાનં;

નાના તે [નાનાતો (ક.)] સચ્ચાનિ સયં થુનન્તિ, તસ્મા ન એકં સમણા વદન્તિ.

૮૯૧. કસ્મા નુ સચ્ચાનિ વદન્તિ નાના, પવાદિયાસે કુસલા વદાના;

સચ્ચાનિ સુતાનિ બહૂનિ નાના, ઉદાહુ તે તક્કમનુસ્સરન્તિ.

૮૯૨. ન હેવ સચ્ચાનિ બહૂનિ નાના, અઞ્ઞત્ર સઞ્ઞાય નિચ્ચાનિ લોકે;

તક્કઞ્ચ દિટ્ઠીસુ પકપ્પયિત્વા, સચ્ચં મુસાતિ દ્વયધમ્મમાહુ.

૮૯૩. દિટ્ઠે સુતે સીલવતે મુતે વા, એતે ચ નિસ્સાય વિમાનદસ્સી;

વિનિચ્છયે ઠત્વા પહસ્સમાનો, બાલો પરો અક્કુસલોતિ ચાહ.

૮૯૪. યેનેવ બાલોતિ પરં દહાતિ, તેનાતુમાનં કુસલોતિ ચાહ;

સયમત્તના સો કુસલો વદાનો, અઞ્ઞં વિમાનેતિ તદેવ પાવ.

૮૯૫. અતિસારદિટ્ઠિયાવ સો સમત્તો, માનેન મત્તો પરિપુણ્ણમાની;

સયમેવ સામં મનસાભિસિત્તો, દિટ્ઠી હિ સા તસ્સ તથા સમત્તા.

૮૯૬. પરસ્સ ચે હિ વચસા નિહીનો, તુમો સહા હોતિ નિહીનપઞ્ઞો;

અથ ચે સયં વેદગૂ હોતિ ધીરો, ન કોચિ બાલો સમણેસુ અત્થિ.

૮૯૭. અઞ્ઞં ઇતો યાભિવદન્તિ ધમ્મં, અપરદ્ધા સુદ્ધિમકેવલી તે [સુદ્ધિમકેવલીનો (સી.)];

એવમ્પિ તિત્થ્યા પુથુસો વદન્તિ, સન્દિટ્ઠિરાગેન હિ તેભિરત્તા [ત્યાભિરત્તા (સ્યા. ક.)].

૮૯૮. ઇધેવ સુદ્ધિ ઇતિ વાદયન્તિ, નાઞ્ઞેસુ ધમ્મેસુ વિસુદ્ધિમાહુ;

એવમ્પિ તિત્થ્યા પુથુસો નિવિટ્ઠા, સકાયને તત્થ દળ્હં વદાના.

૮૯૯. સકાયને વાપિ દળ્હં વદાનો, કમેત્થ બાલોતિ પરં દહેય્ય;

સયમેવ સો મેધગમાવહેય્ય [મેધકં આવહેય્ય (સી. પી.)], પરં વદં બાલમસુદ્ધિધમ્મં.

૯૦૦. વિનિચ્છયે ઠત્વા સયં પમાય, ઉદ્ધં સ [ઉદ્દં સો (સી. સ્યા. પી.)] લોકસ્મિં વિવાદમેતિ;

હિત્વાન સબ્બાનિ વિનિચ્છયાનિ, ન મેધગં કુબ્બતિ જન્તુ લોકેતિ.

ચૂળબ્યૂહસુત્તં દ્વાદસમં નિટ્ઠિતં.