૮. સલ્લસુત્તં

૫૭૯. અનિમિત્તમનઞ્ઞાતં, મચ્ચાનં ઇધ જીવિતં;

કસિરઞ્ચ પરિત્તઞ્ચ, તઞ્ચ દુક્ખેન સંયુતં.

૫૮૦. ન હિ સો ઉપક્કમો અત્થિ, યેન જાતા ન મિય્યરે;

જરમ્પિ પત્વા મરણં, એવંધમ્મા હિ પાણિનો.

૫૮૧. ફલાનમિવ પક્કાનં, પાતો પતનતો [પપતતો (સી. પી. અટ્ઠ.)] ભયં;

એવં જાતાન મચ્ચાનં, નિચ્ચં મરણતો ભયં.

૫૮૨. યથાપિ કુમ્ભકારસ્સ, કતા મત્તિકભાજના;

સબ્બે ભેદનપરિયન્તા [ભેદપરિયન્તા (સ્યા.)], એવં મચ્ચાન જીવિતં.

૫૮૩. દહરા ચ મહન્તા ચ, યે બાલા યે ચ પણ્ડિતા;

સબ્બે મચ્ચુવસં યન્તિ, સબ્બે મચ્ચુપરાયણા.

૫૮૪. તેસં મચ્ચુપરેતાનં, ગચ્છતં પરલોકતો;

ન પિતા તાયતે પુત્તં, ઞાતી વા પન ઞાતકે.

૫૮૫. પેક્ખતં યેવ ઞાતીનં, પસ્સ લાલપતં પુથુ;

એકમેકોવ મચ્ચાનં, ગોવજ્ઝો વિય નીયતિ [નિય્યતિ (બહૂસુ)].

૫૮૬. એવમબ્ભાહતો લોકો, મચ્ચુના ચ જરાય ચ;

તસ્મા ધીરા ન સોચન્તિ, વિદિત્વા લોકપરિયાયં.

૫૮૭. યસ્સ મગ્ગં ન જાનાસિ, આગતસ્સ ગતસ્સ વા;

ઉભો અન્તે અસમ્પસ્સં, નિરત્થં પરિદેવસિ.

૫૮૮. પરિદેવયમાનો ચે, કિઞ્ચિદત્થં ઉદબ્બહે;

સમ્મૂળ્હો હિંસમત્તાનં, કયિરા ચે નં વિચક્ખણો.

૫૮૯. ન હિ રુણ્ણેન સોકેન, સન્તિં પપ્પોતિ ચેતસો;

ભિય્યસ્સુપ્પજ્જતે દુક્ખં, સરીરં ચુપહઞ્ઞતિ.

૫૯૦. કિસો વિવણ્ણો ભવતિ, હિંસમત્તાનમત્તના;

ન તેન પેતા પાલેન્તિ, નિરત્થા પરિદેવના.

૫૯૧. સોકમપ્પજહં જન્તુ, ભિય્યો દુક્ખં નિગચ્છતિ;

અનુત્થુનન્તો કાલઙ્કતં [કાલકતં (સી. સ્યા.)], સોકસ્સ વસમન્વગૂ.

૫૯૨. અઞ્ઞેપિ પસ્સ ગમિને, યથાકમ્મૂપગે નરે;

મચ્ચુનો વસમાગમ્મ, ફન્દન્તેવિધ પાણિનો.

૫૯૩. યેન યેન હિ મઞ્ઞન્તિ, તતો તં હોતિ અઞ્ઞથા;

એતાદિસો વિનાભાવો, પસ્સ લોકસ્સ પરિયાયં.

૫૯૪. અપિ વસ્સસતં જીવે, ભિય્યો વા પન માણવો;

ઞાતિસઙ્ઘા વિના હોતિ, જહાતિ ઇધ જીવિતં.

૫૯૫. તસ્મા અરહતો સુત્વા, વિનેય્ય પરિદેવિતં;

પેતં કાલઙ્કતં દિસ્વા, નેસો લબ્ભા મયા ઇતિ.

૫૯૬. યથા સરણમાદિત્તં, વારિના પરિનિબ્બયે [પરિનિબ્બુતો (સી. ક.)];

એવમ્પિ ધીરો સપઞ્ઞો, પણ્ડિતો કુસલો નરો;

ખિપ્પમુપ્પતિતં સોકં, વાતો તૂલંવ ધંસયે.

૫૯૭. પરિદેવં પજપ્પઞ્ચ, દોમનસ્સઞ્ચ અત્તનો;

અત્તનો સુખમેસાનો, અબ્બહે સલ્લમત્તનો.

૫૯૮. અબ્બુળ્હસલ્લો અસિતો, સન્તિં પપ્પુય્ય ચેતસો;

સબ્બસોકં અતિક્કન્તો, અસોકો હોતિ નિબ્બુતોતિ.

સલ્લસુત્તં અટ્ઠમં નિટ્ઠિતં.